كلام الناس؟

[222ahmed222]

اقولك حاجه بصراحه يعني م الآخر


انا لما كنت في ثانوي عام قبل الامتحان بشهر ونص تقريبا روحت سألت واحد جيراننا في هندسه خاص بقوله

تتوقع اجيب كام في الميه راح قاللي بص يابو حميد انت مش هتزيد عن 85% فانا زعلت قاللي متزعلش انا عمري ما قولت لحد حاجه الا وطلعت صح كل ال توقعتلهم جت نتيجتهم زي ماقولتلهم
انت كنت عايز تدخل ايه اصلا؟روحت قولتله هندسه راح قاللي من غير زعل يعني لما انت هتدخل هندسه اومال مين اللي هيملى اداب وتجاره وخدمه اجتماعيه قاللي انت هتجيب 85% وبنت معانا ف الشارع اسمها سين مثلا هتجيب 98% وواحده تانيه هتجيب 99% عشان هم دول ال بيذاكروا
تصور انت الكلام دا نزل عليا بوقع صعب جدااااا منتهى الاحباط وقعدت تلات ايام بفكر في كلامه وانا محبط جدا ومبذاكرش وبقول هو ايه فايدة المذاكره يعني كنت مفترض ان كلامه خلاص واقع وكإن استغفر الله العظيم يعني ان ربنا ال كان بيتكلم معايا
بس بعدها بكام يوم اهلي اصروا عليا يعرفوا ايه ال حصللي حكيتلهم قالولي انت اهبل وسيبك منه وكدا

وذاكرت وكملت ونفضت للكلام دا والحمدلله جيبت 97% وال كان بيقول هو عنها انها هتجيب 98% جابت 85% وال كان بيقول هتجيب 99% جابت 90% واتضرب بكل كلامه عرض الحائط واديني اهو بكلمكم من موقعي في كلية هندسه هههههههه