اقتباس:
المشاركة الأصلية كتبت بواسطة خالد احمد زكريا
اليوم الخامس
كنا مستنيين نتيجه سنه 3 ثانوى ، طبعا أنا صاحى من الساعه 8 الصبح مستنى يطلع الأوائل عشان أعرف النتيجه حتظهر إمتى ، وطبعا ماسك فى إيدى الآله الحاسبه وكل شويه أحسب درجاتى تطله رقم مختلف عن إللى قبله ، المهم طبعا عمال أشغل نفسى بحاجات غريبه شويه أتصل بصحابى لدرجه إن واحد رد عليا وقال " نام يا غلس النتيجه الساعه 7 بليل وإنت بتصحينى 9 الصبح ، نام نامت عليك حيطه " المهم عمال أضيع فى الوقت شويه أدخل أصحى أخويا الكبير ، شويه أروح أزاول ماما لما إتخنقت منى ، المهم جبنا الكهربائى عندنا فى البيت عشان كان عندنا شويه حاجات عايزين نصلحها ، جبناه من الساعه 2 الظهر وإنشغلت معاه ورحت جبتله حاجته إللى عايزها وأعمل شاى وقهوه من كرم منى طبعا بس بحاول أجرى الوقت شويه ، المهم كنت قاعد مع بابا وماما ف الأوضه والكهربائى شغال ف أوضه تانيه ولقيت أخويا داخل عليا بيقولى بكل مكر " خالد ، تعالى كده معايا بيقولوا النتيجه ظهرت بس شكلها بتاعه سنه 2 " المهم رحت معاه من غير م بابا وماما يخدوا بالهم منى ولسه بحط رقم الجلوس جت الحاجه " بتعمل إيه يا ولا فى الخباسه " المهم حطيت رقم الجلوس وإذا ب enter ولقيت النتيجه ظهرت فعلا المهم ببص لقيتها 401.5 طبعا مصدقتش إن دى درجتى وبصيت تانى ع الاسم ورقم الجلوس وإتأكدت إنهم بياناتى ياااااااااه كانت الفرحه مش سايعانى ساعتها 401.5 دى درجه كبيره أوى وعمرها م طلعت معايا فى الآله وبدأت أنزل بالماوس على باقى الدرجات فإذا بصدمه إن المجموع ده من غير مستوى كمان " لا مش معقول دى درجاتك يا ولا بص على البيانات كويس " جمله ماما قالتها خلتنى أشك فى نفسى المهم قعدت أحسب الدرجات من غير مستوى لقيتها 401.5 فعلا وحسبت المستوى لقيتها 405.5 تقريبا قلبى كان حيقف ساعتها من الفرحه وسجدت لله شكرا ولقيت زغروووووووووطه من الحاجه خرمت ودانى ساعتها وطبعا البوس بقى والأحضان والفرحه وفجأه لقيت الحاجه بتقول " ياااااااااااااااااه ده الكهربائى عندنا " طلعنا لقيناه شغال فى حاله ، بس الصراحه كان يوم جميل جدا رغم صعوبته فى بيوت آخرى لكن صداه فى بيتنا كان بالفرحه
وإلى اللقاء فى يوم قادم ، إنتظرونا ....
( 5 )
بعتذر لأى حد قرا الكلام ده وتضايق أو إفتكر اليوم ده وزعل
الحياه لا تتوقف على نتيجه ثانويه عامه
|
الله على اليوم الجميل دة
ربنا يجعل ايامكوا كلها افراح يا رب
05-08-2012, 10:50 AM
العرض المتطور
