مش عيب نتعلم منهم

[vampire1188]

شعور حلو اوي منك ان يبقى قلبك على البلد لا وكمان بتحاولي انك توجدي اي حلول مع ان انتى عارفه كويس ان حلولك مش هاتوصل للجهات التنفيذية بس اهو اديكي بتشاركي ارائك مع الناس

بس اللى عايز اقولهولك ان المشكلة كلها في المنظومة كلها .. منظومة التعليم والصحة والشرطة والتربية الخ الخ الخ !!

وعشان تبتدي تصلحي في دا كله لازم تبتدي تربي الصغير وتربي الكبير كمان

الصغير سهل انك تربيه من وهوا صغير .. الكبير ماينفعش انك تربيه غير بالقانون وتديله فوق دماغه

لما تلاقي حد ماشي عكس ويقوم ملسوع في خمسينايه مخالفة ساعتها يتعلم الادب

لما بتاع ميكروباص يغلي الاجرة بلطجة والمرور يقفشه ويسحب منه الرخصة ساعتها يقول ان الله حق

اللي عايز اقوله ان الانسان المصري بطبعه كويس ومتعاون جداااااااا ودا بتحسيه دائما في الازمات

زي ايام كاس العالم تلاقي مصر كلهاااااااا بتشجع .. ايام الثورة تلاقي مصر كلهاااااااا بتهتف وكلنا واقفين جنب بعض

بس انا بتكلم في نقطة ان اه انا كمواطن كويس بس دا مش حاجة كفيلة تخليني مواطن صالح

بمعنى ان دلوقتى ربنا بيقولي صلي وصوم وزكي واعبدني وانا ادخلك الجنة وارضي عنك

اقوم انا ماعملش اي حاجة من الحاجات دي وابقى عايز اخش الجنة ولما ربنا يسألنى ازاى ادخلك الجنة اقوله يارب ما اصل انا كويس ونيتي كانت كويسة بس معلش !! ماينفعش طبعاااااااا

ليا اصدقاء في امريكا واستراليا بيقولولي لولا ان القانون هناك حازم وبيطبق على كل الناس كنت ساعتها لاقيت الشوارع خربانه والدنيا متبهدلة .. التحضر هناك جاي بسبب تطبيق القانون وبالتالى الالتزام بالقانون اتحول بدل ماكان انا بخاف اعارض القانون عشان ماتعاقبش بقى انا بنفذ القانون عشان انا اتأقلمت معاه وبقى هوا دا سلوكي الطبيعي

فهوا اولا واخيرا هيا مشكلة تطبيق قانون + تربية