ملتقى طلاب الصف الثالث الثانوى (علمى علوم) 2014

[lally adel]

المشاركة الأصلية كتبت بواسطة عبق الماضى2

السلام عليكم

وعليكم السلااام و رحمة الله و بركاته ..

ازيك يا دكتورة lally

الحمد لله انا كويسه .. تسلمى ..

انا بحبك جدا والله وبتابع كلامك من زمان

و انا بحبك اكتر

وجى الوقت اللى استغلك فيه (اختى الكبيرة طبعا)

طبعاااااااا ..برااااحتك .. انا تحت امرك ف اللى تعوزيه

انا بصراحة كنت عايزة اطنش الدروس السنة دى واذاكر لواحدى وهوضحلك الاسباب وياريت لو تنصحينى لانى خايفة اخد قرار واندم عليه


انا اولا مكنتش باخد دروس السنين اللى فاتت غير السنة اللى فاتت 2ث درس رياضة بس وانا علمى علوم

ثانيا حال البلد المتوتر وانا منتقبة فشكلى اخوان خالص وناس كتير اعرفهم بيضيقهم موضوع النقاب وكده
ونا قلقانة بصراحة ربنا يعديها على خير يارب ويصلح حال بلدنا لما يحب ويرضى

ثالثا المدرسين اللى قدامى كلهم مش جامدين يعنى مستواهم عادى والناس الجامدة مقفلة جرواتها من السنة اللى فاتت تخيلى

انا بقى كنت ناوية ان شاء الله اعمل النظام الاتى :


اتابع البرامج التعليمية على قنوات النيل

اتابع الدروس والمراجعات اللى على موقع كايرو دار ممتازة جدااااااا

اتابع برامج قناة الرحمة التعليمية

وانتظم فى المدرسة انا مدرسينى الحمد لله كويسين معايا

واشترى اكتر من كتاب فى كل مادة

العربى اجيب الامتحان والرسالة لو لاقيته او الاضواء

الانجليزى سبرايز وسينيور

الفرنش ميرسى وبرافو

الفيزيا الامتحان والمثالى اوالوسام اللى الاقيه

كيميا الامتحان والمثالى ومندليف

احياء الامتحان والاول

والجيولوجيا لسه معرفش حاجة كويسة فيها .

ياريت لو عندك اى تعقيب تقولى هولى واى نصيحة

وبصراحة انا بردو خايف احل غلط مين هيصحح لى الغلط لو استمريت عليه

وياريت لو تقوليلى دلي تقويم الطالب اجيبه منين واسعاره ايه وتفاصيل اكتر عن الشيئ المجهول ده

اصل مسمعتش عنه غير من هنا

بصى يا حبيبتى .. اولا احييكى جدا على تفكيرك و جرأتك .. انا اعرف بنوتة هنا على المنتدى كان اسمها yolanda تقريبا .. مكنتش بتاخد دروس .. و ما شاء الله عليها جابت بتاع 99% و كسور يعنى و تقريبا دخلت طب .. انا مش متاكدة اوووووى .. بس اللى اعرفه انها مكنتش بتاخد دروس و ان الحمدلله ربنا كرمها ..
شوفى يا ستى .. انا هرد على كلامك نقطة نقطة ..
اول حاجة انتى بتقولى انك مكنتيش بتاخدى دروس قبل كدة .. انا برضه مكنتش باخد دروس خااااالص طووووول عمرى .. المدرسين مدخلوش بيتي غير ف تانية ثانوى بس .. طول عمرى مقتنعه ان الدروس دى تضييع وقت و ان انا اقدر الم و اذاكر لوحدى و كدة .. و اتاكدت اكتر ف السنتين دول ان فعلا وجهة نظرى ف موضوع الدروس دة كان صح .. و انها فعلا مضيعه للوقت .. بس مقدرش انكر ان انا استفدت منها كتييير جدااا
تانى نقطة اللى هى النقاب .. بصى بجد ربنا يبارك فيكى انك اخدتى الخطوة دى على طول جدا .. ربنا يااااارب يثبتك و يقويكي و يحفظك " معلش بقى واحدة هتموت و تلبس النقاب و اهلهامش راضيين " .. ما تقلقيش من النقطة دى خاااالص .. انتى كلها سنة ان شاء الله و هتنزلى الكلية و هتبقى تقريبا كل يوم ف الشارع .. يعنى هتنزلى بالنقاب .. و اللى يكلمك حطى صباعك ف عينه .. محدش له عنددك حاجة .. انا بلبس ملحفة و خمار و محدش يقدر يقولى تلت التلاتة كام .. شيلي النقطة دى من دماغك خاااااالص .. مش هتحبسي نفسك ف البيت عشان انتى منتقبة و لا خايفة من حد ..
اما بالنسبة للمدرسين .. فمش مهم ان المدرس يكون جامد .. المهم ان المدرس يكون فاهم مادته و بتاع شغل .. و الاهم انه يكون بينزل لجان تصحيح .. و سبب ده هقولك دلوقتى ..

شوفى يا ستى .. قبل ما اقولك رأيي ف الجدول الجميل اللى انتى عاملاه ده .. انا بس حابة اوضحلك مميزات و عيوب الدروس .. عشان انتى تبقى حاطة كل حاجة قصادك ..
اولا العيوب .. زى ما قلتلك بتسرق وقت كتييير اووى .. اينعم الدرس بيبقى كله على بعضه ساعتين و لا 3 ساعات بالكتير بس برضه .. هتلاقيه سرق منك ما لا يقل عن 5 ساعات .. قبل و بعد الدرس ..
ثانيا لو اضطريتي تحطى درسين ف يوم واحد .. كدة اليوم دة اتضرب بالنسبه لك ف المذاكرة .. و لو ذاكرتى هتبقى حاجة بسيييييطة اوووووى ..

انا بالنسبة للمميزات بقى .. ف انا هقولك ده منواقع تجربتى انا الشخصية .. و خدى بالك .. تجربتى مع الدروس هتلاقيها مختلفة عن تجربة فلان عن تجربة علان .. لان كل واحد ظروفه مختلفة عن التانى من جميع النواحى ..
الدروس فادتنى ف ايه .. اول حاجة .. المدرس ملزم معايا بكل كلمه بحلها .. يعنى مثلا انا ف سنة تانية حليت ف الانجلش 7 كتب مراجعه و شرح على بعض .. غير دليل التقويم و ملازم المس و الكلام ده .. عايزة اقلك ان المس مصححالى ال 7 كتب .. سؤال سؤال و نقطة نقطة .. ف دة مش قادرة اقلك فادنى اد ايه
تانى حاجة انا كنت داخلة تانية ثانوى مثلا شايفة نفسي كويسة ف الانجلش على سبيل المثال .. لانى زى ما قلتلك مكنتش باخد دروس خااالص قبل كدة ف كنت انا بالنسبة لنفسي طالب و استاذ و اب و ام و كل حاجة .. ف كنت شايفة نفسي كويسة فيه يعنى او مستوايا مش بطال .. اول ما المساشتغلت معايا ف اول السنة .. صدمتنى بحقايق كتييييييير جداا كانت غايبة عنى .. و نقط ضعف كتييييير جدااا فيا انا مكنتش واخدة بالى منها .. و بدات تعالج معايا نقطة نقطة منهم " على فكرة انا جايبة 25 من 25 ف الانجلش ف السنتين الحمد لله " مع ان المس ف اول سنة تانية دى قالتلى انتى لو فضلتى على كدة ماتجيبيش اكتر من 20 .. اللى اقصده من دة ايه .. ان ممكن تكون نظرتك انتى لنفسك خداعه .. دة بسبب نقص الخبرة و ان انتى مابتقارنيش نفسك بحد .. لكن المدرس بقى .. هيقارنك بكل الطلبة اللى مرو عليه طووووول عمره .. هيعرف يحدد نقط ضعفك كويس اوووووى ... و كمان هيقولك تعالجيها ازاى .. و هيبقى فوق دماغك .. دة طبعا بسبب الخبرة اللى عنده و انه ياما ورد عليه ..
الحاجة التالتة اللى استفدت منها ف الدروس ان كل المدرسين اللى كانو معايا من بعد ما خلصت المنهج و بدات ف المراجعه كدة بداو يركزو كل شغلهم معايا على ازاى احل ف كراسة الاجابة .. عشان كدة قلتلك لازميكون مدرس بينزل تصحيح .. بيبقى عارف لجنة التصحيح بيحصل فيها ايه .. بيتبص على ايه و بيتعدى ايه .. طب لو شكيت ف اجابتين اعمل ايه .. طب ايه اول سؤال اعمله ف الامتحان .. طل سؤال زى التعريفات مثلا احله ازاى .. و انا قلت سؤال التعريفات بالذاااااااات لان ده اكتر سؤال عذبنى ف السنتين بتوعى ..
انا كنت طول عمرى مقتنعه بفكرة روح الاجابة .. انى ماشي هحفظ الكتابة و كده بس هكتبها باسلوبى .. لجنة التصحيح و نموذج الاجابة مفيهومش الكلام ده .. و التعريفات بالذات لااازم تبقى محفوظة صم زى كتاب المدرسه .. حتى لو حستيها تقيلة .. المعلومة دى عرفتها من المدرسين ف الدروس .. مش كدة و بس .. لادول كانو بيتابعو اجابتى بقى من امتحان لامتحان .. انا كان ممكن احفظ نص التعريف زى كتاب المدرسة و اكتب بقيته باسلوبى و اشوف ده انجاااااز و انا كدة بت مفيش منى .. هم بقى اللى كانو بيكسرو الحتة دى .. لا كدة مش مظبوط .. لا احفظى عدل .. لا اتكى ع النقطة دى .. و خدى بالك 90% من امتحانك ف معظم المواد العلمية " كيميا - فيزيا - احياء - جيولوجيا " معتمد على اللى بقلك عليه ده ف المذاكرة اللى هو انك تظبطى اجابتك على كتاب المدرسه .. و ف نفس الوقت كانو بيقلولى على فنيات الامتحان .. يعنى انا منساش مستر الكيميا لما كان يتخانق معايا عشان انا كنت اعمل مثلا انبوبه الاختبار على شكل زاوية قائمة بالمسطرة .. ويقولى التنيه دى لازم تعمليها بايدك عشان لو خليتى الزاويه باينة كدة ينقصك عليها نص درجة .. تخيلي بقى بيتلككو على ايه ف التصحيح !!! و احنا ف عرض النص درجة
الحاجة الاخيرة ان انا كنت باخد ساعه من بداية كل حصه ف كل المواد تقريبا اسئلة بس .. انا اللى بسال المدرسين .. دى معرفتهاش و دى مفهمتهاش و دى انا عارفة اجابتها بس مش عارفه اصيغها ازاى .. و الاسئلة دى هى اللى نفعتنى فالامتحان ..
كمان .. كنت حتى لو حاسة انى كسلت .. تعبانة .. مليش مزاج للمذاكرة .. افتكر على طول ان عندى درس بكرة .. اقعد زى الجزمة ع الكتاب ماتنقلش الا لما اخلص اللى ورايا .. فلولا كدة الله اعلم كان ممكن يحصل ايه

انتى بقى الجدول اللى انتى عاملاه ده ممتااااز جداااا .. بس انا مش عارفة انتى جربتى تتفرجى ع الحاجات دى قبل كدة و لا لا .. يعنى انتى مستوعبة فكرة ان البرامج التعليميه دى تجيب شلل اطفال من اسلوب الشرح العقيم اللى بيستخدموه .. مستوعبه فكرة انهم بيخلصو المناهج متاخر جدااااااا .. لانهم بيشرحو كل حلقة بتاع صفحة و لا صفحتين عشان وقت الحلقة ؟؟ .. انا كنت اتفرجت قبل كدة على الفيزيا من قناة الرحمة .. هو حلو و كل حاجة .. بس محبتوش اووى .. حسيته بيدخل الدنيا ف بعضها .. كل حاجة عليها مثال واحد بس .. معرفش ان كان عيب مدرس و لا هو مضطر يعمل كدة عشان الوقت الله اعلم

خليكي عارفة حاجة كويسة اوووووى .. اللى انتى عايزة تعمليه ده مخاااطرة و مغامرة كبيرة و كبيرة اووووى كمان .. و انتو كمان عندكو الغلطة بفورة .. يعنى احنا كنا اللى مايظبطش نفسه ف تانية عنده فرصه يلحق نفسه ف تالتة .. لكن انتو مفيش الكلام دة عندكو
م الاخرررر كدة عشان انا عارفة انى طولت عليكى و انى رغاااية ااااووووى
انا شايفة انك لو مخدتيش دروس هتبقى مغامرة كبييييرة اووووى .. و مخاطرة مش محسوبة .. انا شايفة انك ممكن تاخدي دروس عادى بس تحاولى تنظمى وقتك بحيث انها ماتبقاش على مدار الاسبوع .. بحيث انك تفضي لنفسك وقت على اد ما تقدرى للمذاكرة .. بس لو اخدتى دروس و مش هتستفادى من و لا نقطة من اللى انا اتكلمت فيهم دول يبقى قلتها احسن

دليل التقويم بتجيبيه ف شهر 2 كدة تقريبا او 3 .. هتلاقيه ف المدرسة او ف قطاع الكتب عندك .. مهم اووووى على فكرة و لازم تجيبيه

يلاااا يا حبيبتى الله معك .. و لو احتاجتى حاجة او عايزة تستفسري على اى حاجة انا ف الخدمة