سؤال قد يكون من المستحيل الاجابه عليه

[Baskoota]

السلام عليكم ورحمة الله
اولا شكرا ليك لطرح الموضوع دا لانه فعلا مهم جدا وخصوصا انكم لسا داخلين على مرحلة جديدة وهي الجامعة وانا لسا في اولى كلية وداخلة تانية ان شاء الله لكن برغم كدا وبرغم اننا في طب بشري يعني المتوقع ان الطلبة يكونوا صفوة زي ما بيقولوا لكن برغم كدا كنا بنشوف مهازل (ربنا يعافينا واياكم)

اولا طبعا في السن من 14 تقريبا كدا لحد 20 ودا بيشمل المرحلة الثانوية واغلب سنين الجامعة
عقلنا مش بيكون مكتمل النضج
مش هقول كلنا لكن الغالبية
وطبعا احنا عارفين ان الفترة دي فترة مراهقة وانت نفسك مش بتبقى عارف انت عايز ايه
واغلب الحجات اللي بتعملها انهردة بتندم عليها بكرة او بعد ساعة

والمفاجأة بقى ان مفيش في الفترة دي حاجة اسمها ( حب )

واتحدى اي حد يثبت لي عكس ذلك

ممكن الولد او البنت يكون فاكر نفسه انه بيحب وطبعا مش ممكن ابداااا حد يقنعه بعكس ذلك لان مراية الحب عمياء وطبعا بيقبى سهران طول الليل وبيفكر والتهييس دا كله

لكن لو قعد يفكر بعقله 5 دقايق بس
هيقول ايه الهبل اللي انا بعمله دا؟؟؟

انا هقولكم على مقولة قالتها واحدة عزيزة عليا جدا وانا بصراحة عجباني قوي

قالت ان فيه مكان في قلبي للي انا هحبه
المكان دا مفيش حد هيدخل فيه غير اللي انا هرتبط بيه شرعيا.......وطبعا دا مش هيكون واحد زميلها ولا واحد صاحبها ولا بوي فريند
لاهو هيكون انسان محترم دخل من الباب وطلبها من اهلها
هتقولي طب وانا لسا مش هقدر ادخل بيت دلوقتي وانا بحبها ومش هقدر اعيش من غيرها و....و....و.....
هقولك متنساش ان مفيش انسان بيسيب حاجة علشان ربنا الا وربنا يبدله خير منها

اقولكم حكاية واقعية حصلت فعلا تلخص الكلام اللي بقوله والحكاية دي حصلت لبنت اعرفها
كانت بتحب ولد جدا وكانوا مرتبطين من ايام الكلية
وكانت قصة حب الكل بيحكي عنها
المهم البنت دي التزمت وسابت الولد دا ولبست النقاب وطبعا كان صعب عليها جدا انها تسيبه
وهو كمان التزم دينيا وسابوا بعض وكل واحد ميعرفش حاجة عن التاني حتى ميعرفش ان التاني سابه من اجل الالتزام
بعد كدا البنت دي جالها عريس.....هي كانت طبيبة
وطبعا العريس زميل اخوها تعرف عليه من المسجد والكل كان بيحكي عن خلقة ودينه
المهم جه ميعاد الرؤية الشرعية و تلاقي البنت ان العريس دا هو الولد اللي كانت مرتبطه بيه
طبعا هما الاتنين ممسكوش نفسهم من الضحك للصدفة الغريبة دي وتزوجوا وما شاء الله ربنا رزقهم بالذرية الصالحة

طبعا انتو فاهمين انا عايزة اقول ايه

يمكن انا خرجت عن الموضوع الاساسي

انا عايزة اقول جملة كدا في السريع
اي ولد في الدنيا بيمشي مع بنت ويرتبط بيها اعلموا تماما انه بيبصلها بإحتقار حتى لو كان بيحبها دلوقتي
بعدين هيكرهها ويبعد عنها

اعتذر للاطالة

والسلام عليكم ورحمة الله

سبحانك اللهم وبحمدك اشهد ان لا اله الا انت
استغفرك واتوب اليك