لأنك غالية ( نصائح للأخت المسلمة بلهجة عامية بسيطة )

[abomokhtar]

وعد العيون: (الحب من أول نظرة).
سمعنا كتير وقرينا كتير عن الحب من أول نظرة، ومشاكل كتير بتجيلنا عن الموضوع ده؛ ومنها:
بنت بتسأل وتقول: "أنا كنت فاكرة إن مفيش حاجة اسمها حب؛ لغاية ما في يوم قابلت واحد، وفـي ثانية واحدة حالي اتغير! شوفته ومش عارفة إيه إللي حصلي؟ قلبي قعد يدق يدق جامد.. وحسيت إن هو ده الشخص المناسب لي، حسيت إنى أعرفه من زمان جداً جداً، حسيت إنه مش مجرد إعجاب عادي وخلاص..

أنا مش عارفة هو بيبادلني نفس الشعور ولا لأ؟ وخايفة أروح أصارحه بشعوري لأحسن أخسره! وفي نفس الوقت نفسي أروح أقوله إني بحبه؟ أنا تعبت من التفكير! هل أنا عايشة فى وهم؟ ولا فعلاً الحب من أول نظرة حاجة حقيقية؟".

* وبنت تانية بتقول: "أنا عندي مشكلة وعاوزة أعرف رأيكم، أنا فيه واحد معايا في الشغل لاحظت نظراته لي، وغصب عني بدأت أنا كمان أبادله النظرات، وبدأت أفكر فيه وأتشد إليه وأحس إني بحبه! أنا تعبانة جداً ومش عارفة أعمل إييييييه؟".
تعددت الأسئلة والحكـايات والمشكلة واحدة!
والسؤال هو: يا ترى فعلاً في حاجة اسمها حب من أول نظرة؟
هقولك: مفيش حاجة اسمها حب من أول نظرة!
وطبعا هتردي علي وتقولي: أنت إزاي تقولي كده؟ أنتِ إنسانة عديمة المشاعر!
أنتِ تفهمي إيه في الحب علشان تحكمي بالشكل ده؟!
إنتِ لو جربتي يعني إيه حب من أول نظرة، مكنتيش قولتي الكلام ده..!

هقولك يا أختي: ده مش كلامي أنا بس؛ ده كلام خبراء علماء النفس والأساتذة الدكاترة العرب والأجانب كمان! علماء النفس بيقولوا: "إن الحب من أول نظرة ده عبارة عن إحساس سريع عند الإنسان بالانجذاب لشخص معين، لم يسبق له لقاؤه.."، يعني الموضوع عبارة عن إعجاب من أحد الطرفين أو كلاهما، وانجذابه له بشكل غير طبيعي نتيجة إعجابه بأحد صفاته؛ زي المظهر، القوام، ملامج الوجه، إبتسامته، نظراته، لون عينيه، طريقة كلامه، تصرفاته.. وهكذا..

شوفي الكلام ده :"أكد فريق من الباحثين في جامعة فلوريدا الأميركية في أول تفسير علمي لظاهرة الإعجاب المفاجئ، أن هناك أشخاصًا يتمتعون بجاذبية الوجوه والأشكال، بحيث يشدون أنظار الناس إليهم ويقعون في حبهم من أول نظرة، وقد أرجع جون مينر الأستاذ المساعد في علم النفس في الجامعة -الذي أشرف على الدراسة المنشورة في مجلة Journal of Personality and Social Psychology- السبب وراء هذا الإعجاب المفاجئ إلى أن هـذا الأمر أشبه بجذب مغناطيسي! إلا أنه يتم على المستوى البصري فقط!

كما شرح مينر أن الإعجاب يأتي على رأس قائمة التغيرات الكثيرة التي تطرأ على حياة الناس دون أن يشعروا بها، ويسعون جاهدين لإيجاد التفسير العلمي الصحيح له، ومن بينها ما يعرف بـ(الحب من أول نظرة)، وتأتي هذه الحالة عادةً عندما تقع العين على شخص ما، فيُعجب بإحدى صفاته".

يعني الموضوع إن ربنا سبحانه وتعالى خلقنا على وجود ميل فطري طبيعي بين الذكر والأنثى..
وفي ظل فترة المراهقة البنت بتبدأ تكبر وتتغير جسمانياً وعاطفياً، ويبدأ قلبها ينبض بالفطرة..
وفي ظل البيئة والعصر إللي إحنا عايشين فيه، والكم الرهيب من المسلسلات والأفلام والأغاني إللي بتتكلم عن الحب ومش وراهم غيره..

بتبدأ البنت ترسم في خيالها صورة لفارس أحلامها إللي هتعيش معاه قصة الحب المنتظرة،وتتخيل نفسها إنها بطلة كل فيلم شافته وكل أغنية سمعتها، وفي ظل وجود الفراغ العاطفي الرهيب، بتبقى نفسها إن أي حد يملأ الفراغ ده، نفسها حد يهتم بيها ويحسسها بأنوثتها، إلى جانب ظروف الاكتئاب إللي بتبقى البنت عايشاها في البيت ومشاكله، والمذاكرة وهمومها، وإخواتها.. إلخ..

فـأول ما البنت بتقابل شخص تحس فيه جزء من الصورة إللي رسمتها في خيالها؛ بتبدأ تلقائياً تنجذب ليه بكل مشاعرها وأحاسيسها! والبنت بتفضل عايشة الحلم أو بمعنى أدق (الوهم) لحد ما تتخطب وييجي حد يملأ الفراغ العاطفي إللي عندها أو تعقل وتنضج وتفوق! هتقولي: ده مش وهم! هقولك لا ده وهم وهتعرفي ليه هو وهم يا غاليه..

[abomokhtar]

بعد ما إتكلمنا عن الحب من أول نظرة قلتي إن الأحاسيس دي مش وهم..
هقولك: ومين قال إن الوهم بيبقى وهم فى قلب صاحبه؟!
الوهم شيء مش حقيقي؛ لكنه حقيقي وواقع عند إللي مُصاب به..

زي السراب! الإنسان العطشان لما بيبقى ماشي في الصحراء، بيشوف وكأن فيه مياه قدامه.. وبيبقى متأكد وشايف إنها واقع وحقيقة، ولكنها فعليًا وهم! وده نفس إللي بيحصل مع البنت إللي نفسها تحب وتتحب و(عطشانة عاطفياً).

هتقولي: أنا لسه برده مش مقتنعة!
هقولك جاوبي على السؤال ده علشان تتأكدي إنك انجذبتي له واتعلقتي به على مستوى البصر..
إزاي الواحد يحب حد ما يعرفوش؟ مش لازم الأول يعرف شخصيته وأخلاقه وعاداته.. مش هي دي الحاجات إللي بتتحب؟ وده إللي بتكتشفيه فعلاً بعد فترة لو بدأت علاقة ما بينكم، بتحسي إن فيه حاجة غلط؟ هو أنا حبيته ليه؟ مش ده الشخص إللي أنا كنت عايزاه!

وعلشان كده معظم علاقات الحب من أول نظرة -إن لم يكن كلها- بتنتهي بالفشل!
شوفي الكلام ده كمان، الكاتب الأمريكي (أريك جودمان) قال بعد إجراء بحث ميداني على مجموعة كبيرة من الشباب من ال***ين في المدارس الثانوية، وبداية المرحلة الجامعية في نيويورك: "أن الانطباع القوي الناجم عن اللقاء الأول بين الفتاة والشاب، والذي يطلق عليه الكثيرون اسم الحب من أول نظرة، يكون خداعاً في أغلب الأحوال"!

هتقولي: طيب الحل إيه؟! هقولك: الحل إنك بعد ما عرفتي حقيقة الحب من أول نظرة، لازم تفوقي من الكابوس إللي إنت معيّشة نفسك فيه، كفاية ***** في نفسك! لحد إمتى هتفضلي معلقة قلبك به؟ لحد إمتى هتفضلي تبصيله ويبصلك؟! ليه مش عايزة تلتزمي بأمر ربنا إللي أمرنا جميعاً ولاد وبنات بغض البصر..

قال تعالى: {قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ . وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا} [النور:30-31]، وإنتِ لو بتغضي بصرك من الأول مكنتش المشكلة إتوجدت من الأصل، ومكنش قلبك إتعلق بيه، وعلشان كده غض البصر أهم حل لمنع وعلاج مشكلة الحب من أول نظرة! ولو متعلقة به ومش قادرة تنسيه كملي قراية وهتعرفي الحل إيه.

[abomokhtar]

لما تيجي تسأل البنت: يا بنتي ليه بتعملي كده في نفسك؟
ليه ترخصي نفسك للدرجة دي؟
تقولك: ما هو كل البنات بتحب! إشمعنى أنا؟

وبنات تقول: أنا بحبه حب غير عادي وهو كمان بيموت في إحنا حبنا غير أي حب تاني!
وهي دي الكلمة إللي بتغيظ الواحد أوووي "حبنا غير أي حب تاني".
يعني إيه حبكم غير أي حب تاني؟ حب جاي من المريخ يعني؟ يعني إيه الكلمة دي؟ عايزكِ تردي علي؟

هتقولي: مش عارفة.. بس ده إحساسي! وأنا إحساسي مبيخيبش أبداً!
وإحنا بنحب بعض بجد؛ الحب الحقيقي إللي هو بيعيش يا حبيبي!
وهو واعدني بالجواز وإننا مش هنفترق أبداً مهما حصل! وأنا بحس وأنا قاعدة مع حبيبي إني في دنيا تانية!
أنا مش بقدر على فراقه ولو لثانية واحدة! أنا حياتي من غيره ملهاش طعم!

هقولك: وهو إنتِ عارفة يعني إيه حب الأول؟ علشان تحكمي إن ده حب حقيقي والكلام ده كله، هو الحب إنه يقعد بالـ5، والـ6 ساعات يقولك كلام حلو يخليكي طايرة في السماء؟ هو الحب إنكم تخرجوا مع بعض ويمسك إيدك، وتدخلوا سينما وتتمشوا على الكورنيش؟ هو الحب إنه يجيبلك قلب أحمر ودبدوب أحمر، وبوكيه ورد أحمر يوم الفالنتين ؟
هو الحب إنه يرن لك 60 مرة في الدقيقة ومينامش قبل ما يسمع صوتك، وأول ما يصحى يبعتلك مسدج يقولك صباح الفل ياروحي! هو ده الحب؟!

هو ده الحب في نظرك؟ مين إللي وصل لك المعنى ده؟ الأفلام والمسلسلات، والأغاني وقصص الحب وروايات الغرام؟ هو كلام الأفلام والمسلسلات والأغاني كلام مُقدّس بناخد منه أحكامنا وبنبني عليه حياتنا! فوووووووقي بقى! ده لو بيحبك بجد كان خاف عليكِ!

هتقولي: ده بيخاف عليا من النسمة الطايرة!
هقولك: كدب × كدب وتمثيل × تمثيل!
لو بيخاف عليكِ بجد كان خاف عليكِ من نار جهنم إللي بيحطك فيها بإيديه، بكل مكالمة بيكلمها لك، وكل وقفة بيقف فيها معاكي، وكل مرة بيمسك فيها إيدك! لو بيخاف عليكي بجد كان على الأقل خاف عليكِ زي ما بيخاف على أخته! فوقي بقى.

[abomokhtar]

و بيخاف عليكِ بجد كان على الأقل خاف عليك زي ما بيخاف على أخته!
أصل حبيبك ده لو شاف أخته بتكلم ولد أو ماشية مع ولد ممكن ي***ها!
ومع ذلك بيكلمك ويخرج معاكي وبيطلب منك إنه يلمسك و..... و...!

أحد زمايلنا بيحكي ويقول: "كان فيه شاب قاعد مع بنت في الكلية، وطبعاً كانوا قاعدين وعايشين الدور، وعدت دكتورة جامعة من قدامهم، فنظرت لهم الدكتورة، ووقفت قدامهم، وقالت للشاب: أستحلفك بالله، لو البنت دي أختك، ترضى إنك تشوفها قاعدة القاعدة دي مع أي ولد؟ الشاب اتخض من السؤال وبدأ يفكر هيقول إيه؟ والبنت اللي معاه قاعدة منتظرة إنه يرد على الدكتورة ويثأر لكرامتها، ويبين لها صدق حبه لها، رد الشاب وقال للدكتورة بكل ثقة ووضوح: طبعاً لأ..! بكل صراحة مرضاش إن أختي تكون في الموقف ده!

ياااااااه لو تتخيلوا إحساس البنت في الموقف ده! إحساس فظييع بالمررارة، إحساس إنها لا شيء ولا تساوي أي شيء عند أقرب الناس إليها، عند الشاب إللي كانت مفكرة إنها كل حياته وإنه كل حياتها! إحساس بإنها رخييييصة أووووي! ونظرة الدكتورة ليها خليتها تشعر بأن مفيش شيء في الدنيا يستاهل، ليه تعملي كده في نفسك؟ في اللحظة دي البنت اتجرحت جرح صعب إنه يلتئم، وبصت لحبيبها وقالتله: إنت متعرفش أنا بستحقر نفسي إزاي دلوقتى! وسابته ومشيت"!

يا أختي والله العظيم الشاب إللي إنتِ بتحبيه ده وفاكرة إنه بيحبك ومستعد يضحي بالدنيا علشانك هيتبرأ منك ويهرب منك يوم القيامة! قال الله تعالى: {إِذْ تَبَرَّأَ الَّذِينَ اتُّبِعُوا مِنَ الَّذِينَ اتَّبَعُوا وَرَأَوُا الْعَذَابَ وَتَقَطَّعَتْ بِهِمُ الْأَسْبَابُ} [البقرة:166]. هتتحايلي عليه يديكي حسنة واحدة يوم القيامة مش هيرضى! هتتحايلي عليه يشيل عنك سيئة مش هيرضى!

راح فين الحب إللي بينكم؟ بعد ده كله لسه هتقولي برده بحبه؟
طيب هسألك شوية أسئلة وعايزة إجابة صريحة منك: يا ترى لو النبي صلى الله عليه وسلم دخل عليكِ وإنتِ بتكلميه، هترضي تكملي كلامك معاه وتقولي للنبي بكل فخر ده حبيبي يا رسول الله مش حد غريب؟! يا ترى لو النبي صلى الله عليه وسلم شافك وإنتِ واقفه معاه هتجري عليه وتقولي له يا رسول الله تعالى أما أعرفك على الشاب اللي أنا بحبه؟!

يا ترى كل كلمة بتقوليها له وكل نظرة بتنظريها له بيكتبها ملك الحسنات ولا ملك السيئات؟!
يا ترى لو ملك الموت قبض روحك وإنتِ قاعدة معاه أو بتكلميه في التليفون، أو على النت، يا ترى دي هتكون حسن خاتمة ولا سوء خاتمة؟ لسه برده مش عايزه تسيبيه؟

[abomokhtar]

لسه برده مش عايزه تسيبيه؟ مش لما بتكلميه بتبقى موطية صوتك وخايفة لاحسن حد يسمعك؟
مش لما بتيجي تنزلي تقابليه بتبقي بتستخبي لاحسن حد يشوفك من أهلك أو قرايبك؟!
يعني إنتِ كده من إللى ربنا قال عنهم: {يَسْتَخْفُونَ مِنَ النَّاسِ وَلَا يَسْتَخْفُونَ مِنَ اللَّهِ وَهُوَ مَعَهُمْ إِذْ يُبَيِّتُونَ مَا لَا يَرْضَى مِنَ الْقَوْلِ وَكَانَ اللَّهُ بِمَا يَعْمَلُونَ مُحِيطًا} [النساء:108]ـ

بتخافي من الناس وتستخبي منهم، وربنا أحق إنك تخافي منه وتتقيه وتخشيه!
صحيح محدش شافك؛ بس ربنا هو الخبير البصير، صحيح محدش سامعك؛ لكن ربنا هو السميع العليم..
خــــلّــي بــالك إنتِ كده لو بتصلي وبتصومي وبتتصدقي ولكن بتكلميه من ورا الناس، بتعرّضي نفسك إن حسناتك كلها تتنسف يوم القيامة ويبقى: رصيدك من الحسنات= صفر.

عن ثوبان رضي الله عنه عن النبي صلى الله عليه وسلم أنه قال: «لأعلمن أقواماً من أمتي يأتون يوم القيامة بأعمال أمثال جبال تهامة بيضاء، فيجعلها الله هباءً منثوراً»، قال ثوبان: "يا رسول الله صفهم لنا حتى لا نكون منهم ونحن لا نعلم؟ قال صلى الله عليه وسلم: «أما إنهم إخوانكم ومن جلدتكم، ويأخذون من الليل كما تأخذون؛ ولكنهم قوم إذا خلوا بمحارم الله إنتهكوها»" (صححه الألباني).

إنتِ عارفة الكلام ده يعني إيه؟ يعني إنتِ واقفة يوم القيامة وبتنظري في أعمالك لقيتي عندك جبال حسنات، وحسنات بيضاء كمان، صلاة على صيام على صدقة على بر والدين على عطف على الفقراء والأيتام والمساكين، جباااااااااال حسنات وإنتِ واقفة بعد ما شوفتي حسناتك وتأكدتي إنك برحمة ربنا هتدخلي الجنة تلاقي ربنا بيقول: {وَقَدِمْنَا إِلَى مَا عَمِلُوا مِنْ عَمَلٍ فَجَعَلْنَاهُ هَبَاءً مَنْثُورًا} [الفرقان:23].

فيــــــن الحسنات؟! كله راح.. مفيش ولا حسنة واحدة!
ليــــــــه كده؟ ده أنا كنت بصلّي وأصوم وأقرأ قرآن! لأنهم: «إذا خلوا بمحارم الله إنتهكوها»، خافي على حسناتك يا أختي!

[abomokhtar]

لسة مش مقتنعة؟ هتقولي بس أنا مش بكلمه من ورا أهلي..
أنا قولت لماما وهي عارفة كل إللي بيحصل بينا وموافقة إني أخرج معاه وأتكلم معاه!
هقولك: كون إن مامتك عارفة وموافقة وراضية مش مُبرر إن العلاقة دي صح وتمام!
أهم شيء ربنا راضي عن ده ولا لأ؟ طبعاً لأ..

وحتى لو كانوا أهلك عارفين! فهما مُجبرين على كده لأنك نقطة ضعفهم، حبهم ليكِ طغى على كسرة قلبهم عليكِ! فاكرين إنهم بكده بيسعدوكِ ما دام شايفينك سعيدة ظاهرياً! لكن الفطرة بتقول إن كل أب وأم بيتمنوا إن بنتهم تعيش حياة زوجية شرعية، يفخروا بيها قدام الكل!

ده غير إن إنتِ بخروجك معاه أو وقفتك معاه في أي مكان بتجاهري بالذنب قدام الناس!
والنبي صلى الله عليه وسلم بيقول: «كل أمتي معافى إلا المجاهرون» (صحيح البخاري:6069)، ده غير إن إنتِ بخروجك معاه بتفتني الشباب والبنات الغلابة في دينهم! وربنا بيقول: {إِنَّ الَّذِينَ فَتَنُوا الْمُؤْمِنِينَ وَالْمُؤْمِنَاتِ ثُمَّ لَمْ يَتُوبُوا فَلَهُمْ عَذَابُ جَهَنَّمَ وَلَهُمْ عَذَابُ الْحَرِيقِ} [البروج:10].
بعد كل إللي قرأتيه ده لسه برده مش عايزة تخافي على نفسك؟

[abomokhtar]

لسة مش عايزة تخافي على نفسك؟
هتقولي: بس ربنا رب قلوب وأنا قلبي أبيض، وإحساسي بيقولي إن علاقتنا دي مش غلط!
هقولك: هو الحلال والحرام بقى بالأحاسيس اليومين دول؟ وبعدين ربنا رب قلوب آه، بس تعالي نكمل الحديث مع بعض..

قال رسول الله صلى الله عليه وسلم: «إن الله تعالى لا ينظر إلى صوركم وأموالكم، ولكن إنما ينظر إلى قلوبكم وأعمالكم» (رواه مسلم)، يعني ربنا رب قلوب وأعمال في نفس الوقت.. وإللي قلبه أبيض وزي الفل، أكيد ده هينعكس على أعماله ومش هيعصي ربنا صح ولا لأ؟

أصل ممكن يبقى واحد مظهره ملتزم لكن باطنه غير كده، المنافقين كانوا كده..
إنما ما ينفعش يبقى واحد باطنه كويس وظاهره وحش! لأن الباطن لما بيبقى كويس بـيبان على الظاهر، وزي ما العرب بيقولوا في المثل: "كلُ إناءٍ ينضح بما فيه"، وتعالي شوفي الحديث ده كمان علشان تعرفي قلبك أبيض ولا لونه إيه بالظبط؟

قال رسول الله صلى الله عليه وسلم: «تعرض الفتن على القلوب كعرض الحصير عوداً عوداً، فأي قلبٍ أشربها نكتت فيه نكتة سوداء، وأي قلب أنكرها نكتت فيه نكتة بيضاء؛ حتى يصير القلب أبيض مثل الصفا لا تضره فتنة ما دامت السموات والأرض، والآخر أسوداً مربداً كالكوز مجخيًا لا يعرف معروفاً ولا يُنكر مُنكراً إلا ما أشرب من هواه» (صححه الألباني)، مربداً: يعني بياض قد خالطه سواد، مجخيًا: يعني مقلوباً منكوساً.

يعني إيه الكلام إللي في الحديث ده؟
يعني كل كلمة بينك وبينك الشاب إللي بتحبيه نقطة سودة على قلبك..
كل نظرة بينكم نقطة سودة على قلبك.. كل (ميسد)، كل (مسدج)..
كل مسكة إيد، كل ده نقط سودة على قلبك، يا ترى قلبك بقى شكله عامل إزاي دلوقتي بعد كل السواد ده؟