دفعه ثانويه عامه 2015

[الشاعر الطبيب]

بسم الله الرحمن الرحيم
اولا العربى
فرع التعبير ....... حاول تقرأ مواضيع مكتوبة و محلولة كان فى كتاب اذكر اسمه المعلم ده جايب كل مواضيع الثانوية العامة السابقة و مجاوبها بطريقة سهلة حاول تجيبه وتقرأه ولو عرفت تكتب موضوع كل اسبوع يبقى كويس و ان لم تستطع فلا يكلف الله نفسا الا وسعها وخلى بالك ان فى التصحيح ممكن تقفل الموضوع بسهولة يعنى انا قفلت التعبير فى امتحاننا بانى حاولت الترم بعلامات الترقيم و الجمل الحلوة فى البداية و النهاية الحشو فى النص مش مهم اوى وعلى رأي المثل اعمل صينية بسبوسة و احشيها طرشي :]

فرع القصة .....هى تقريبا 22 فصل لغوا من عليكم الجزء التالت اعتقد ...فى رأيي حاول تقرأ كل اسبوع فصلين و حط من دماغك كام سؤال مهم بس كده وفي اخر السنة انت تقريبا هتحتاج 3 شهور وهتبقى مش مزنوق و مرتاح جدا وفى الاخر هتدخل على موقع الاستاذ مدحت فودة عامل ملخص لاسئلة القصة و اجابتها النموذجية بص عليها وخلاص سؤالها بيقى سهل فى معظم الاحيان

بالنسبة للقراءة انت عندك 8 دروس احلى حل ليهم طريقة السؤال و الجواب بس انت اللى تطلعهم بعد ما تقرأ الدرس كويس جدا عشان سعات بتلاقى الاجابات متوزعة على الدرس كله مش ورا بعض خلى بالك كويس اقرأها من كتاب الوزارة او اى كتاب تانى زي ما تحب

بالنسبة للنصوص اهتموا جامد بكتاب الوزارة التعليق اللى فى الخر ده مهم جدا الاسئلة بتيجى منه بالنص مفيش حرف بييجى زيادة ابعدوا عن كتاب الاضواء فى النصوص الوزارة و بس .....نيجي لجته مهمه جدا وهى اكيد قلقاكم انه فى سؤال المرادفات يجيب كلمه و ليها كذا اختيار كلها شبه بعض و الحل للنقطة دي انك لازم تجرب كل كلمة فى سياق الجملة ممكن كل الكلمات تكون صح ولكن فى اجابة هى الاكثر صوابا بينهم تحتاج دقة فقط ...طبعا الشرخ سهل من اي كتاب او مذكرة استاذكم ...وكذلك البلاغيات اكرر لتانى مرة التعليق مهم جدا

نيجيى للادب و ده هنتعامل معاه زي القراءة سؤال وجواب بس الفرق ان مرجعنا فى الادب كتاب الوزارة بس ابعدوا عن المذكرات شوية فى الادب كتاب الوزراة كافى جدا و نصيحة من اخ ليكم حاولوا لو فى استشهاد ولو بيت واحد تكتبه و ده بيخلى المصحح يقوم يرقص من الفرح اه والله زي مابقولك كده

البلاغة دى امرها سهل تعرف اساسياتها من اي كتاب و تحل قطع من امتحانات سابقة كافي جدا زى كتاب الامتحان بتاع المراجعة

النحو هتعرف اهم النقاط فيه و تحل قطع من كتاب الامتحانات بتاع المراجعة يكتاب الامتحان اقصد فيه قطع كتير و حلوة حلوا اللى تقدروا عليهم لوكل يوم قطعة واحدة بس هيكون كافى جدا و كل استاذ بيأكد على ثوابت اعرابية مهمة و نصيحة منى التزموا باجابات كتاب الوزراة بلاش تألفوا من عندكم اجابات :]

بالنسبة بقى لمصادر المذاكرة كتاب الوزارة و كتاب الامتحان مراجعة كافى جدا و اللى بيحب يزود فى العلم فيكتاب اسمه الوسام كويس برده بس مش اساسي اللى مش عنده مش مهم مش يقلق خالص

بالنسبة للوقت الخص بالمذاكرة دى قدرات فردية كل واحد فيكم يشوف الوقت المناسب ليه الصبح و لا بليل بالنسبالى احلى وفت بعد الفجر او بين العصرو المغرب بس برده كل واحد يختار الوقت المناسب ليه و يتوكل على الله

انا لكيت كتير بس تحت امركم دايما فى اي وقت وقبل ما اتكلم عن المادة اللى جاية هنتظر اي استفسار خاص باللغة العربية احبتى الكرام

بالطريقة دي اعتقد ان العربى اصبح اكثر سهولة بعون من الله و فضل شدوا حيلكم و تفاءلوا بالخير تجدوه