Your Guide

[Dr.Mohamed Sabry]

فروع العربي

( أدب - قراءة - نصوص - قصة - نحو - بلاغة )

- الأدب
فرع كويس ، بس بعض الطلبة بيستصعبوه عشان حفظ ومش مفهوم مع إنك لو فهمته كمدارس وشعراء عملوا ايه و اتجمعوا ليه و إيه المواضيع اللي اتكلموا عنها كأنها حكاية كدا مع شوية حفظ هتستمتع بيه ، درجاته مضمونة إن شاء الله في الامتحان لأنه معتمد علي حفظك له ، وهو فرع صغير .

- القراءة
قبل ما تبدأ فيها حفظ وفهم و الكلام دا ، عاوز أقولك انك لو مفتحتهاش طول السنة وجيب قرأتها كلها في اليوم اللي قبل الامتحان هتحلها كلها ومش هتغلط بجد والله مش بهزر ، مش بقولك كدا عشان تأهملها ، لكن عشان تشيل الخوف والضغط من ناحيتها ، درجاتها مضمونة جداا إن شاء الله لو انت حافظها كويس وفاهمها كويس .

- النصوص
النصوص عبارة عن معاني + مظاهر جمالية + تعليق علي النص
علم بقلم فسفور علي المعاني اللي تحس انها ممكن تتنسي ، و المظاهر الجمالية الشاذة بس هي اللي تحفظها ، زي مثلا العطف بين كذا و كذا يوحي بالمفارقة أو التنوع أو .... .
و علم بالقلم علي الإيحاءات المختلفة اللي تحس انك متعرفش تجيبها بتفكيرك ، و الباقي اقرأه و افهمه و احفظه بس متضيعش عليه وقتك .
الأسئلة العامة
مهمة جداا جداا ، ومشتقة من الأدب + بعض الإضافات الخاصة بالنص نفسه ، هتتفهم كويس و تتحفظ و بعد فترة هتنساها ( مش مشكلة في المراجعات هتفتكرها والله ) .
شرح النصوص
فيه طلبة بيحفظوه ، أنا من رأيي ( ليه تحفظوا !! ) ما انت ممكن تكتب زييه و أحسن منه أو تعبر بأسلوبك أفضل من كدا .. انت لو شايف فيك طاقة ومش عارف توديها فين ، احفظ الشرح بعد ما تخلص كل حاجة طبعاً .

- القصة
الحزء الأول تافه وبنسبة 90 % بيجيب فصل من الجزء الأول و فصل من الجزء التاني ، بس انت لازم تغطي كل الاحتمالات ، اتعامل معاها في الأول كرواية أو قصة بتقرأها عشان كدا بشجع انك تقرأها في الأجازة علي رواقة عشان تفهمها من كتاب الوزارة ، اسئلتها في الامتحان حلوة ومفيهاش لف ، وسهلة في الفهم ( رغم ان موضوعها كرواية مش هادف بالمرة ) . احفظ بس الأسئلة اللي تحتاج حفظ ، زي أسماء الكتب اللي كان أخوه بيذاكرها ، خصائص اللي كان اسمه الشنقيطي دا ، وهكذا ..... ، واستخدم قلم فسفور معاها برده عشان الموضوع دا هيسهل معاك في المراجعة كتير ، متضيعش وقتك في حفظ حاجة انت ممكن تكتبها كاملة بأسلوبك .

- النحو
دا اللي هتطلع بيه من العربي كله ، مفيش حاجة اسمها مبحبش النحو ، مش فاهمه ، عندي عقدة منه ، إزاي تقول أنك متعقد من كذا من غير ما تخوض التجربة وتجازف ، انت أنكرت كل قدراتك ووضعت ثقتك بالله وبنفسك في الأرض مع الجملة دي ، النحو هو فهم الجملة مش أكتر ،مفيهوش ذرة حفظ وبجد أكتر فرع ممتع في العربي ، افهم الجملة معناً ، وانت هتعرف تفرق بين الفاعل والمفعول ، التمييز والمضاف إليه ، المفعول المطلق والمفعول لأجله ....
فيه فيديوهات شرح نحو ، كانت بتيجي علي قناة الرحمة هكتب الرابط بتاعها في نهاية المشاركة اللي عاوز يفهمه في الأجازة .

- البلاغة
هي والنصوص بيخدموا بعض ، سهلة إن شاء الله و أسئلتها مضمونة في الإمتحان ، لكن محتاجة حل كتير .

تذاكر العربي منين

من ملخص الأضواء ، لو لم يتوفر مذكرة مدرس مضمونة و و افية ، ضروري تحل كتير خصوصا في البلاغة والنحو و الأدب ، الحل بيثبت المعلومة ( الحل من ملخص الامتحان منظم )
مش مشكلة لما تذاكر الدرس أكتر من مرة عشان يثبت ، أساسا مينفعش تقول أنا خلاص الدرس بقيت تمام فيه قبل ما تذاكره علي الأقل 3 مرات ، فيه كل مرة نظرتك ليه بتتطور عن النظرة الأولي .
نصيحة // في النصوص لما تخلص نص مذاكرة وتدخل في النص اللي بعده ، هات النص كله مراجعة قبل ما تبدأ في الجديد ، وهكذا وبجد هتبقي ممتاز لو بعد ما تخلص التاني ، تراجع الاتنين كمان مرة قبل ما تبدأ في التالت .
ضروري جدا تحل أسئلة كتاب المدرسة سواء في القصة أو في الفروع التانية ، فيها أسئلة مش مكتوبة في الملخصات و أسئلة كويسة .

تعمد إنك تحفظ شعر ، يعني بيت يعجبك تحفظه وانت بتحل بلاغه ، أو آية قرآنية .. هتفيدك في التعبير وحتي لو مكنش موضوع التعبير بيتكلم عنها ، هتفتح مخك لأفكار وتوسع إدراكك .

بعتذر علي الإطالة ـ فقط أريد أن أعطي للموضوع حقه

دروس النحو
https://www.youtube.com/playlist?lis...XoaCfgNspb6396

.
.
.
يُستكمل إن شاء الله