كليات القمه ...عجبي

[bosy .. mostafa]

بسم الله الرحمن الرحيم
انا عندي أهلي مش غاصبين عليا حاجه بيقولوا لي ان شالله تدخلي تجاره حتى مش هنقولك لأ .. يمكن عشان انا اخر العنقود و العناقيد اللي قبلي طب و هندسه .. جايز بقى مش عارفه
بس عارفه , انا اللي معقداها على نفسي و قاعده اقول لازم ادخل طب .. حتى لو مش جبتها جامعه عاديه هدخلها خاص و مش يهمني
بس صدقيني انا مش عايزه ادخلها عشان اللقب بس .. دي ليها سبب تاني و قصه طويله عمرها ييجي 11 سنه كده
بس بعدين قلت لو لا قدر الله مش جبت طب انا هدخل ألسن .. و اعتقد دي كليه حلوه اوووووووي
اشتغل في شركه او في مطار و مستريحه و على سنجة 10 و اقبض احسن من مليون دكتور
و ممكن كمان اتفوق فيها وابقى معيده (بس ده احتمال ضعيييييف لإن مافيش حد من عيلتي دكاتره في كلية الألسن او معيدين عشان يتوسطوا لي .. حتى لو تفوقت .. انا مش محتاجه اكلمك عن الحته دي :D كوسه فور ايفر :D:D)

والله فيه كليات تانيه حلوه و شغلها موجود و كمان ليها برستيج للناس اللي بتدور عاللقب
زي كلية الألسن , و كلية تجاره انجلش ..
انا عندي بنت خالي كانت تجاره انجليش و اهي اشتغلت في بنك و بتقبض مرتب كبير ما شاء الله
احسن من اخويا الدكتور :D
و لما اخويا عرف المرتب بتاعها يا عيني اتصدم و قال(ياريتني ما موتت نفسي في السبع سنين و السنه الإمتياز و التكلييييف اللي كان في اخر الدنيا) كان هيعيط بجد
بس حمد ربنا .. محدش بياخد غير نصيبه

و بعدين المفروض شعب مصر يؤمن بحاجه مهمه جداً و هي ان مافيش حاجه اسمها كلية قمه .. فيها حاجه اسمها قمه في الكليه ..
مش عارفه احنا بنحب نعكس ليه :D

و بعدين يا بنتي لازم تلاقي مجاميع الكيات (بتاعة القمه دي) في السما و العلالي بسبب الأرقام الفلكيه اللي بعض الطلبه بيحصلوا عليها .. منهم بيحصل عليها بسبب التفوق الرياضي (و دول اقله .. هو حد فاضي يبص وراه)
و منهم اللي بيحصل عليها بمجهوده (بس دول بنسبة .1%) و منهم اللي بيحصل عليها بالتسريب و دول الأكتريه

الأرقام الفلكيه هي السبب .. بابا بيقولي ان كلية الطب دي زمان كانت بـ 60% و كان بيدخلها الناس الفشله في ثانويه عامه و مش كان ليها قيمه
و هندسه كانت بـ 80% بس كان ليها قيمه شويه عن الطب عشان كنا وقت عبد الناصر فيه ناس بتصنع هنا .. بس دلوقتي كله راح
و بقى مجرد لقب و بس
دلوقتي اللي يدخل هندسه احسن قسمين ليه مدني و معماري لإنهم ليهم شغل في مصر و بره مصر كمان .. لإنه لو دخل ميكانيا اولاً هيطلع عينه في الرسومات المعقده ثانياً لما يتخرج مش هيلاقي حد بيصنع حاجه فهيقعد في بيتهم
و لو دخل كهربا مش بعيد يقلب أرشميدس و مش هيلاقي شغل لما يطلع .. هيشتغل في جولدي مثلاً على خط انتاج و خلاص مش هيستفيد بمجاله
محدش بيشتغل في مجاله في البلد دي

سوري للإطاله و شكراً للموضوع