الي كل طلبه الدبلومات الفنيه الصناعيه نظام الخمس سنوات والحاصلون علي اعلي من 84%

[القطه]

المشاركة الأصلية كتبت بواسطة محمد.فوكس

طب دلوقتي أنا عايز اعرف هي الكورسات دي لازم ولا ايه؟ اصل اللي معاه ثانوية عامة اعتقد هيبقى مش محتاج .. ده غير ان انا عيلتي فيها مهندسين كتير و الف من يساعدني في الرياضة و الفيزياء ولا لازم آخد عشان ارضي المهندس اللي بيدرسلي... و الكورسات دي على كده هتتكلف كام في الشهر على بعضها لو الواحد هياخد؟
و هو انتي يا تنسيم كنتي صنايع خمس سنين ولا ثانوي عام؟
و لو كنتي ثانوي عام شايفة مثلا ان رياضة و فيزياء بتوع المعهد اصعب ولا اسهل من الثانوية العامة؟
اصل انا سألت واحد رياح سنة تانية المعهد ده"بس كان صنايع تلات سنين" و قالي على شوية من محتويات الفيزياء فلقيت انها جزء من فيزياء الثانوية العامة و كذالك الرياضة.
و بالنسبة للمجاميع بتاعت السنادي هو كل كليات الهندسة بتاخد من المعاهد ولا البترول والتعدين و هندسة القاهرة و المنيا وبس..ولا هم مكتوبين لوحدهم في الخبر بتاع التنسيق عشان اعلى هندسة و اقل هندسة؟
و طلبة المعهد بيدخلو التنسيق مع طلبة الدبلومات الفنية خمس سنين صح؟
و دلوقتي انا عرفت مجاميع الهندسة و البترول و التعدين بس عايز اعرف هي اعلى قد ايه من السنة اللي فاتت؟
و هل موضوع السنة الفراغ هيساعد في سهولة دخول خريجي المعهد ده كليات الهندسة؟
و هو المعهد ده ملهوش كليات حلوة احتياط عشان لو لاقدر الله المجموع مجابش هندسة.. يعني ايه الكليات اللي ممكن يدخلها خريجي المعهد ده غير الهندسة و البترول والتعدين؟
و هو المعهد بيخرج على اعدادي و لا بيدخل سنة اولى تخصص على طول؟
معلش اسئلة كتير بس ارجو الاجابة عليها في صورة اقتباس للمشاركة.
و انت يا عم محب مش عارفين نتكلم ليه استنيتك امبارح و مدخلتش.

هههههههههههههههه حرام عليك ريح نفسك شويه انتا بتجيب الاسئله دى منين عاوزه اعرف مصدرها هرد على كل اللى انتا عاوزه
اجابه السوال الاول/ الكورسات برحتك تاخد او متختش مدام الموضوع ده تعبك كده انا كان قصدى لو المهندس معندوش ضمير وبتاع كورسات اتقى شره وخد عنده علشان تاخد درجات اعمال السنه كامله الحكايه مش انى معايا ثانوى عام او دبلوم الحكايه ان فى بعض الاستغلال انتا مفكر طلبه الدبلوم اقل لاء كله هناك واحد
اجابه السوال الثانى/ الكورس مش بتاخد بشهر انتا مفكره درس ذى اللى كنا بناخده فى الثانوى لاء الكورس بيبقا عباره عن اربع محاضرات او حسب ما يقول المهندس والمحاضرات دى بتشمل المنهج كله يعنى بتدفع مره واحده بس
اجابه السوال الثالث/ اه انا كنت دبلوم صناعى ثلاث سنوات بس انا عندى فكره كويسه عن منهج الثانوى العام لانى اصحابى اغلبهم ثانوى عام متقلقش وعلى فكره انا دخله التعليم الفنى بمزاجى لانى بحب الرسم جدا والموهبه عمرى ماكنت هقدر امشى فيها مع الثانوى العام فقررت ان امشى فى الخط الثانى
اجابه السوال الرابع/ المعهد حاجه والثانوى العام حاجه وبعدين مش كل الاقسام بتاخد فيزياء وبعدين انا شايفه انك مقلق من المعهد قوى يا اخى روح واتوكل على الله مدام علوم مش عجباك ان شاء الله الدراسه هتكون سهله وايه يعنى لو هتدرس فيزياء مش مشكله هوا انتا هتعمل اختراع جديد للبشريه ولا ايه
اجابه السوال الخامس/ على ما اعتقدت احنا لينا كل كليات الهندسه بكل اقسمها والمقال اللى قرائته فيه اعلى كليه واقل كليه لانى اعرف ناس دخلوا هندسه شبين واسكندريه والقاهره
اجابه السوال السادس/ احنا فعلا تنسيقنا هوا تنسيق دبلوم خمس سنين وبنقدم مع بعض
اجابه السوال السابع /الفرق بين تنسيق السنادى والسنه اللى فاتت والسنين اللى قبلها كتتتتتير قوى فكرتنى بالهم الحمد لله وده عاوز موضوع لوحده هبقى اقوله بعدين علشان السيره دى بتتعبنى معلش
اجابه السوال الثامن/ انا مش عارفه اجوبك عليه ايه حكايه السنه الفراغ قصدك بيها ايه علشان اعرف اجوبك
اجابه السوال التاسع/ فعلا فى كليات تانيه جميله ذى فنون جميله قسم عماره ولازم علشان تتخلها لازم تكون شعبه عماره او مدنى فقط وتعمل امتحان قدرات اما كليه الاثار فدى لقسم ترميم الاثار والقسم مش موجود فى كل المعاهد تقريبا فى القاهره بس مش مهتمين بيه ذى الاقسام الثانيه وفى كليه الزراعه ودى لقسم الات وميكنه زراعيه فقط وفى كليه تربيه حلوان لكل الاقسام وطبعا كليه تعليم صناعى وكليه تربيه نوعيه و كليه فنون تطبيقيه
اجابه السوال العاشر/ انتا بتدخل الهندسه على اعدادى مش على التخصص ذى ما بيقولوا اما التربيه على سنه تانيه تقريبا