هى عادتنا ولا هنشتريها؟

[مستر/ عصام الجاويش]

ياجماعه الرياضه مكسب وخساره
ولابد ان نتقبل الهزيمه كما نفرح بالفوز
والله انا شخصيا كنت متوقع اننا نخسر. ليه؟ لاننا اعتدنا على كده من منتخباتنا كلها بعد مايكسبوا مباره هامه ويكون ادائهم فيها ممتاز بنبالغ فى الفرحه جدا جدا جدا وبنعتبر نفسنا هنكسب المباره التاليه بالذوق او بالعافيه زى ما حصل لما كسبنا مباره ايطاليا دخلنا مباره امريكا واحنا متاكدين اننا هنكسب هنكسب خسرنا بشكل وحش جدا جدا وكذلك الامر حصل فى مباره منتخب الشباب لعبنا ماتش ايطاليا كويس جدا وخسرنا من فريق ضعيف بعدها وطلعنا من البطوله
والله نفسى بعد كده نأجل احتفالنا للاخر خالص لان العبره بالنهايه.
نقطه تانيه عاوز اتكلم فيها اننا مش بنشكر ربنا على النعمه بشكل صحيح بمعنى اننا بنعبر عن فرحتنا احيانا بمعصيه الله واكيد انتوا عارفين حكم الاسلام فى الاشياء اللى بتتعمل بعد المباره من كثير من الجماهير . الموسيقى الصاخبه اللى البنات رقصوا عليها فى الشوارع مع الاولاد والاغانى اياها ودهان وجوه البنات والاولاد بلون العلم هو ده انتماء؟ طبعا لا. وحاجات كتير بتحصل لاترضى ربنا وانا مش عاوز اتكلم فى حكم الدين فيها لأنكم كلكم تعرفوها احسن منى مليون مره
عموما مش فارقه يعنى اللى بيوصل كاس العالم من الدول العربيه والافريقيه بيعمل ايه يعنى؟ ولا حاجه؟ هيلعب ثلاثه مباريات وهيطلع والدوله هتتحمل ملايين الجنيهات لاعداد الفريق الشعب اولى بكل مليم يتصرف على كره القدم وحتى لو خد كاس العالم نفسه يعنى ايه اللى هيعود على الشعب؟ ولاحاجه
اوعى حد يزعل يااخواننا فرب ضاره نافعه وكل سنه وانتوا طيبين بمناسبه العشر الاوائل من ذى الحجه نبدأ صفحه جديده فى حياتنا ونتكلم بقى فى المفيد وكفايه بقى كلام عن الكره وكل واحد يشوف مصلحته . كلامى صح ولا ايه؟