ايه الحاية يا حكومة ادخل واتفرج ببلاش

[هانى شوقى]

بص على اللى بيحصل فى مصر الفرجة ببلاش :

اول هام : قالولنا فى ثورة وناس كتير شاركت وقولنا البلد بتنضف وبعد كدة قبضوا على رموز الفساد اللى محدش فيهم خد حكم يساوى الاجرام اللى هو عمله مفيش غير العادلى واعتقد دا مش حكم دا بنج للشعب

تانى هام يا عم الحج قالولنا لازم عجلة الاقتصاد تدور علشان البلد نشفت قولنا نعمل ايه
قالولنا بطلوا مظاهرات صدعنا روحوا اشتغلوا قولنا حاضر وهنخلى ليكم حكومة شرف تبنى بلدنا وهتساعدكم قولنا حاضر

تالت هام يا حلو اخواتك : الحكومة شحت فلوس من طوب الارض على الرغم دول تانى فيها مظهرات معملتش كدة قالولنا عددكم كبير هنوكلكم منين قولنالهم حاضر اشحتوا على حسنا ومالو بس ورونا الاكل الشعب جاع

رابع هام يا فارحنى ياللى متربع فى الننى: الحكومة هتزود الاجور هيصوا وعيشوا وعملنالكم حد ادنى والدنيا هتبقى ربيع كل واحد مننا عاش الاحلام الوردية وقعد مع الولية يرسموا الايام اللى جاية وحسوا انهم بنى ادمين

خامس هام : الدنيا اتقلبت والحكومة انكشفت والتصريحات بقيت عايمة وبدل كدبة ابريل بقى كل شهر فى كدبة جديدة قال ايه يا خويا الحد الادنى للاجور هيتطبق على الاقل من 700 واللى اكتر هنجبله منين الناس قلقت وبقى كل وزير بيطلع بيتكلم معانا بعنف افتكر فى الاول كانوا بيحايلوا الناس ومحدش يجروأ يصدر قرارات ضدهم

لكن الوشوش اتغيرت سمير رضوان بيترفز كتير فى غالبية مؤتمراته وكانه مش طايق يسمع اى مطلب للغلبان
وزير التعليم مش سامع الموظفين اللى فى وزارته حتى لما بيطلع فى حوار مبيتكلمش عليهم ولما يفتح الحنفية بيرش على اللى فى ديوان وزارته عجبى

الحصيلة :

1- محدش زاد مرتبه
2- الناس اللى عدت 3 سنين فى التعليم متثبتتش
3- الحد الادنى العامل بقى زى المعلم وطظ فى الشهادات
4- بدعة ظهرت اسمها صفوت النحاس حاجة كدة متر الا ربع كل يوم يتحدى الشعب بقرارات تنرفز وكانه متعمد ومش هامه (وحياة ابوك ايامك قربت )
5- اجور للصعيد اقل من الوجه البحرى ( بيقسموا البلد دا انقلاب بحرى ايه وقبلى ايه ولسة ياما هنسمع )
6- وفى الاخر اقعد ياد منك ليه معندناش فلوس هيزيد اللى اقل من 700 واللى مش عاجبة يخبط دماغه فى الحيط
7- الصراخ والاهات شكلها هترجع تانى وفعلا احنا ابتدينا من دلوقت نحس نفس احساس ايام نظام مبارك ومفيش اى تغيير


القادم :
توقع كثير من الناس ان الشهر القادم لو الحكومة منفزتش الوعود هتكون جمعة الحساب
هتطير فيها حكومة شرف الوهمية اللى لو من الاول كانت بتوضح للناس الامور كانوا عزروهم لكنهم رسموا طريق وردى ولكنه طلع صحراوى وهنرجع للصفر من جديد ندور على وزارة ونبنبى من جديد وهنقول مصر وشعبها عاشوا 5شهور فى الوهم


ادى بلدنا وادى شعبها اللى ولاده اشتغوا خادمين للشعوب الاخرى 30 سنة عايزين يمرمطوه من تانى

احب اقول بس معلومة اكيدة ان الحد الادنى عندنا لو اطبق برضه مش هنعادل اقل موظف لافقر دولة فى العالم بدليل روح سافر اى مكان وانت هترجع منه مليونير ومعاك قد كدة سالت نفسك ايه السبب لانه ببساطه الناس فى اى مكان فى العالم عايشة الا فى بلدنا

اسف لو الموضوع طويل بس عبرت عن قليل وسبت كتير

ولا نملك غير تعبير حسب الله ونعمة الوكيل لاى حد ضد الفقير