اتقوا الله فى المدرس الغلبان

[هشام على سالم]

لكى يعلم أولياء الأمور أن مدرسى المدارس الخاصة مرتباتهم لاتتعدى 500جنيه فى الشهر الواحد بالاضافة للعمل طول اليوم بدون حوافز وكل واحد منهم عندوا عائلة وأولاد وبيت مفتوح لازم ياكل ويلبس ويصرف على البيت ومدارس ولاده هذا بالإضافة أنه من أول شهر يونيه فى أجازة بدون مرتب والمكافاة يدوب تغطى شهر أحسن واحد بياخد 2000 جنيه ده فى بعض المدارس فقط والباقى حسنة قليلة
ومطلوب منه أن يكون مدرس شريف لايعطى دروس خصوصية أنا اتحدى أى خبير اقتصادى أنه يقدر يمشى بيت بالفلوس ديه .
والطبيب اللى سايب المستشفى وقاعد فى عيادته والكشف زى ما كل الناس عارفين تعدى 40جنيه للفرد فى دقيقة كشف شريف برده وغيره من الموظفين اللى عندهم درج شمال شرفاء برده أنتوا سيبتوا الدنيا كلها وماسكين فى المعلم الغلبان افقر الناس فى مصر الآن .
عايزينه يبقى شريف قولوا للطبيب يشتغل فى المستشفى فقط وبلاش العيادة وقولوا للمهندس بلاش ياخد رشاوى عشان التراخيص والموظف بلاش يعقد الناس بالروتين العقيم .
الله يرحم المدرس الغلبان اللى مالوش حد يدافع عنه لا وزارة بتقف جنبه ولا نقابة تجيبله حقه .