معا ضد جشع التجار والحكومه

[amr_2010]

ياجماعة الميل ده وصلنى وحبيت إنى ابعتهولكم وياريت فعلا كلنا نتفاعل معاه الميل ده بخصوص الغلاء فى مصر

حملة " معا ضد جشع التجار و الحكومه




الموضوع بإختصار غلا الأسعار وغياب الشباب المثقف اللى يواجه هذه الأزمة صح مش بالشغب ولكن بالفكر

الأزمة دى وإن كان معظمنا مش مكسور فيها ولكن أكيد كل بيت فى مصر شايل همها خاصة إنهاعمالة تزيد وتكبر وعشان الناس مبتتحركش عمالة تتضاعف وبعدين صدقونى هنحس بيها يوم ما ربنا يكرمنا كلنا ونفتح بيوت والواحد إذا كان أهله هيساعدوه فاكيد مش هيصرفوله على بيته عشان كده أنا عندى إقتراح

إحنا عوزين ننظم حملات إضراب عن شراء السلع لمدد محدودة زى ما لما فودافون غلت تعريفة الإتصال الناس يومين ماتصلوش خسرت جامد وإضطرت إنها ترجع الاسعار زى ماكانت.. هوه ده اللى أنا بقصده نحدد إسبوع محدش يشترى فيه خضار لمدة 4 أيام ومن خلال علاقتنا بالناس فى الشغل والقرايب والمعارف وع النت وعلى المواقع وعلى الجروبات نحفز الناس وفعلا نحاول ننجح الموضوع صدقونى الخضار هيبوظ عند الخضرية وهيتربوا ومن بعدهم الجزارين و... إلخ

الناس بتتشتر على بعضيها عشان يواجهوا الغلا يعنى الحاجة اللى بتزيد 1/2 جنيه البياع بيزودها 2 جنيه صدقونى إحنا لو ضغطنا عليهم هيضغطوا على اللى فوقيهم لغاية لما الاسعار تنزل



بصوا هى فكرة ووجهة نظر كانت جوايا وحبيت أعرضها ومش عشانى ولا عشانكوا عشان خاطر الناس الغلابة المغلوبة على أمرها اللى مش لاقية تاكل ولسه عاوزين يخللوا ليهم العيش 3 رغيف للفرد فى اليوم يصرفهم بالبطاقة حتى العيش مش هيلاقوه والفول اللى كان بيمثل أكل ناس غلابة فطار وغدا وعشا 'وأظن فى حملات التطعيم ومعسكرات التنمية اللى كانت فى العشوائيات والمحافظات شوفنا بنفسنا ده حتى ده مش هيلاقوه'



عشان كده أنا عن نفسى حددت فترة الأسبوع الثانى من مارس ( من 14/3/2008 وحتى 21/3/2008 ) لعمل مقاطعة عن شراء الخضار نهائيا

والدور بعد كده على الباقى بس الاول حملة مقاطعة الخضار فى الفترة من 14 وحتى 21 -3 2008 والله الموفق



أرجوا بحث هذا الموضوع وتفعيله .. ومستنى الردود .. ومستعد أن أكون أول البادئين

الموضوع ده يا جماعه منقول وعايزين ننشره في كل المنتديات و في كل الاماكن الي نقدر نوصلها