موقــف غيـــر عــادى عنـــد البشـــر العـــادى

[دمياطية]

موقــف غيـــر عــادى عنـــد البشـــر العـــادى
.................................................. ................

كنت من شوية رايحة مشوار و أنا ماشية فى الشارع سمعت راجل تقريباٌ فى الأربعينيات من عمره ومعاه إبنه الصغير اللى لسى مادخلش المدرسة ( الولد دة كان له ظروف صحية وهو صغير بس الحمد لله ربنا شافاه و عافاه بس من صغره وهو دلوعة وماحدش بيقف قصاده ) عمال يعيط و يصرخ مش عارفة إية السبب بالظبط ،
و الراجل دة عمال يزعق جامد جامد لولد تانى مش إبنه و تقريباً عنده 10 سنوات و بيقوله إنت ليه ضربت إبنى هو مش أدك إياك تمد إيدك عليه تانى و كلام من النوعية دة ،
و الولدة دة عمال يحلف و يقوله و الله ماضربته و لا جيت جنبه دا ولد ثالث و قاله على إسمه ،
المهم الراجل الأربعينى دة مُصر على كلامه للولد و بعد شوية قاله
بقولك إية إمشى من أدامى و إنده لى أبوك أكلمه

الولد سمع الكلمة دى و إنهار فى العياط و قاله أبويا مات من سنة أجبهولك منين الوقتى وكمل عياط لدرجة إنه مابقاش عارف يآخد نفسه ، فطلع راجل تانى من الشارع كان شايف الموقف من الأول ومسح على راس الولد اللى بيعيط و أخده يغسل وشه فى الجامع ،
و صاحبنا الأربعينى وشه إحمر وسكت وشد إبنه ومشى ،،،،
الصراحة الموقف دة خلى جسمى يقشعر و خلانى مش عارفة أتلم على نفسى ومسكت نفسى عن البكاء ،،،

إذا كنت أنا ياللى كبيرة عن الولد دة يسنوات ولما والدى إتوفى الله يرحمه كنت خلاص إتخرجت من الكلية مازلت أبكى والدى رحمه الله و أحتاج إليه فى كثير و كثير من المواقف اللى فعلا ما ينفعش يتصرف فيها غير الأب ،،،

فما بالكم بإحساس الولد دة و مشاعره _ إنتوا مش سمعتو نبرة صوته وهو بيقول أنا أبويا ميت من سنة أجيبهولك إزاى الوقت _

كنت حاسة إنه بيلوم الدنيا و الناس كلها على وفاة والده و إنه أد إية محتاج له فى الموقف دة علشان يرفع الظلم عنه و أكيد لصغر السن فى مواقف كتير بتمر عليه يومياً ومش عايزة اقول فى كل ساعة من اليوم تفسه ،،

لأن الأب هو الأمان ومافيش حد مهما كان يقدر يعوضه

............. كان يجرى إية لو الراجل دة سأل الولد بالراحة إنت مين و إبن مين وأبوك فين دلوقتى ؟
كان يجرى إية لو سأل عن أى حد كببر يتكلم معاه بدون ما يجرحه ؟

................. إذا كان دة موقف فى الشارع فما بالكم بكتير من المواقف اليومية اللى كلنا بتعرض ليها ومش بنحاسب فيها على كلامنا و لا بنقوله إزاى و لا بتقوله لمين ،،،،

الكلام اللى ساعات بنقوله بسهوله بيكون عند البعض زى الرصاص أو السم الزعاف فياريت ياريت نخلى بالنا كلامنا و نحاول قدر الإمكان نسيطر على إنفعالاتنا و نفسنا

[توفيق رفعت عجيز]

موقف مؤلم بالفعل وقد يكون يتكرر يوميا في حياتنا وهذا الرجل لم يشعر بأن ولده الصغير قد يكون يوما ما في موقف الولد اليتيم هذا لعلها تكون عبره له ويتعامل بطريقة افضل مع الاطفال والكبار

[دمياطية]

أستاذ توفيق

شكرا على مروركم و تعليقكم

وجزاكم الله خيراِ

[نسيــــــم الجنـــــــــة]

للاسف أستازتنا اصبحنا مندفعين بردود افعالنا

احيانا لضغوط الله اعلم بدواخل كلا منا

وان كان التروى لن يكلفنا شىء

الله المستعان
قادر ان ينعم علينا بجميل الصفات والافعال