لملم توب الفرحة

[عاطف حمدان محمد]

لملم توب الفرحة ودوَّر
ع اللي في جرحك كانوا معاك
مهما يطول الفرح قصير
مش راح يفضل شيء وياك
شوف كام غيرك مات ما اتعلم
وانت معلم اوي في جفاك
جوه حواري الاحساس نوَّر
ع اللي بعمره بيستناك
وان كان حلمك بيك اتهوَّر
فكَّر حبَّة وبص وراك
احضن عصفور ذكرى صغير
تاه واتحير لما هواك
وسنين شوق فاردين مناديلهم
باعتين نظرة من الشباك
قافلين باب القلب ف بعدك
لما الهجر بشره ملاك
ما تدمعش وحاول ترجع
علشان روح الخير جواك
قول وبعلو الصوت انا فاكر
ولا انيش قادر عمري انساك
#‏لملم_توب_الفرحة
#‏عاطف_حمدان_محمد