هندسة شبرا "احلى كليه هندسة "

[salama_8]

كليه الهندسة بشبرا : اجمل خمس سنوات قضيتهم في حياتي كانوا في الكليه دي
الكليه فيها اقسام : مدني و عمارة و اتصالات و كهربا و ميكانيكا انتاج و ميكانيكا باور و هندسة صناعيه و الوحيد على مستوى الشرق الاوسط (قسم الهندسه المساحيه)
ايه اللي يميز الكليه عن بقيت الكليات :اول حاجه لو رحت اي كليه هندسه تانيه هتلاقي عدد الطلبه فيها اكتر من 2500 طالب لكن في هندسة شبرا العدد ميعديش 1300 طالب في الدفعه
تاني حاجه الكليه فوق محطة مترو روض الفرج على طول يعني لو هتيجي مواصلات الموضوع هيبقى سهل
ثالث حاجه لو رحت كليات زي القاهره و عين شمس تلاقي الدكاتره كلهم او معظمهم واخد الدكتوراه بتاعته من عين شمس او القاهره لكن عندنا في شبرا .. الاساتذه كلهم بلا استثناء واخدين الدكتوراه من دول زي اليابان و امريكا و روسيا و انجلترا و كندا و من جامعات مشهوره في واشنطون و تورنتو و طوكيو و كاليفورنيا و مانشستر ... يعني معظم الستاف ممتاز (بس الصراحه مش في اعدادي هندسه في السنين اللي بعد كده)
الحاجه الرابعه ان معظم الدكاتره شغالين في سوق العمل الهندسي و عندهم شركات ومكاتب استشاريه او شغالين في اكبر المكاتب الاستشاريه زي( محرم - باخوم ) و بيبقى فيه فرصه للطلبه انهم يشتغلوا مع الدكاتره
الحاجه المهمه قوي : ان معظم الدكاتره مش متزمتين زي المشهورين قوي بالتزمت (دكاتره عين شمس مع احترامنا الشديد ليهم لكن دا كلام طلبه عين شمس ) و كمان fresh و متعاونين جدا مع الطلبه و بيحترموا رأي الطالب و معندهمش حكايه الانتقام من الطلبه اللي بنشوفها في كليات كتير و الحياه مش ماشيه رسمي و خنقه هناك و دا مش معناه ان مفيش التزام لكن فيه مراعاه لظروف الطلبه .
اقسام مدني و مساحه و عماره من اشهر و اقوى الاقسام على مستوى كليات الهندسة في مصر و بيطلبوا في الشغل بالاسم.
عيوب هندسة شبرا :
يعني زي ما في مميزات لازم يكون فيه عيوب زي نقص الامكانيات في اقسام ميكانيكا و كهربا و اتصالات و دا مخلي الاقسام دي مش قويه قوي زي هندسة القاهره مثلا اللي فيها امكانيات عاليه .
يعني من الاخر اللي عاوز يدخل اتصالات او كهرباء يدخل هندسة القاهره احسن ليه. لأنه هيتعب شويه في شبرا لأنه مش هيشوف عملي كتير او بالشكل المطلوب.
العيب التاني : انه مفيش اهتمام بمظهر بعض القاعات الدراسيه في الكليه (مش كلها يعني في قاعات جامده جدا و في قاعات تعبانه موت)
و في النهايه ربنا يوفقكم و تيجوا مكانا السنه الجايه في هندسة شبرا