|
||||||
| أرشيف المنتدى هنا نقل الموضوعات المكررة والروابط التى لا تعمل |
|
|
أدوات الموضوع | ابحث في الموضوع | انواع عرض الموضوع |
|
#1
14-03-2007, 02:31 PM
|
||||
|
||||
في البداية أحب أقولكم إن ديه من المرات القليلة جداً إللي بقول فيها إن الموضوع مش منقول :D
المهم دلوقتي عاوز أناقشكم في موضوع شاغلني جداً من فترة طويلة هل المنتديات بتقتل الموهبة؟  لما تدخل أي منتدى بغض النظر عن منتدى الثانوية العامة أو غيره بتلاقي موضوعات كتيرة جداً منقولة لدرجة إن فيه منتدى منع أي نقل وفتح قسم خاص بس كده بالمواضيع المنقولة  لأنها كترت جداً هاه وبعدين عاوز تقول إيه؟ استنى عليا بس أكتر من مرة بنزل موضوع ولا حاجة وبحاول أنتقي أفضل المواضيع المتوفرة قدامي عشان أجيبها المنتدى ويكون أسلوب الكاتب ما فيش بعد كده وبلاقي التفاعل قليل أو الردود مش ولابد المفروض إن أنا كنت بنزل المواضيع ديه نوع من أنواع التيست أو الاختبار إيه إللي هيحصل مع المواضيع ديه؟  يا ترى هتلاقي إقبال كبير؟ يا ترى إيه ردة فعل أعضاء المنتدى :P ثم فيه حاجة تانية قبل ما أكمل الموضوع بصراحة حاجة بايخة أوي يعني إن كل لما آجي أناقش موضوع أفوت على مشاكل المنتدى <_< المفروض المشاكل ديه خلصت من زمان المفروض فيه موضوعات مهمة نتبادل فيها آراءنا وبدون تعصب كل واحد لرأيهيعني في الفلسفة بيقولك كل فيلسوف بيطلع وجهة نظر فلسفية بيؤيد وجهة نظره بالأدلة المختلفة العقلية والمنطقية والمادية إن أمكن رغم ابتعاد الفلاسفة خصوصاً عن الأدلة المادية المهم ممكن يطلع واحد فيلسوف تاني ويطلع وجهة نظر في نفس المبحث وتكون مخالفة تماماً له ويجيب أدلة على كلامه برضه وبصراحة مش بنشوف الفلاسفة دول بيمسكوا في تلابيب بعض ويتخانقوا ويسبوا بعض إلا الحثالة منهم  فمش المفروض إنك تقول رأيك عشان الكل يقتنع بيه المفروض إنت بتعرض رأيك وبتؤيده بكل ما تملك من قوة لو حد حاب يناقشك عشان يغير وجهة نظرك أهلاً وسهلاً لكن تفضل طول الوقت بس متمسك برايك والباقيين _لا مؤاخذة_ يتحرقوا بجاز تبقى غلطان كل المؤسسات المحترمة بيكون ليها شعار بتحاول تنفذوه وبتمشي عليه شعار قناة الجزيرة وباعتراف الجميع هي أفضل القنوات الإخبارية العربية إطلاقاً حتى الآن شعارها الرأي والرأي الآخر والقناة على الحياد مش عارف أنا بقول الكلام ده ليه دلوقتي خلونا في موضوعنا هل بتعتقد إن المنتديات بتقتل الموهبة؟  يعني لو رحنا لقسم فلاسفة تحت التمرين هنلاقي يمكن 99.99% منقول طبعاً باتباع نظرية إسلام إن الواحد من مية في المية ده بيفرق جامد فهتلاقي إن النسبة ديه تقريباً مظبوطة :D هل ده معناه إن ما فيش حد من المنتدى أبداً قادر على كتابة مواضيع فلسفية؟ أو ما حدش عنده وجهة نظر خاصة بموضوع ما يقدر يكتب عنها بأسلوبه؟ لأ أكيد فيه طب ليه مش بيكتبوا؟ هوه ده السؤال هل المنتديات بتقتل الإبداع؟ يعني من حيث إن المواضيع معظمها منقولة ومن حيث إن فيه أعضاء معينين هما إللي بيكتبوا والباقي صمت بكت كل مهمتهم يتابعوهم أو ينقلوا مواضيعهم إللي عجبتهم أو يردوا عليهم بمواضيع منقولة لما تلاقي واحد عمل بحث مفصل عن برج دبي تجري بسرعة وتروح ناقل موضوعه ليه إنت مش اللي تعمل البحث ده؟ الموضوع أبسط مما يمكن ليه مثلاً ما نلاقيش حد عمل بحث عن شخصية معينة ليها تأثيرها في التاريخ عامة أو في التاريخ المصري على وجهة الخصوص زي ما جامبو عمل عن مصر وبصراحة أبدع موضوع عن مصر غاية في الروعة وكان فيه واحد عمل قاموس أو معجم للفلاسفة ليه الموضوع ده ما كانش هوه يعملوه بدل ما ينقلوه وعلى فكرة الموضوع لما يكون مش منقول بيكتسب قيمة أكبر صدقوني  نرجع لموضوعنا هل المنتديات بتقتل الموهبة والإبداع؟ أو من حيث مثلاً الاستسهال الأسهل إني أنقل موضوع من إني أكتب موضوع أو من ناحية الكسل أنا لسه هبحث او هدور؟ أو الخوف من ردود الفعل سواء كان الخوف من انعدامها أو الخوف من صلابتها وحدتها إن كان الموضوع مخالفاً بشكل ما لأحد الأعراف زي الموضوع إللي نزلوه يوري عن الشذوذ الجنسي في مصر  هاه لسه السؤال مطروح هل المنتديات بتقتل الموهبة أو الإبداع داخل الإنسان؟ ثم أنا عاوز أقول حاجة قبل ما أقفل الموضوع مش حاجة ظريفة خالص ولا يعتبر موضوع إني أسيب السؤال وأمشي عشان أسيبكم تعرضوا رأيكم لازم يكون فيه موضوع وأعرض بعض من حيثياته والمحيطات بيه عشان يبقى عندكم نقاط محددة تتناقشوا فيها مش أسيب سؤال وأمشي هاه هل المنتديات تقتل الموهبة أو الإبداع داخل الإنسان؟ بصراحة أنا لو دخلت موضوع ولقيتوه بالطريقة ديه يعني السؤال بس هوه اللي موجود من غير اي موضوع خالص يا إما هرد بآه أو لأ يا إما هرد رد مقتضب صاحب الموضوع ما احترمش عقليتي ونزل موضوع بيسأل عن رأيي من غير هوه ما يبذل أي مجهود خلونا نرجع لموضوعنا تاني كمان نقطة هل انتشار الألعاب أو وجود بديل للحوار الجاد والبديل ده قوي وجذاب هل ده برضه بيخلي الواحد يقضي وقته ومش يفكر إنه يبدع أصلاً أو يظهر موهبته لأنه بيقضي وقته في حاجة تانية لو أنا عارف كل الأسباب إللي ممكن تكون سبب في قتل الموهبة أو الإبداع داخل المنتديات ببساطة ما كنتش فتحت الموضوع للنقاش أكيد فيه أسباب تانية ممكن تكون سبب للحكاية ديه ثم إن سؤال الموضوع مش ما هي الأسباب التي تقتل الإبداع والموهبة داخل المنتديات ؟ لأ سؤاله أصلاً هل المنتديات فعلاً بتقتل الموهبة لو آه طب هل فيه أسباب تانية غير المذكورة؟ لو لأ طب وردك إيه على المكتوب فوق ده؟ الموضوع قدامكم مفتوح للنقاش قدامك شوية اختيارات على طريقة خالد الجن 1- ممكن تسيب رد تشكرني ع الموضوع وتمشي ديه خاصية الرد لأ مش الرد السريع الرد الباهت 2- وكمان ممكن تمشي من غير ما تسيبش رد خالص يبقى ريحتني وريحت دماغك 3- أما الأغلبية العظمى من الأعضاء هتشوف الموضوع بالطول ده هتاخدها من قاصرها وتمشي أو تقول هبقى أقراه بعدين ولا هتقرا ولا هتعمل  شكراً ع دخلوكم الموضوع :D بانتظار التعليقات ورجاء تثبيت الموضوع ليحصل على حقه من النقاش
__________________
May God Bless all of you Wishing you a spiritual Ramdan Salah El-Din ReceptiveGuy
|
| العلامات المرجعية |
«
الموضوع السابق
|
الموضوع التالي
»
العرض الشجري
|
|
جميع الأوقات بتوقيت GMT +2. الساعة الآن 07:28 PM.
