ما هو لا ذنبى ... ولا برضه ذنبها

[To Be Is To Do]

السلام عليكم

لقيت بوست على جروب هندسه على الفيس عن العلاقه بين الشاب والفتاه فى الكليه
المهم أنا حنقلكم الكومنات بمنتهى الأمانه

الشاب : لا على فكره يا جماعه بنات فنون جميله أحلى من بتوع هندسه بمراحل
البنت : ليه يعنى إن شاء الله ومالهم بتوع هندسه يا خويا
الشاب : مش حلوين خالص وتحس إنهم معقدين كده
البنت : طب تصدق بقى إن شباب صيدله أحلى منكم وألذ وأحف دما منكم
الشاب : على فكره بنات المجمع بيقولوا فينا أشعار وبيتمنوا يتجوزوا واحد من هندسه
البنت : هما بتوع المجمع دول بنات
الشاب : بس على الأقل عندهم نظر وبيفهموا عنكم
البنت : أه عشان كده دخلوا المجمع

وكومنتات تانيه كتير
المهم أنا رحت حاطط كومنت بيقول

" على فكره يا جماعه مش ذنب أى ولد إنه وحش ، مش ذنب أى بنت إنها مش حلوه لكن ذنب كلاهما إن تكون أخلاقهم هى إللى مش حلوه أو أسلوبهم وتصرفاتهم وحشه
ثانيا إحنا إزاى نربط جمال أو وحاشه الشاب أو البنت بالكليه !
لو مثلا عندنا شاب جميل جدا بس ربنا موفقهوش وراح المجمع يبقى برده حيتقال عليه وحش لمجرد إنه ف المجمع
وكذلك لو عندنا بنت وحشه بس ربنا وفقها ودخلت فنون جميله حيتقال عليها برده حلوه لمجرد إنها فى فنون جميله
الموضوع يا جماعه ليس له علاقه بالكليه دى حاجه بتاعه ربنا "

راحت الناس معلقه عليا وقالوا

الشاب : على فكره يا خالد إنت معقد جدا
البنت : إيه ده مين إللى محبكها كده !

طبعا معلقتش تانى بس فضلت أشوف كومنتاتهم
المهم
أى حد يدخل يقول رأيه فى الحوار كله ...