الحقد والغيره الحق والإيمان وأعداء النجاح

[هنا الفقي]

المشاركة الأصلية كتبت بواسطة mohammed.el_sadat

بسم الله الرحمن الرحيم

السلام عليكم ورحمه الله وبركاته
وعليكم السلام ورحمة الله وبركاته
بقالنا كتير ما شفناش الانوارات دي كلها

بقالى فتره طويله كنت بعيد عن الكتابه وخدت طريق نقل المواضيع اللى بقرأها وتعجبنى بجد مكنش ليا نفس أكتب ولا ليا نفس أتكلم أكتر من مره فكرة بالرحيل للأبد وأبطل أدخل المنتدى لكن وبكل أسف كنت كل مره بفشل وبرجع تانى ليه مش عارف أنا بجد بحسد كل عضو فعلاً قدر ياخد قرار الرحيل وميرجعش عارف إن كلامى ملوش علاقه بالموضوع بس أهو بفضفض معاكم شويه قبل ما أدخل فى الموضوع إنتو عارفين إن ساعات بحس إن المنتدى ده بيتى يمكن يكون ده المكان الوحيد اللى بكون مستريح فيه بتكلم فيه بحريه بقول اللى أنا عاوزه بكل جرأه ومن غير خوف من أى قيود بحس هنه بطعم الحريه عارف إنى الفتره الآخيره دى كنت مضرب شويه فى قراراتى خسرت حاجات كتير وخسرت ناس أكتر فقدت ناس كل ذنبهم إنهم حبونى بإخلاص وجرحت ناس بجد أنا حبتهم .

تعالو ندخل فى الموضوع عشان متزهقوش ومحملكوش مشاكل بس كل الحكايه إنى حبيت أعتزر فى البدايه لكل شخص جرحته زعلته هزيت ثقته فيه فياريت كلكوا تسمحونى

أكيد طبعاً الموضوع غريب وفى نفس الوقت واضح من عنوانه

الحقد والغيره الحق والإيمان وأعداء النجاح


الموضوع ياجماعه إنى شايف ظاهره فى المنتدى بجد غريبه ودى كانت السبب الأول فى معظم قراراتتى فى الرحيل والإضرابات اللى حصلتلى طبعاً مش فاهمين حاجه بس السؤال ده هيوضح شويه


كل فتره بيظهر عضو متميز جداااً وناجح جداااً ورائد بأفاكره مثال جميع للعضو المرغوب فيه وفجأه العضو ده يا يتقلب 180 درجه يايختفى بدون أسباب أو بأسباب شغب وضياع حق

طب


إشمنعنى مبيحصلش كده غير مع العضو الناجح بس


؟!

الحكاية بس اننا لما بنشوف شخصية بتعمل حاجة حلوة مرة واحده بنبهر بيها بدون ما نفكر ف ابعاد العمل ده او نحاول نفهم العضو ده بيفكر ازاي بالاضافة لاننا كتير اوي بنقدم الظن السيء على اول فعل خاظئ بيصدر منه مش عارفه ارتب الكلام اوي بس اهو اللي جه فبالي اتكتب

لو فكرت كويس وشغلت عقلك هتلاقى إن السبب الوحيد المنطقى هو عنوان الموضوع " الحقد والغيره الحق والإيمان وأعداء النجاح " العضو مسافه ما يبدأ يظهر تلاقى كل الأنظار عليه بتبصله نظره حقد وغل وغيره العضو اللى كان زمان معاه وواقف جنبه فجأه بقه ضده واللى كان دائماً بيشجعه بقدره قادر بقى بيصطاد أخطاؤه واللى كان بيستنى مواضيعه عشان يقرأها بقى بيقعد يتفرج على منظر الردود فى الموضوع وهو بيعلى ويقول إشمعنى هو ده موضوع يستاهل النقاش ده كله هما مدينه أكبر من حجمه كده ليه دا لسه مشترك من يومين أنا أحق منه أنا أفضل منه أو عشان يرضى غروره ويحاول يخدع نفسه وإنه فعلاً مش بيحقد عليه ولا غيران منه يقول فيه أعضاء تانيه ومواضيع تانيه أحسن منه ومش واخده حقها ويبدأ تنشأ عداوه بينهم وتزيد يوم عن يوم لحد ما فى يوم وليله يتقلبو من أصحاب لأعداء ودائماً يحاول يعجزه ويكسره وننقسم لأحزاب وكل حزب بيكره الحزب التانى
مش هاتحكم ف حد واقول بلاش احزاب والاحزاب دي حاجة وحشة لكن بس احنا فقدنا لغة الحوار شوية شباب مش عارفين نتفاهم مع بعض ونتكلم بهدوء مش واخدين بالنا ان الاءمه الاربعة كان كل واحد بيقول كلام غير التاني الى حد ما طبعا عشانده دين واحد لكن اللي اتقابلو منهم كانو في منتهى التواد والتفاهم ,,,, وتنشأ المصالح والحق يتقلب باطل والباطل يتقلب حق ونمشى نقول ورى بعض آمين سواء صح أو خطأ المهم مصلحتى ثم مصلحتى أنا لو قولت ورى محمد آمين هينصرنى ضد أحمد حتى لو كنت أنا غلطان وبسبب الحكايه دى ياجماعه بتتولد المشاكل وتنشأ الصرعات وبدل ما نوجه جهودنا ونوحد أهدفنا للخير والإفاده بنوجها ونسددها للشر والتعجيز ونخسر بعض ومع الوقت بنخسر نفسنا وبنخسر ناس كتير حبناهم ولما بنفوق دا لو فوقنا أصلاً بنفوق بعد فوات الأوان بعد ما بيكون وقت الندم والإعتزار فات وكل واحد شاف طريقه واللى إتظلم رحل مكسور حزين باكى على الأيام اللى سهر يكتب فيها ويدى فيها خبرته ووقته لناس متستهلش .

كلامى عن اللى بحصل ده نقطه فى بحر عميق بس أنا بحاول على قد ما أقدر أوضح الصوره اللى وصلنا ليها

فى نقطه كمان عاوز أتكلم فيها وهى الجزء التانى من العنوان


" الحق والإيمان "

إحنا ليه ياجماعه بنكره الحق ليه لو غلطنا ومحمد دخل قال يا أحمد إنت غلطان يقوم أحمد يشيل من محمد ويقوله إنت منصرتنيش إنت بعتنى وقت ماكنت محتجلك


ميعرفش إننا فعلاً وقفت جنبك أكتر مما تتخيل مقتديا بحديث سيد الخلق أجمعين حين قال " إنصر أخاك ظالماً أو مظلوماً " وناس كتير فهمه الحديث هنه غلط المقصود هنه ياجماعه إنك لو ليك حق أقف جنبك وأساعدك إنك تاخده ولو عليك إنت الحق أرجع لصاحب الحق منك حقه وبكده أكون نصرتك وإنت مظلوم ونصرتك وساعدتك ووقفت جنبك وإنت ظالم

ودى بردو ياجماعه نقطه بتزعل ناس كتير جداااً من بعضها وبتشتت وتفرق جمع أحباب وأصدقاء عن بعض .


رغم إن كلنا عارفين ومتأكدين


" إن الساكت عن الحق شيطان أخرس "

نيجى للنقطه التانيه الإيمان


إحنا ليا لما حد يتكلم ويتناقش فى قضيه ويقول قال الله وقال الرسول ودنا بيقول كذا والقرآن بيقول كذا والسنه بتقول كذا بنتريق عليه ونقول إنت عامل فيها شيخ الحرامى بيستخبى فى سبحته يمكن النقطه دى مش بتبان أوووى فى ردودنا فى المنتدى لكن صدقنى الشخص ده بيحس بيك وباللى فى قلبك وعقل تجاهه حتى لو كان تصرفك وردك مخالف لشعورك

فعلا شعورة وكلامة واحساسه بيوصل نصا وصاحب الموضوع يقرا الرد ويحس ويقول ف نفسه ربنا يهديك وتفتكر اني كنت عاوز مصلحتك

نيجى لنقطه تانيه بردو

إحنا ليه مبنديش فرصه لبعض ليه الإنطباع الأول عن الشخص مبيتغيرش إلا للحاله الأسوء يعنى لو شخص كان فى البدايه مشاغب ومع الوقت وإكتساب الحكمه ربنا هداه وبقى كويس ليه بنفضل نضطهده ونحاربه ونقوله ياما فى جرابك ياحواى إنت بتحاول تحسسنى إنك بقيت محترم إنت فاكر الكلام ده هيخيل عليا مش لايق عليك الإحترام إنت وحش وهتفضل طول عمرك وحش عمرك ما هتبقى كويس أبداً .

حكمة/انت تحتاج ل10 سنوات لتبن لك سمعه طيبة في مكان ما ::ول10 دقائق لهدم كل ذلك....

كل اللى فات ده يجماعه

عدو للنجاح بيأدى للفشل ويدعو للإحباط ونرجع نقول هى الناس بتمشى ليه طب ليه من البدايه محبناش بعض ليه موقفناش مع بعض وشجعنا وقوينا بعض ليه مبنكملش بعض ليه مش إيد وحده جسد واحد روح واحده ليه البنت دى مش أختى والولد ده أخويا واللى يفرحه يفرحنى واللى يزعله يزعلنى ليه مش حسين ببعض ليه ميبقاش طرقنا واحد بدام فى النهايه هدفنا واحد ليه منتسندش بعض واللى يتعب يلاقى أخوه أو أخته فى ظهره إيه شعورك لما تغيب فتره وتلاقى الناس كلها حوليك ملهوفه عليك ويقولو من قلبهم أخونا فين صدقنا فين ليه إحنا مش كده ليه إخترنا بزور الشر وزرعناها فى قلبنا ورمينا بزور الخير وقلنا دى مش مننا ليه منتغيرش من اللحظه دى ونقف مع بعض واللى زعلان من حد يبعتله رساله ويصالحه واللى جرح حد يطلب منه يسامحه ياجماعه إحنا كويسين وطيبين بالفتره بلاش نلوث نفسنا تعالو نبدأ صفحه جديده كلنا مع بعضنا صفحه كلها حب وإخاء صفحه بيضه مفهاش نقط سوده وبلاش نطعن بعض فى فى ظهره عشان محدش يطعنا وينهشنا فى ظهرنا .

عارف إنى رغيت كتير وصدعت دماغكم بس أنا حاسس إن إحتمال دى تكون آخر أيامى معاكم فحبيت ألفت نظركم للحال اللى وصلناله وأنتهز الفرصه وأعتزر لكل شخص زعلان منى أو شايل منى وتأكدو ياجماعه إن مسامح كل شخص غلط فيها أو أساء ليا وربنا يوفقوا جميعاً يارب .

حقيقة :انا لو عرفت عضو جديد لمده يوم واحد وعرفت انو حد كويس وشخصية ايجابية ومشي تاني يوم ممكن تقول اني بيجيني شبه اكتئاب ودي بجد والله العظيم
اصبح المنتدى يمثل جزء كبير جدا من حياتي لا اتحمل ان واحد كويس يمشي منه
او تحصل فيه اي خلافات

ياريت تتحفنا بالروائع دي يا محمد على طول

السلام عليكم ورحمه الله وبركاته

وعليكم السلام ورحمة الله وبركاته

[شمس بياض]

الموضوع دا شدنى قوى

وخاصه العنوان واستغرقت فى قراءته

فهو يستحق مضمونا ومعانى ساميه

صدقنى ذاد احترامى لشخصكم الكريم

وهدى الاعضاء والمشرفين الى مافيه رضا الله

[يوسف الشوري]

المشكله ان الموضوع بيبقي غيره في الاول وبعد كدا لما تلاقيك مش قادر تتفوق عليه بينقلب الوضع ربنا يحفظنا من كدا