ما هى احسن كلية ادبية من حيث الشغل ؟؟؟

[sannofa]

أنا بقى اللى احترت منكوا كلكوا انا بقى اللى لسة فى ثانوى وكل الناس حيرتنى اللى يقول اقتصاد وعلوم سياسية واللى يقول تجارة انجل واللى سياحة وفنادق كل واحد برأى انا بجد احترت ومش عارف ادخل اية ... أرجوكم زى ماشتتونى قولولى ادخل اية ؟؟؟؟؟؟؟؟؟؟؟؟؟؟؟؟؟؟؟؟؟؟؟

[eslam_2009]

المشاركة الأصلية كتبت بواسطة sannofa

أنا بقى اللى احترت منكوا كلكوا انا بقى اللى لسة فى ثانوى وكل الناس حيرتنى اللى يقول اقتصاد وعلوم سياسية واللى يقول تجارة انجلش واللى سياحة وفنادق كل واحد برأى انا بجد احترت ومش عارف ادخل اية ... أرجوكم زى ماشتتونى قولولى ادخل اية ؟؟؟؟؟؟؟؟؟؟؟؟؟؟؟؟؟؟؟؟؟؟؟

تجارة انجلش كلية القمة فى الادبى من الاخر يعنى وده حسب اللى بشوفه مفيش حد اتخرج منها وأعد فى البيت بيشتغلوا فى كل حاجة (بنوك , شركات السمسرة او البورصة , وشركات الاستيراد والتصدير , ........) .

وبعدين حكاية الكليات دى حاجة ترجعلك فى الاخر ومحدش ينسى ان الكلية اللى هايخشها ممكن تكون صعبة او سهلة يعنى متبصوش للكلية من حيث التوظيف وبس .

[GeNeRaL MB]

ايوه انا فى تجاره انجلش وكل الدكاتره بيقولنا كده الكليه الوحيده الى ليها شغل دلوقتى بس شغلك كلو بره مصر

[إبن النيل والتاريخ]

مع إحترامى للجميع من وجهة نظرى السؤال الخطأ يؤدى إلى إجابة خاطئة ، ودخول الكلية ليس من أجل العمل وإنما من أجل التحصيل العلمى ، والجزئية الأخيرة قد تطرح بابا واسعا للنقاش وهو هل دخول الكلية من أجل العمل أم الشغل ، لا شك أن الآراء ستتضارب ، وإذا اتفقنا على إجابة هذا السؤال وأعتقد أنه مستحيل ، فستكون الإجابة على سؤال حضراتكم سهلة للغاية .
لأننى من وجهة نظرى دخلت "التخصص" الذى أحلم به لإقتناعى بأن قدراتى ومهاراتى فيه ، وأن التخصصات الأخرى لن أستفيد أو أفيد ، والحمد لله . لذلك أنصح كل طالب بأن يدخل الكلية التى سيتطيع أن يظهر قدراته وغبداعاته المختلفة بغض النظر عن المقابل المادى ، فالراحة النفسية لا تقدر بثمن .

[إبن النيل والتاريخ]

تصويب

العمل والشغل والصحيح العلم والعمل أو العلم والشغل .
وغبداعاته = وإبداعاته

[S-a-R-A]

كلية اقتصاد وعلوم سياسية

[Ra-Shere]

لولا اختلاف الآراء لبارت السلع

بالنسبه للكليات فكلها كويسه جدا


وبالنسبه للشغل فدي ارزاق في وفي

بس من وجهه نظري كليه التجاره من حيث الشغل

وركزوا معايا انا بقول الشغل مش المرتبات

لان كل مكان محتاج محاسبين وسكرتاريه

اما بالنسبه للمرتبات

فأفضل كليه الاقتصاد والعلوم السيايسه

ده مجرد رأي لا اكثر

[eslam_2009]

كويس ان انا كتبت الموضوع ده عشان يبقى دليل استرشادى للطلبة اللى لسه هيدخلوا الكلية ,,, ويحتاروا اكتر !!!

بس انا الصراحة شايف اقتصاد زى تجارة , وعلوم سياسية زى حقوق يعنى كلية الاقتصاد والعلوم السياسية = حقوق + تجارة ,
بس هى مركز واسم ومحموع يعنى اسمك خريج سياسة واقتصاد جامدة برضو .

بس انا انصحكوا ادخلوا تجارة انجلش هى اللى بتجيب من الاخر .

[sosa english]

[تربيه
تربيه
تربيه
حسن كليه

[sannofa]

بصوا بقة انا اللى شايفة ان كل واحد بيختار كليتة عشان يقنع نفسة بيها لكن كل واحد شايف كليتة كويسة فى احسن منها يعنى اللى بيقول ان سياسة وأقتصاد = حقوق وتجارة معلش يعنى جة يبقة مابيفهمش لأن دلوقتى أكتر اللى مش لاقيين شغل خريجى حقوق وتجارة عربى وأنجلش بس هما اللى بيشتغلوا لو جايبين تقدير كويس وكلية سياسة وأقتصاد شغلها مضمون جدا ومرموق جدا لو تفوقت فيها وجبت تقدير كويس وعلى العموم الواحد لو فى كلية زراعة وجاب تقدير كويس واثبت نفسة هايعمل اى حاجة فى الدنيا بلاش نتلكك فى الكلية وليها شغل ولا ملهاش مافيش حاجة ماليهاش امال اتعملت لية بس بردو انا شايف سياسة واقتصاد كلية قمة وبعديها سياحة وفنادق وبعدين تجارة وأخر كلية ممكن تفكر تددخلها هيا حقوق وخدمة أجتماعية . وربنا هايفقنا كلنا بس كلكوا شدوا حيلكوا من بدرى وماتمشوش بدماغ حد تانى امشى ورا اللى بتحبة وهاتعرف تمشى فية مهما كان الكلام علية اللى بيمشى ورا كلام الناس عمروا مابيفلح ....

[GAMALEWEES]

واللة لو دخلت اية برضة مش هتشتغل هما كانو القبلكم اشتغلوا علشان انتو تشتغلوا و العايز يشتغل بالواسطة يعنى كل الكليات محصلة بعضها و منكرش ان انا عايزة ادخل كلية كويسة جدا لان مجموعى كان جايب السنةالفتت فى ثانية لوحدة من غير السنة دى يدخلنى تجارة انجلش او تربية او اداب

[eslam_2009]

المشاركة الأصلية كتبت بواسطة gamalewees

واللة لو دخلت اية برضة مش هتشتغل هما كانو القبلكم اشتغلوا علشان انتو تشتغلوا و العايز يشتغل بالواسطة يعنى كل الكليات محصلة بعضها و منكرش ان انا عايزة ادخل كلية كويسة جدا لان مجموعى كان جايب السنةالفتت فى ثانية لوحدة من غير السنة دى يدخلنى تجارة انجلش او تربية او اداب

لو كل طالب قال لنفسه كده وهو فى لسه فى ثانوى مش هيخش كلية قمة ولا حتى تجارة , لاننا هنبقى محبطين بحكاية الواسطة والبطالة والكلام ده , وطبعا كل واحد فى ثانوى عارف اللى مفيش شغل بس احنا بنذاكر ونخش كلية حلوة عشان لو فى فرصة جتلنا منجيش نعيط بعد كده و...

اصل حكاية الحصول على مؤهل عالى فى الزمن ده اقل حاجة .

بس انت برضو معاك حق فى حكاية الواسطة دى بس احنا بنعمل اللى علينا والباقى على ربنا وان الله لا يضيع اجر من احسن عملا .

[حسين المغربى]

ولا كليه
مفيش شغل فى بلدك الوقتى بالشهاده !!!!!!!!!!!
متستغربش الوقتى تتخرج وتشوف بنفسك
مسنعجل ليه

[Eslam_Tourism]

انت تتخرج من تجارة وتاخد icdl اللى بقت اجبارى فى زمنا ده وتاخد ...........الخ

وفى الاخر تروح لبنك واكيد هتلاقى طابور المتقدمين للوظائف تخش هتلاقى خريج اقتصاد على خريج معاهد تجارية وجامعات خاصة وغيرهم وبعد كده تروح لشركة تانية تلاقى الجماهير الغفيرة من المتقدمين عشان الوظائف وده طبعا مظهر اساسى لكل خريج دلوقتى وده طبعا المنظر اللى هاشوفه بعد ما اتخرج واعد سنتين تلاتة.........

دلوقتى لازم يكون شعار كل طالب جامعى لا للاحباط ......

كلمة قالها السيد الرئيس القادم جمال مبارك البطالة هتزيد الايام القادمة .

وحتى الطب والهندسة البلد تلاقى دلوقتى اللى قلب بيته مكتب هندسى واللى عمال يكشف على قرايبه بيجرب فيهم بس ربك هو الرازق ولازم نكون رافعين شعار " لكل مجتهد نصيب "

بس هى ساعات بتجى كده فرص متتعوضش يعنى مثلا فى واحد قريبى خريج اداب قسم اعلام شغال دلوقتى برة مصر وبمرتب فل 2000 دولار بس هو خريج من 6 سنين يعنى صبر ونال .

يا جماعة احنا فى مصر ام الدنيا بلد العجائب .

[الاسطورة]

الموضوع ده ضحكنى جدآ جدآ على فكرة
الاخوة اللى بيقولولك تجارة انجلش احسن من اقتصاد وعلوم سياسية
هههههههههههه
ايه يا جدعان صح النوم انتوا مهيسين ولا ايه
تيجى ايه تجارة انجلش جنب اقتصاد وعلوم سياسية
الحكاية دى عاملة زى اللى بيقارن تامر حسنى بالهضبة عمرو دياب !!

ربنا يوفق الجميع وان شاء الله الكل يشتغل ف احسن حاجة