لطلاب الثانوية اسالنا اى سؤال عن اى جامعه - الصفحة 55

vampire1188 · #**811** 11-07-2009, 12:57 AM

اقتباس:

ممكن بعد اذنك تطمنى على تنسيق كلية الهندسة حينزل ولا لآ السنة دى 2009 وشكرا جدا

انا مش بعلم الغيب عشان اقولك هاينزل ولا لأ .. كله على حسب حلول الطلبة ومستوى الامتحانات

ومش شرط عشان يبقي مستوى الامتحانات سهل يبقي التنسيق مرتفع

ما ممكن يبقي الامتحانات سهلة والطلبة ماحلوش حاجة .. يبقي في الحالة دي التنسيق هاييجي واطي

هيا بتبقي مسألة نسبة وتنساب مش اكتر وربنا يجيب اللي فيه الخير

HODDA · #**812** 11-07-2009, 04:32 AM

مشرفنا القدير لك وافر الشكر والاحترام مش عارفة اقولك ايه علي اهتمام حضرتك ... ممكن اسأل عاوزة اقدم في جامعة 6أكتوبر كلية الاعلام لازم اروح تاني يوم للنتيجة ولا ممكن انتظر اسبوع مثلا مع العلم اني في ثالثة ثانوي

alaahelal · #**813** 11-07-2009, 11:59 AM

ممككن لو سمحت أسعار الهندسة بالجامعات الخاصة

vampire1188 · #**814** 12-07-2009, 07:31 PM

اقتباس:

ممكن اسأل عاوزة اقدم في جامعة 6أكتوبر كلية الاعلام لازم اروح تاني يوم للنتيجة ولا ممكن انتظر اسبوع مثلا مع العلم اني في ثالثة ثانوي

بعد ما التنسيق بتاع الجامعات الحكومية بيخلص بيتم فتح طلبات الالتحاق ..

دا غالبا بيبقي بعد ما نتيجة المرحلة بتخلص سواءا كانت اولي او تانية او تالته

فانتي اول ما نتيجة التنسيق بتاعة المرحلة الاولى ماتخلص خدي ورقك وروحي قدمي في الجامعة

وبما انك عايزة 6 اكتوبر فياريت يكون الموضوع بدري شوية .. عشان الجامعات دي بتمشي بأسبقية الحجز

vampire1188 · #**815** 12-07-2009, 07:39 PM

اقتباس:

ممككن لو سمحت أسعار الهندسة بالجامعات الخاصة

جامعة 6 اكتوبر >> 21850 للسنة الأولى

جامعة مصر الدولية >> 27300

جامعة مصر للعلوم والأداب >> 21800

جامعة فاروس >> اللي جايبين اعلي من 85% : 10500 ، اللي جايبين مابين 70% لـ 85% : 11550

مودرن اكاديمي >> 10000

vampire1188 · #**816** 13-07-2009, 12:08 AM

اقتباس:

لو سمحت عايز اعرف كل حاجة عن كلية الهندسة الجامه الامريكية اسعارها و مجموع كام شكراااا معلش سؤال مكرر ارجو ان تكون استفسرت اكثر وياريت المجموع

بص بقي يا سيدي .. اولاً انا آسف لو كنت اتأخرت في الرد

بس بجد انا كنت بسألك فعلا ناس صحابي بيدرسوا هناك عشان المعلومات تبقي مظبوطة ومش غلط

دلوقتي انا هايدك شوية معلومات عشان يبقي عندك خلفية

الجامعة فيها حوالي 3 اقسام رئيسية .. وفيه قسم رابع بس دا سيبك منه

التلات اقسام دول هما :

1- قسم العلوم الاجتماعية ( HUSS ) :

دا بيضم اقسام فرعية زي .. دراسة الحضارة الاسلامية والعربية ، انجليزي وادب مقارن ، تاريخ ، قانون ، فنون ، فلسفة ، علوم سياسية ، الخطابة والكتابة ، علم النفس ، المصريات ، الإجتماع .... الخ الخ

2- قسم الأعمال والاقتصاد والاتصال ( BEC ) :

دا بيضم 3 تخصصات رئيسية .. قسم التنظيم ، قسم الاقتصاد ، قسم الإعلام

3- قسم العلوم الطبيعية والهندسة ( SSE ) :

دا بيضم جميع الاقسام المختصة بكليات الهندسة والعلوم زي .. الأحياء والكيمياء والفيزياء والحاسبات والالكترونيات والبترول .. الخ

دي كانت نبذة عامة عن أقسام الجامعة الامريكية الرئيسية

انتا دلوقتي بتسأل عن كلية الهندسة ..

دلوقتي قبل ما اديك اي معلومة عن كلية الهندسة لازم تعرف ازاي انتا بتقدم وتلتحق بالجامعة اصلا

انا هاقولك الخطوات واحده واحده ان شاء الله .. وبالأسعار كمان ( بس ماتتخضش)

دلوقتي انتا راجل خلصت ثانوية عامة وظبطت حالك .. وقولت انا عايز اخش الجامعة الامريكية

كل اللي انتا هاتعمله هاتتوجه الى مقر الجامعة اللي في القاهرة الجديدة

(واوعي تروح للي في باب اللوق عشان دا خلاص اتلغي)

وهاتتلاقي ناس قاعدة هناك هاتقولهم انا عايز التحق بالجامعة ..

مبدأيا هما طبيعي هايدوك حاجة اسمها Application form .. دا تمنه 250 جنيه

هاتتلاقيه حوالي 6 ورقات او اكتر .. وانا عندي نسخة منه هنا لو عايزها يعني

بعد مابتكتبه بتقدمه هناك لحتة اسمها Registarer .. هما بياخدوها منك وساعتها بقي بتبدأ تخضع للاختبارات بتاعتهم

ايه بقي الاختبارات دي ؟؟؟

الاختبارات دي عبارة عن اختبارات في الانجليش عشان يشوفوا مستواك في اللغة هل هايسمحلك انك تتماشى معا دراسة الجامعة ولا هاتبقي ضعيف .. عشان كدا بتخضع للاختبارات دي غصب عنك .. حكاية بقي انهم يقبلوا مجموع انجليزي في ثانوية عامة او كدا لا مابياخدوش هما بالكلام دا .. هما بيعاينوك مباشرة كدا منك ليهم عشان هما بنفسهم يحكموا .. وخلي بالك ان الاختبارات دي صعبة ومش سهلة

فيها منها نوعين .. اختبار ELPT ودا تمنه 250 جنيه .. واختبار EWAT ودا تمنه 125 جنيه

لو ربنا كرمك وعديت منهم .. بتستني لغاية لما نتيجة القبول تظهر .. اذا ظهرت بيبعتولك حاجة اسمها Acceptance Letter على العنوان اللي انتا كنت كاتبه في الابليكيشن اللي قولتلك عليه في الاول .. ودا بتدفع عليه رسوم حوالي 300 جنيه

بعد كدا ساعتها نقولك مبروك انك دخلت الجامعة الامريكية ..

دلوقتي بقي نقولك شوية معلومات سريعة حوالين كلية الهندسة اللي انتا عايزها دي

1- الكلية فيها كذا قسم .. حاسبات ومعلومات ، معماري ، الكتروني ، رياضة واكتواري ، بترول

2- التخصص مسموحلك انك تكتبه في الابليكيشن اللي في الاول خالص .. وممكن تستني لغاية السنة التانية بس دا بيبقي على حسب مجموعك اللي هوا اسمه GPA

3- عدد الساعات 166 ساعة تقريبا في اي قسم

4- مدة الدراسة مش مشروطة بعدد سنين محدد .. لكن انتا لازم تخلص جميع المواد اللي عليك في مدة اقصاها 8 سنين (عشان انتا هندسة)

5- زي مافيه رتب لقيادات الجيش .. زي مابرده فيه رتب للطلبة هناك .. بمعني ايه ؟ بمعني ان اللي لسه بادئ الجامعة وماخلصش حاجة دا بنسميه freshman .. اول مابيخلص الـ 30 ساعة بنسميه sophomore .. واما بيوصل ويخلص 60 ساعة بنسميه junior .. واما بيوصل لـ 90 ساعة بنسميه senior

6- لو غيبت اكتر من 3 اسابيع (سواءا باستمرار او متقطعين) خلال المادة الواحده بتسقط في المادة دي

7- اقصي عدد ساعات مسموحلك بيه في السيمستر الواحد 18 ساعة

8- بما انك 18 ساعة .. فدا يخلي المصاريف بتاعتك تخش في حيز الـ 57000 جنيه (في الترم الواحد)

normde · #**817** 13-07-2009, 02:27 AM

لو سمحت ممكن تقولي علي جميع الكليات الخاصة اللي فيها تخصص إعلام ومعلش تبقي بالعنوان والمصاريف شكرا

nehal kamal · #**818** 13-07-2009, 03:23 AM

السلام عليكم اولا عايزه اشكر بجد الجهود الي بتعملها علشانا

ثانيا انا خلصت ثانويه عامه بس انا مش بدرس في مصر بدرس في السعوديه انا مصريه
عايزه اعرف ايه النظام بيبقى لينا يعني نفس المجاميع بتاعة الي درسوا في مصر

انا جبت في تانيه ثانوي 90% لسه النتيجه ما طلعتش بتاعة ثالته

ومعلش عايزه اعرف كلية تجاره الي في اسكندريا بتاخد من كام بالنسبالي
وشكرااااااا

اللهم ادخلني الفردوس · #**819** 13-07-2009, 11:12 AM

بليز كنت عايزه اعرف كليه اداب انجليزي بتاخد من كام في ماده الانجليزي , ياريت حد يرد عليا ضروري

shrshr2007 · #**820** 13-07-2009, 01:26 PM

جزاك الله خيرا علي الافادة ممكن معلومة بيشترطوا مجموع كام

vampire1188 · #**821** 13-07-2009, 05:39 PM

اقتباس:

لو سمحت ممكن تقولي علي جميع الكليات الخاصة اللي فيها تخصص إعلام ومعلش تبقي بالعنوان والمصاريف شكرا

1- جامعة 6 اكتوبر :

> العنوان : ليها طريقين .. طريق من الهرم وطريق من الكوبري الدائري

الهرم .. هاتاخدها من ميدان الرماية على طريق الفيوم طوالي .. هاتتلاقي على شمالك وانتا رايح مدينة الانتاج الاعلامي وعلى يمينك دريم لاند (طريق الواحات) لغاية ماهاتتلاقي مدخل مدينة 6 اكتوبر في وشك .. اسأل على ميدان الحصري وروحه هاتتلاقي الجامعة في وشك

الكوبري الدائري .. هاتنزل محور 26 يوليو هاتاخده طوالي لغاية ماتوصل للحي السابع .. اسأل على ميدان الحصري فين وبرده هاتتلاقي الجامعة في وشك

> مصاريف كلية إعلام : 13000 في السنة .. ودا تليفونهم .. 38355281

جامعة مصر الدولية :

> العنوان : الكيلو 28 طريق مصر الاسماعيلية (مجمع احمد عرابي)

> مصاريف كلية اعلام : 26250 .. ودا تليفونهم .. 44771560

جامعة فاروس (الإسكندرية) : مافيهاش اعلام

جامعة النهضة :

> العنوان : طريق جامعة النهضة - مدينة بني سويف الجديدة

> مصاريف كلية اعلام : مابين 7000 لـ 9000 على حسب المجموع + 1000 جنيه رسوم ادارية

جامعة مصر للعلوم الحديثة والآداب msa :

> العنوان : تقاطع محور 26 يوليو مع طريق الواحات - مدينة 6 اكتوبر

> مصاريف كلية اعلام : 12000 .. ودا تليفونهم 38371543

vampire1188 · #**822** 13-07-2009, 05:56 PM

اقتباس:

انا خلصت ثانويه عامه بس انا مش بدرس في مصر بدرس في السعوديه انا مصريه
عايزه اعرف ايه النظام بيبقى لينا يعني نفس المجاميع بتاعة الي درسوا في مصر

اللي اعرفه ان اللي جايين من السعودية او من اي دولة من دول الخليج بيبقالهم تنسيق خاص بيهم ..

بعيدا عن اي تنسيق تاني .. وميعاد التنسيق بتاعكوا عادة مابيكون في منتصف شهر 8 ..

و الكلام دا بيكون بعد انتهاء تنسيق المرحلة التالته للمصرين المقيمين في مصر

كل اللي بيحصل ياستي انك بتوثقي ورقك من الخارجية هناك في السعودية

وتيجي مصر تختمي الورق بتاعك من القنصلية السعودية هنا ..

وتظبطي حالك وتروحي تقدمي في التنسيق ..

ودا بيبقي مقره في مدينة الطلبة قدام جامعة القاهرة على طول

بالنسبة للتنسيق فدا بيتقسم لدرجات .. فيه درجة اولي وتانية وتالته على حسب مجموعك

درجة اولي دا بيبقي من 90 % فيما فوق .. وتانية دا من 80% لغاية 90% .. وتالته من 80% لتحت

ودي الطلبات اللي هما تقريبا هايعوزوها .. جيبتهالك من منتدي تاني (للأمانه يعني)

اجمالى المستندات المطلوبه للتنسيق :
1- طلب التحاق ( استماره 55 تنسيق ) وهى موجوده فى مظروف التنسيق الذى ستشتريه.
2- أصل شهادة ثالثه ثانوى كاملة التصديقات( الاداره التعليميه - الخارجيه السعوديه - السفارة المصريه ) +عدة صور منها .
3- أصل شهادة ثانى ثانوى كاملة التصديقات +عدة صور منها .
4-أصل شهادة الميلاد المصريه كمبيوتر.
5-عدد 6 صور شخصيه.
6- العام الماضى كانت أول تجربة التنسيق الالكترونى فى مصر للشهادات المعادله ,, حيث عندما تستلم مظروف التنسيق ستحصل على رقم سرى لك واسم مستخدم لك تستطيع من خلاله الدخول على موقع التنسيق وكتابة معلوماتك ورغباتك ومن ثم طباعة رغباتك لأنها من ضمن المستندات المطلوب تسليمها .
7- بطاقة الاختيار ( الورقه الزرقاء وستلصق عليها طوابع رغباتك ويجب أن تكون مماثله للرغبات التى دونتها فى موقع التنسيق) وهذه البطاقه ستجدها فى مظروف التنسيق.
8- طلب تأجيل الخدمه العسكريه للذكور وهو يباع فى مكاتب البريد أو فى مناطق التجنيد .
استمارة الأنشطه الطلابيه ( ستجدها فى مظروف التنسيق ).
9-صورة الاقامه للطالب أو الطالبه أو لولى الأمر( هذا العام لا داعى لتصديها من السفارة المصريه بناء على ما التصرح الصادر من سعادة الدكطتور عبدالله التطاوى , المستشار الثقافى فى السعوديه)
10- صورة جواز ولى أمر الطالب( هذا العام لا داعى لتصديقها من السفارة المصريه )
11- صورة جواز الطالب- الطالبه نفسه أو الجواز المضاف اليه الطالب -الطالبه.
12- أصل جواز السفر للطالب أو الطالبه.
وفى هذا العام ,,, ستضاف نتيجة القدرات والتى سترسل مباشرة من مركز القدرات الى مكتب التنسيق فى مصر وليس مطلوب منك أن تقدم أى مستندات عن نتيجتك فى القدرات.

vampire1188 · #**823** 13-07-2009, 05:57 PM

اقتباس:

بليز كنت عايزه اعرف كليه اداب انجليزي بتاخد من كام في ماده الانجليزي , ياريت حد يرد عليا ضروري

اقل حاجة 48 من 50

vampire1188 · #**824** 13-07-2009, 05:58 PM

اقتباس:

جزاك الله خيرا علي الافادة ممكن معلومة بيشترطوا مجموع كام

لا عادي مش مشكلة المجموع .. بس اكيد يعني مش يكون تعبان اوي ..

Dr_memo_5_7 · #**825** 13-07-2009, 06:09 PM

انا عايز اعرف جامعة اكتوبر للعلوم الحديثة والاداب ايه سمعتها انا عايز اقدم اسنان لما اخلص ممكن يكون ليا فرصة سفر اي بلد للشغل كويت - امارات - قطر .....
يعني بيعترفوا بالشهادة ولا لا أرجو الرد السريع علشان عايز احجز مكان والي مخوفني انها ب 20000 وديت ارخص جامعة يعني 6اكتوبر ب 36100 ممكن لرخصها تكون مش معتمدة ؟؟؟؟؟؟؟؟