كل ماتريد ان تعرفه عن كلية العلوم ومقرراتها واقسامها ومجالات شغلها

[MOHMAED _ 2010]

كلية العلوم جامعة القاهرة ، كل ماتريد ان تعرفه عن الكلية ومقرراتها واقسامها ومجالات عملها.
****************************
اقسام الكلية: 24 قسم منهم 7 اقسام متاحة لطلبة علمى علوم فقط ، 8 اقسام متاحة لطلبة علمى رياضة فقط ، 9 اقسام مشتركة لطلبة علمى علوم ورياضة ، التخصص فيها بيكون من سنة تانية ، وطبعا فى اقسام بتحتاج تقدير عالى ، وقبل ما اتكلم علي الاقسام عاوز اقول انه فى سنه اولي بدرس 5 مواد اساسيه 3 منهم اجباري وهم ( رياضه – كيمياء – فيزياء).
ومادتين اختياري بيأهلوني للقسم اللي انا عايز ادخله في سنة تانيه وهم (فلك - جبر - احصاء - نبات - حيوان - حشرات - جيولوجيا - جيوفيزياء - بيولوجي - بيوفيزياء).
مواد اختياريه خاصه لعملي رياضه فقط (جبر - احصاء).
مواد اختياريه خاصه لعلمي علوم فقط (حيوان - نبات - حشرات - بيولوجي - بيوفيزياء).
مواد اختياريه مشتركه ينفع طلبة رياضه او علوم يختاروها (جيولوجيا - جيوفيزياء - فلك).
وبدرسهم فى الترم الاول 1 والترم التانى 2 يعني: (كيمياء 1) دى ترم اولى ، و (كيمياء 2) يعني كيمياء بتاعت الترم التانى وهكذا فى كل المواد الاجبارية ومعظم المواد الاختيارية.
ملحوظة: فى 4 مقررات اسمها متطلبات جامعة (انجلش ، حقوق انسان ، كمبيوتر ، مادة رابعة اختيارية من المواد دى "تاريخ وفلسفة ، مبادئ قانون ، ثقافة بيئية" ) ودول لازم تاخدهم فى اى سنة من الاربع سنين بس كنصيحة خدهم فى سنة أولى بتاخد 2 ترم أول و2 ترم تانى.
****************************
اولا: 8 اقسام لطلبة علمى رياضة فقط
****************************
1) رياضيات منفرد: ديه بقي رياضه باحته وتطبيقية يعنى لو بتحب الرياضه جدا خشه لكن انت كويس فيها مش بتحبها يبقي فكر فى حاجة بتحبها احسن ، شغله: معامل الابحاث او تاخد سنتين تربيه وتبقي مدرس ، وشروطه: تاخد جبر واحصاء وتنجح رياضة 2
مقررات القسم: http://sareg.sci.cu.edu.eg/pdfs/plans/27_1.pdf
****************************
2) علوم حاسب منفرد: بتاخد فى سنة اولى الترم الاول جبر واحصاء وفى والترم التانى جافا وميكانيكا ومجال شغلك واسع اوى فى الكمبيوتر والسوفت وير ورغم ان حاسبات و معلومات فيها سوفت وير ولكنها احسن لأنها بتدي المواد التطبيقيه في الواقع لكن في علوم حاسب بتاخد نظري كتير صحيح دماغك بتبقي حلوه في علوم حاسب لو خدت كورسات بره بتبقي عالى اوى ، وشروطه تدخله لازم تختار جبر واحصاء وتنجح فى رياضة 2 وجافا ، ولو اتخرجت بتقدير عالى تقدر تاخد منحة iti بس اتاكد بردو من موضوع المنحة ده لسه موجود ولا لاء
مقررات القسم: http://sareg.sci.cu.edu.eg/pdfs/plans/27_3.pdf
****************************
3) رياضة/فيزياء: قسم خاص يدرس الرياضيات والفيزياء والتجارب والقوانين والعلاقات الرياضيه والدوائر الكهربائيه ، شغله: مدرس او في معامل الابحاث بس و شروطه اخد جبر و اختار ماده من (احصاء - فلك - جيولوجيا - جيوفيزياء)
مقررات القسم: http://sareg.sci.cu.edu.eg/pdfs/plans/27_14.pdf
****************************
4) رياضة/احصاء : نفس الكلام بس بتاخد نص دراستك رياضه ونصها التانى احصاء ، وشروطه: انجح رياضة 1 & 2 بس
مقررات القسم: http://sareg.sci.cu.edu.eg/pdfs/plans/27_12.pdf
****************************
5) رياضة/علوم حاسب : نفس الكلام بس نص المواد من رياضه و نصها من علوم الحاسب ، شروطه: انجح فى رياضة 2 و س101
مقررات القسم: http://sareg.sci.cu.edu.eg/pdfs/plans/27_13.pdf
****************************
6) رياضه / فلك : بدرس مواد رياضه و مواد فلك و شغله في مصر في مرصد حلوان وعشان ادخله لازم اختار وانجح جبر وفلك.
مقررات القسم: http://sareg.sci.cu.edu.eg/pdfs/plans/27_15.pdf
****************************
7) فلك منفرد : زي رياضه فلك بس مش هاخد رياضه الا قليل قوي و نفس المواد الاختياريه بتاعت رياضة/فلك ونفس الشغل ، شروطه: النجاح فى فلك 1 & 2
مقررات القسم: http://sareg.sci.cu.edu.eg/pdfs/plans/27_8.pdf
****************************
8) فضاء منفرد: هو هو فلك منفرد ونفس الشروط والمواد الاختياريه بس الفرق ده فلك وده علوم جويه ، شروطه: النجاح فى فلك 1 & 2
مقررات القسم: http://sareg.sci.cu.edu.eg/pdfs/plans/27_9.pdf
****************************
ثانيا: 7 اقسام لطلبة علمي علوم فقط
****************************
9) كيمياء/كيمياء حيوي: قسم كويس جدا بيدرس العمليات الحيويه في جسم الانسان زي البروتين والفيتامينات والكربوهيدرات والاحماض النوويه والانزيمات والهرمونات والاورام وشويه بسيطه كده في البيولوجي بتاع الخليه و علم الوراثه و المناعه وتدرس فيها جميع التفاعلات الكميائيه الخاصه بالكائن الحى وخصوصا جسم الانسان وتدرس فيها الكميا العلاجيه زى المسكنات وخافضات الحرارة ومضادات البكتيريا والفطريات والفيروسات والطفيليات وهى من اقوى الفروع فى الكمياء وتتخصه من بيولوجى ، وشغله: بقي في معامل التحاليل بس لو عاوز يفتح معمل بأسمه لازم ياخد دبلومه تحاليل طبيه ووشركات الادوية وغيرها ، وشروطه: تختار ماده حيوان و ماده تانيه من (فلك - بيوفيزياء - جيولوجيا - جيوفيزياء - نبات - حشرات) و اجيب في كيمياء 1 & 2 جيد وتقدير عام جيد.
مقررات القسم: http://sareg.sci.cu.edu.eg/pdfs/plans/28_19.pdf
****************************
10) كيمياء/كيمياء ميكروبيولوجي: تدرس فيه كل فروع الكيمياء السابقة (حيويه وعضويه وتحليله وفزيائيه ) وايضا تدرس فيه كل فروع الميكروبيولوجى السابقة (البكتريا والفطريات والطحالب والفيروسات) وحياتها وكل حاجه و تأثير الميكروبيولوجي على الانسان والامراض اللي بيسببها والانزيمات والسموم الميكروبية والهرمونات النباتية ، وشغلها بقي موجود بردو في التحاليل وشركات الادويه وشركات الكيماويات ، وشروطه: لازم تاخد ماده نبات و ماده تانيه بقي من (فلك - بيوفيزياء - جيولوجيا - جيوفيزياء - حيوان - حشرات ) وانجح في نبات 1 & 2 وكيمياء 1 او كيمياء 2
مقررات القسم : http://sareg.sci.cu.edu.eg/pdfs/plans/28_21.pdf
****************************
11) بيوفيزياء منفرد: البيوفيزياء هي علم قائم بذاته و مختلف عن الفيزياء و الاحياء ، هو يعتبر تطبيق لمباديء الفيزياء وتقنياتها لدراسة تركيب ووظيفة الخلية الحية ودراسة للقوانين الفيزيائية التي تؤثر في الجزيئات الحيوية والعمليات الحيوية كما تهتم الفيزياء الحيوية بدراسة وظائف العين والاذن والاجزاء الاخرى من للجسم و كمان لها تطبيقات في الطب حيث توفر تفسيراً للعلاقات الوظيفية بين أجزاء الجسم و أيضا في دراسة نظام المناعة ضد الامراض وعندنا في علوم القاهره تم اعتماد أربع تخصصات رئيسية وهى: البيوفيزياء الجزيئية والبيوفيزياء الطبية و البيوفيزياء النظريه و البيوفيزياء البيئية وفي القسم مدرستين متخصصتين لهما النصيب الكبير من الاهتمام والتطور وهما البيوفيزياء الجزيئية والبيوفيزياء الطبيه ، وشغله: جوه وبره موجود في المستشفيات والمعاهد الطبيه زي الاورام ومعاهد الليزر وبحوث الاشعاع والبحوث النوويه والاشعاعات واثرها علي الخلايا وغيرها ، شروطه: انجح بيوفيزياء 1 & 2 وماده من ( حيوان - بيولوجي).
مقررات القسم: http://sareg.sci.cu.edu.eg/pdfs/plans/28_10.pdf
****************************
12) جيولوجيا منفرد: الجيولوجيا هي علم دراسه الارض و ده بقي شغله الموجود في شركات البترول وشركات المياه و جهاز شئون البيئه وقطاع الاثار كله شغل صحرا و سفر وحاجات جميله و ممكن نشتغل جيولوجين في مكاتب في ناس بتحب شغل المكاتب برضه لأنه كويس جدا ، شروطه: اختار مادتي جيولوجيا وحيوان وتقدير جيد جدا في جيولوجيا 1 & 2 و جيد جدا تقدير عام والقسم بياخد 10 طلاب فقط.
مقررات القسم: http://sareg.sci.cu.edu.eg/pdfs/plans/28_7.pdf
****************************
13) كيمياء/حيوان: يدرس ما يتعلق بالمملكه الحيوانيه وعلي رائسها الانسان فيدرس الفسيولوجى اي علم وظائف الاعضاء والامبريولوجى اي علم الاجنه والهيماتولوجى اي علم امراض الدم والسيريولوجى اي علم المناعه والاناتومى اي علم التشريح والباراسيتولوجى اي علم الطفيليات والبيولوجي بتاع الحيوان والفيسيولوجي وتشريح و الفقاريات و اللافقاريات وعلم الوراثه والانسجه والاجنه والمناعه ، وشغله: فى التحاليل الطبيه اذا حضر دراسات عليا في الطفيليات او في الهيماتولوجى اي امراض الدم وممكن يشتغل في اطفال الانابيب اذا حضر دراسات عليا في علم الاجنه وممكن يشتغل في اي مركز من مراكز البحوث المختلفه وغيرها و شركات الادويه و شركات كتير بقى احنا قولنا الكيميائين بيشتغلوا في اى حتة ، وشروطه: اني انجح حيوان وكيمياء 1 او كيمياء 2 واخد اى ماده تانيه من (فلك - بيوفيزيا - جيولوجيا - جيوفيزياء - نبات - حشرات).
مقررات القسم: http://sareg.sci.cu.edu.eg/pdfs/plans/28_22.pdf
****************************
14) كيمياء/نبات: يدرس كل ما يتعلق بالمملكه النباتيه ويختص بدراسه كل ما يتعلق بالنبات بداية من تشريح النبات ومناعه وفسيولجى وسلوك وتقسيم و وراثه وغيرهم والمورفولوجى والبيولوجي بتاع النبات وتصنيفاته والعوامل البيئيه اللي بتأثر فيه و التلوث والانزيمات والطحالب و شويه في علم الوراثه ، وشغله: في معامل الابحاث والتحاليل وشركات الادويه ، وشروطه: تاخد ماده نبات و ماده تانيه من (فلك - بيوفيزيا - جيولوجيا - جيوفيزيا - حيوان - حشرات) وانجح في كيمياء 1 او كيمياء 2
مقررات القسم: http://sareg.sci.cu.edu.eg/pdfs/plans/28_20.pdf
****************************
15) كيمياء/حشرات: بدرس بقي في القسم ده البيولوجي بتاع الحشرات و تشريح انسجه الحشرات و المورفولوجي بتاع الحشرات و تصنيفات و تقسيمات الحشرات و علم بيئه الحشرات و علم الطفيليات والوبائيات و لتحاليل الطفيليه والفيسيولوجي بتاع الحشرات ومكافحه الافات و لسيطره عليها والمناعه والميكروبيولوجي والباثولوجي للحشرات وعلم السموم ، وشغله: في معامل التحاليل و الشركات الادويه ومعامل البحوث الزراعيه وغيرها ، وشروطه: اني اختار حشرات وحيوان و انجح في الحشرات.
مقررات القسم: http://sareg.sci.cu.edu.eg/pdfs/plans/28_24.pdf
***************************
ثالثا: 9 اقسام مشتركه متاحة لطلبة علمي رياضه و علمي علوم
***************************
16) فيزياء/فلك: القسم ده زي فلك منفرد بس باخد شويه فيزيا مع مواد الفلك ، الشغل: فى مرصد حلوان بردوا ، وشروطه: اني اختار ماده فلك واي ماده تانيه من باقي المواد الاختياريه.
مقررات القسم: http://sareg.sci.cu.edu.eg/pdfs/plans/27_16.pdf
****************************
17) فيزياء/علوم جويه: كوبي بيست من اللي فوقيه.
مقررات القسم: http://sareg.sci.cu.edu.eg/pdfs/plans/27_17.pdf
****************************
18) فيزيا منفرد: قسم عشاق الفيزياء ودراسته فيزيائيات كهربيه وحراريه وحدث ولاحرج اكيد انتو عارفين وشغله: في معامل الابحاث او تاخد سنتين تربيه و تبقي مدرس فيزياء وفي مصانع الاجهزه الكهربيه و شركات بقي تانيه وشروطه: تختار اى مادتين وانجح فى فيزياء 1 & 2 وتقدير عام جيد.
مقررات القسم: http://sareg.sci.cu.edu.eg/pdfs/plans/27_4.pdfر
****************************
19) كيمياء منفرد: الكيمياء بقي انتو عارفنها عضويه وحراريه وكهربيه وتحليليه وكيميات كتير هتدرسوا كيمياء لحد ما تحلموا بيها و انتو نايمين و شغله: فى معامل التحاليل وفي كل شركات مصر مافيش شركه من غير كيميائي من ادويه واسمده و مستحضرات التجميل والشيبسي والبيبسي وغيرها ، وشروطه: اختار اى مادتين واجيب جيد في كيمياء 1 & 2 و تقدير عام جيد.
مقررات القسم: http://sareg.sci.cu.edu.eg/pdfs/plans/27_6.pdf
****************************
20) جيوفيزياء: هي تطبيق لقوانين الفيزياء علي الجيولوجيا اللي هي علوم الارض وهو يدرس الاعماق الارض من الناحيه الفزيائيه وشغله تعتبر التنقيب اولي قبل ما احفر عشان اطلع الحاجه اللي انا عاوزها من تحت الارض بشتغل شغل الجيوفيزيائى اللي هي زي الاستجابه الكهربيه او المغناطيسيه للارض و استخدم موجات السزميك والالكترك والجرافيتي والماجنتيك عشان اعرف فين المكان الغريب اللي في استجابه مختلفه عن اللي حوليه ، شروطه: اختار جيولوجيا وجيوفيزيا واجيب فيهم جيد والقسم بيدخله 15 طالب فقط الاعلى فى التقدير العام وحطينه رغبة اولى ، وشغله: جيوفزيائي في شركات البترول او المياة او المعادن او الابار او الاثار او اى حاجة من تحت الارض.
مقررات القسم: http://sareg.sci.cu.edu.eg/pdfs/plans/27_11.pdf
****************************
21) كيمياء/جيولوجيا: من افضل الاقسام وهو بيشتغل بالجيولوجيا زي ما قولنا فوق ان الجيولوجيا هي علم دراسه الارض وده بقي شغله الموجود في شركات البترول وشركات المياه و جهاز شئون البيئه و قطاع الاثار وغيرها لقي قسم جميل كله بقي شغل صحرا و سفر وحاجات جميله كده و ممكن نشتغل اوبيريشن في المكتب و ده بقي اللي بيعمل الخرايط مش الجغرافيه لأ خرايط تانيه هتعرفوها قدام شويه و مش كده بس ده كمان بيدرس كيميا و بيشتغل بيها و شغل الكيمياء بقي في معامل التحاليل و شركات الادويه و الاسمده وغيرها ، وشروطه: اختار جيولوجيا و اي ماده تانيه والنجاح فى كيمياء 1 او 2 ومتوسط التقدير فى جيو 1 & 2 جيد وتقدير عام جيد
مقررات القسم: http://sareg.sci.cu.edu.eg/pdfs/plans/27_23.pdf
****************************
22) كيمياء/فيزياء: قسم يدرس نص مقرراته كيمياء وتصها فيزياء ، وشغله: زي اي قسم بيدرس كيمياء في معامل التحاليل و شركات الادويه و الاسمده وغيرها ، وبيشغل في الفيزيا في معامل الابحاث وشركات الالكترونيات والقسم ملهوش شروط اختار اي مادتين واطلع تانيه و ادخله علي طول.
مقررات القسم: http://sareg.sci.cu.edu.eg/pdfs/plans/27_18.pdf
****************************
رابعا: الاقسام الخاصة وهما قسمان فقط قسم علوم البترول الجيولوجية وقسم البيوتكنولوجي ، والتخصص فيها بيكون من سنة اولى ، يعنى مش محتاج تقدير عشان تدخل القسم ، بس هتحتاج تقدير عشان تشتغل ، والقسم مفتوح العدد لاى طالب يدفع المقابل المادى له و حاصل على مجموع كلية العلوم لاى جامعة مصرية.
****************************
23) بيوتكنولوجي: القسم موجود فى كليات علوم وفى كليات زراعة ببلاش ولكنه فى القاهرة خاص ب 9 الاف جنيه في السنة + 10% زياده سنويه والقسم متاح لطلبة علمي علوم ورياضه ، داخل القسم ده هتتعرف علي التعامل اكثر مع العامل الوراثي في النبات والحيوان والانسان وزي منت عارف إن ده مدخل مهم جدا لعلاج كثير من الامراض أهمها السرطان أما بالنسبه للنبات فأهميته إنه ممكن تتدخل لزياده الانتاج وكذلك الحيوان و يدرس التكنولوجيا الحيويه زى الDNA وتحاليله وكل ما يتعلق بيه والشغل في معامل التحاليل الكبيرة اللي فيها تقنيات تحاليل DNA ومراكز البحوث المختلفه ، فرص العمل: موجوده في الشركات زي الادويه والشركات الصناعيه زي الالبان والمؤكولات وكذلك في المستشفيات لعلاج الامراض الوراثيه وأيضاهناك استخدامات تطبيقات البيوتكنولوجي في الصناعه و الزراعه و التحاليل الطبيه و في تطبيقات كتير موجوده
مقررات القسم: http://sareg.sci.cu.edu.eg/pdfs/plans/27_29.pdf
****************************
24) علوم البترول الجيولوجية: القسم موجود فى كليات العلوم جامعات القاهرة والاسكندرية والمنيا والاسماعيلية وبورسعيد والمنوفية والمنصورة واسيوط وغيرهم وفى بعض الجامعات القسم ببلاش وفى البعض الاخر بمصاريف ، فى القاهرة ب 8 الآف جنية + 10% زيادة سنوية وتدفع 4 الآف جنية فى الترم مع تطبيق الزيادة كل سنة وبتدرس فى سنة اولى كيميا وفيزياء ورياضة وجيولوجيا وجيوفيزياء 1 & 2 وبتتخصص من سنة اولى فى القسم ومبتكونش مهندس بترول بتبقي جيوفيزيائى او جيولوجي ، مشكلة القسم انه شغله صعب تلاقيه ولدرجة ان فى ناس تقولك معكش واسطة متدخلوش لانك مش هتلاقى شغل ، فى اسكندرية القسم قوي اوى عن القاهرة لانه بينزلك تدريب فى شركات البترول من سنة تانية وبياخد اعلى ناس فى الانجليزي بتاع ثانوي وبيعملك انترفيو وبيكون ليهم مبنى خاص بيهم ومعامل خاصه بيهم، عكس القاهرة بيدخل القسم اى حد هيدفع ومفيهوش اى ميزة من اللى موجوده فى الاسكندرية لا مبنى خاص ولا معامل خاصة ولا اى حاجة سوا المقررات اللى بتدرسها وفقط وفى انك مش محتاج تقدير وبتدرس مقررات جيولوجيا وجيوفيزيا دول يعتبره الميزه الوحيدة للقسم ، والفرق بينه وبين قسم جيولوجيا وجيوفيزياء فى المقررات اللى بيدرسها كل قسم وهى كالاتى:
علوم البترول: (24) مقرر جيوفيزياء + (21) مقرر جيولوجيا + { (6) مقررات رياضة + (5) مقررات كيمياء + (5) مقررات فيزياء + مقررين انجلش } دول 23 مقرر ملهمش علاقة بتخصصك ولا بمجال عملك بتدرسهم عشان اللايحة وبس.
جيوفيزيا منفرد: (29) مقرر جيوفيزياء + (8) مقررات جيولوجيا.
جيولوجيا منفرد: مقررين جيوفيزياء + (52) مقرر جيولوجيا.
كيميا/جيولوجيا: مقررين جيوفيزياء + (28) مقرر جيولوجيا + (22) مقرر كيمياء.
مقررات القسم: http://sareg.sci.cu.edu.eg/pdfs/plans/27_26.pdf
****************************
ايه موضوع الساعات المعتمده ده ؟
****************************
بص يا سيدى انت دلوقتى مثلا بتاخد مادة الرياضه ، بتاخد كل اسبوع محاضره وبتاخد سكشن , المحاضره بتبقى ساعتين والسكشن 3 ساعات فاحنا بنحسب حاجة اسمها الساعات المعتمده للماده كالاتى ان اى محاضره الساعتين بتوعها بيتحسبوا بساعه معتمده ، وان اى معمل او سكشن الساعتين او 3 ساعات بتوعهم بيتحسبوا بساعه واحده معتمده فكده تعالى نحسب الساعات المعتمده بتاعة الرياضه
محاضره ساعتين = ساعتين معتمدتين ، سكشن تلات ساعات = ساعه واحده معتمده
يبقى مادة الرياضه كده ب 3 ساعات معتمده ، لو حسبتها فى الخمس مواد هتلاقى انك بتاخد فى التيرم الاول 15 ساعه معتمده بس كده ، يعنى هى طريقه لتحويل المواد الى ساعات معتمده ، ولو اخدت متطلبات جامعة المتطلب الواحد = ساعتين معتمدتين (لان مفيهاش عملى هما نظرى بس) ، ولما تيجى تطلع تانيه مش هيقولك انت معدى كام ماده عشان تطلع تانيه لا هيقولك انت معدى كام ساعه معتمده بس اهم حاجة تكون نجحت فى 12 ساعة معتمدة من مجموع ساعات الترمين "من غير المتطلبات" عشان تطلع سنة تانية (الكلام ده على سنتنا احنا السنة دى كان فى كلام من ادارة الكلية انهم هيزيدوا)
****************************
طب وايه نظام االدراسه؟
****************************
عندنا كل ماده من 100 درجه متقسمه كالاتى 10 درجات على الميدتيرم وبيكون بعد حوالى شهر ونص من بداية الدراسة ، و 30 درجه على العملى ، و 60 درجه على الفاينال وده الامتحان الى فى اخر الترم خالص ، بس ال 30 درجه بتوع العملى بالنسبه للرياضه لانها ملهاش عملى بيبقى فيه ميد تيرم تانى ب 20 درجه و10 درجات على الكويزات الى هى امتحانات صغيره بتتعمل فى السكاشن بتاخد كل اسبوع فى المواد دى محاضره وسكشن او محاضره ومعمل.
****************************
طب هى الجداول بتنزل امتى وازاى بعرف جدول محاضراتى؟
****************************
لا انت اللى بتختار موادك وانت اللى بتعمل جدولك وانت اللى بتختار ايام اجازاتك فى سنة اولى هما بس بينزلولك فى كتاب اسمه دليل الطالب وعلى موقع الكلية المواعيد المتاحة لكل ماده انت بتختار المواعيد اللى انت عايزها وتظبط جدولك وتسجله على موقع الكليه وبتطبعه وبتمضى عليه وتخلى اى دكتور فى الجامعة يمضيلك عليه وتصوره نسخة تسلم الاصل للشئون والنسخه التانية تخليها معاك وطبعا احنا هنساعدكوا فى عمل الجدول ده متقلقوش ، بالنسبة لطلبة بترول بتمضى من د/ محمد فؤاد منسق القسم وبعدين تختمه من قسم الجيوفيزياء وتصوره 3 نسخ مش نسختين عشان النسخة التالتة هتسلمها لسكرترية قسم الجيوفيزياء.
****************************
طب التقديرات ايه ؟
****************************
النجاح من 60
مقبول من 60 - 64
جيد من 65 - 74
جيد جدا من 75 - 84
امتياز من 85 - 100
****************************
طيب هندرس كام مادة فى الكلية دى؟
****************************
فى علوم القاهرة عندك 14 مقرر فى سنة اولى
ومن 13 - 18 مقرر فى سنة تانية
ومن 14 - 21 مقرر فى سنة تالتة
ومن 20 - 22 مقرر فى سنة رابعة
كل ده على حسب قسمك
لو حصل ونزلت فى اى مقرر خلال الاربع سنوات هتضطر تدفع 600 جنية للمادة ام 3 ساعات عشان تاخدها فى السمر كورس و لو مش عايز هتضطر تتخرج متاخر يعني فى اكتر من 4 سنين لا قدر الله.
****************************
السمر كورس (الترم الثالث):
****************************
هو فصل دراسى للطالب الذى رسب فى مادة او مادتين او ثلاث مواد خلال السنة الدراسية الواحدة ، وذلك بمقابل مادى 600 جنية للمقرر الواحد ابو 3 ساعات اى ما يعادل 1800 جنية لثلاث مواد بتسعة ساعات معتمدة يدرس فيها الطالب المقرر(ات) لمدة 5 اسابيع بمعدل محاضرتين وسكشنين فى الاسبوع الواحد للمقرر الواحد ، ويبدأ الفصل الصيفي بعد اسبوعين من اعلان النتيجة مع العلم ان النتيجة اعلنت هذه السنة بعد الامتحانات بيومين فقط ، وتعتبر ادارة الكلية الفصل الصيفي فصلا اختياريا للطالب ، وهو كذلك ولكنه فى الواقع يعتبر اجبارى للطالب الذى يرغب فى التخرج من الكلية فى 4 سنوات فقط وليس اكثر.
ملحوظة: السمر كورس للمقرر الواحد كان منذ 4 سنوات ب 50 جنية ثم اصبح ب 75 ثم 100 ثم 400 فى سنوات 2011 ، 2012 ، 2013 ، 2014 ثم هذه السنة 2015 اصبح ب 600 جنية للمقرر الواحد صاحب الثلاث ساعات المعتمدة اى بمعدل 200 جنية للساعة المعتمدة الواحدة.
****************************
اعمل ايه عشان منزلش سمر كورس وابقى مضطر ادفع فلوس اد كدا او انى اتخرج متاخر
****************************
بص هقولك انت ادامك 3 اختيارات
1) انك تذاكر اول باول فتنجح صافى وبتقدير كمان.
2) متذاكرش اول باول فتنزل فى مادة او اكتر وساعتها هتضطر تنزل سمر.
3) متذاكرش اول باول فتنزل فى مادة او اكتر وتختار انك متنزلش سمر وساعتها هتتاخر فى التخرج عن اربع سنوات.
ليه بقى؟ لان المادة اللى انت نزلتها دى مش هينفع تاخدها فى سنة تانية لان كل الساعات اللى عندك مليانه يا اما تاخدها ومتاخدش بدالها مادة من مواد سنة تانية وساعتها بردو هتضطر تاخد المادة دى فى السمر كورس بتاع سنة تانية او تاجلها هى كمان لسنة تالتة وهكذا.
وفى حاجة كمان فى مادة بتوقف مادة تانية بعدها او اكتر ، يعني ايه بتوقف؟ يعني مينفعش تاخدها الا لما تنجح في الاولانية اللى بتوقفها مثال: رياضة 1 بتوقف رياضة 2 ورياضة 2 بتوقف رياضة 3 وهكذا حتى رياضة 6 فى اقسام رياضة ، كمان فى قسم بترول رياضة 2 مش بتوقف رياضة 3 وبس ، لا دى بتوقف رياضة 3 وفيزياء 3 والمادتين دول بيوقفوا مادتين تانيين فتخيل بقى لو انت جيت نزلت فى رياضة 1 واخدتها ترم تانى فهتضطر بعد ماتنجحها انك تاخد رياضة 2 فى السمر كورس ب 600 جنية ولو اخترت انك ما تدخلهاش فى السمر هتاخدها فى سنة تانية ترم اول وساعتها مش هتعرف تاخد رياضة 3 وفيزيا 3 اللى بيتوقفوا عليها فهتاخدهم فى سنة تانية الترم التاني وده معناه انك هتاجل مادتين كمان من سنة تانية لسنة لتالتة اللى هما بيتوقفوا على نجاحك لفيزياء 3 ورياضة 3 ، دوامه هتدخلها ومش هتخرج منها الا بعد 5 او 6 سنين من الكلية لمجرد انك مش قادر تدفع لكلية المفترض انك داخلها بالمجموع مش بالفلوس.
****************************
اجابات لبعض الاسئلة الشائعة:
****************************
1) مفيش حاجة اسمها تخلص كلية علوم وتكمل بعدها طب او صيدلة او هندسة او تاخد دبلومة الفارما بتاعة الصيادلة ، بس فى دبلومه الميكروبيولوجي ، ودبلومه الكيمياء الحيويه ودبلومه التحاليل الطبية ، ممكن تعمل كدا بس تكمل جامعة خاصة فى بعض الجامعات الخاصة بتيح ده مش كلها ويحذفولك المواد المشتركة اللى انت اخدتها ، طيب وعلى ايه ما تدخل جامعة خاصة من الاول لو انت مش حابب علوم.
2) اى قسم من اللى فوق فيهم ناس متخرجة ومش لاقيه شغل وفيهم ناس اتخرجت واشتغلت ع طول ، فلازم تبقى عارف ان فى الاول والاخر موضوع الشغل ده رزق والرزق بتاع ربنا فمتشغلش بالك غير بحاجة واحدة وهى اجتهادك فى دراستك وكورساتك وتدريبك.
3) فى اللى شغال ب 800 جنية واللى شغال ب 8000 جنية واكتر ، بيعتمد ع اجتهادك وشغلك على نفسك من سنة اولى.
4) اى قسم كيمياء سواء منفرد او مزدوج تعرف تشتغل منه شغل الكيمياء و85% من شغل الكيمياء فى مصر بيكون فى معامل التحاليل بمرتب 800 - 1200 جنية كحد اقصى وحلو للبنات ، وميديكال ريب "مندوب ادوية طبية"بمرتب 1200 - 3500 جنية كحد اقصى بردو ومش حلو للبنات، ومتاح طبعا فى المصانع والشركات ، وعلى حسب المصنع او الشركة دى كويسه ولا متواضعه بس هتلاقى من 1000 - 6000 جنية ومقدرش اقول كحد اقصى بس معرفش حد خد اكتر من كدا..
5) علوم حاسب بتبدا بمرتب 1000 جنية وبيوصل ل11 الف انت وتطويرك لنفسك واجتهادك فى الكورسات.
6) الارقام دى مش من اختراعى ولكن من ناس كتيره شغاله فى المجالات دى بقالها سنين.
7) اكتر حاجة اجمع عليها الخريجين انها غلطة كبيرة عملوها هى انهم منزلوش تدريب ومخدوش كورسات من وهما بيدرسوا فى الكلية.
8) اى قسم ممكن تشتغل منه مدرس وغالبا لازم تاخد سنتين فى كلية تربية.
9) خبر سئ بس لازم تبقى عارفه: الغاء تعيين اوائل الجامعات بداية من دفعة 2014 ، وده يعنى ايه ، يعنى متدخلش قسم بس عشان تبقى معيد فيه.
http://alwafd.org/…/866545-إلغاء-تعي...لخريجين-يعرقل…
ملحوظة مهمة جدا: كل الكلام اللى فى البوست يعبر عن وجهة نظر كاتبه واراء طلبة وخريجين من كليات العلوم جامعات القاهرة والزقازيق والازهر والمنيا وغيرهم.

[esmana]

شكرااااااااااا

[حنان احمد حسن]

بارررررررررررررررررررك الله فيك