عايزة معلومات كتير ربنا يخليكم !!!

[samar saad]

سلام عليكم
بعد اذنكم ياجماعه انا اختي فثانويه عامه دلوقتي ربنا يكرمها يارب هي وكل اللى زيها
هي النظام الجديد ده بتاع سنه واحده
المهم هي شاطره فالطبخ جدا وكده وكنت حابه انها تدخل سياحه وفنادق عشان تقوي من موهبتها ومش عايزاها تدخل حاجه حفظ وهري فاضي ولعل دي ليها مستقبل افضل بالنسبه ليها
عايزة اعرف التننسيق لو حد عنده فكره سياحه وفنادق ممكن تقبل من كام السنه دي والسنه اللى فاتت قبلت من كام
وكمان ايه عيوب الاقسام وافضلهم وكده
وهل بيهتموا بالعملي وكده ولا عادي لو مافيش حضور وكده
ياريت حد يفدني بجد انا نفسي انها تعمل حاجه هي بتحبها ويارب تلحقها وتبقي وشها خير عليها يارب

[Adel Selima]

تقدير كلية سياحه وفنادق بقاله 3 سنين قليل بسبب ظروف البلد والسياحه الي اتضربت
تقدير سياحه 2011
ادبي 70%
علمي 80%
تقدير سياحه 2012
ادبي 60 %
علمي 75%
تقدير سياحه 2013
ادبي 60%
علمي 75%
--------------------------
بالنسبه للطبخ انا كمان كنت بحب الطبخ وداخل الكليه علشان اتعلم مطبخ وكده بس المطبخ في كليه سياحه وفنادق السادات شبه منعدم او تقريبا مش هتتعلمي منه حاجه ومفيش كليه علي مستوي الجمهوريه بتعلم طبخ بس ,, لازم مع الطبخ مذاكره وحفظ علشان تنجح وتجيب تقدير كويس :-)
--------------------------
اما بالنسبه لاقسام كليه سياحه وفنادق هما
دراسات سياحيه
دراسات فندقيه
ارشاد سياحي
في بعض الكليات زي كلية السادات واسكندريه بيتم دراسه الثلاثه اقسام في اول سنه والتخصص من تانيه
وبالنسبه لجامعه حلوان التخصص من اولي
بالنسبه لقسم الدراسات السياحيه هتدرسي شركات الطيران وشركات السياحه والبرامج السياحيه وطرق تنفيذها وتصميمها , وبينطلب في شركات السياحه و حجز تذاكر الطيران

وبالنسبه لقسم الدراسات الفندقيه هتدرسي اداره الفنادق والاقسام والاغذيه والمشروبات وقوائم الطعام واسس الطهي الفندقي بينطلب بكثره في مصر والدول العربيه وبيترقي بسرعه :-)

في ارشاد سياحي بتدرس الحضارات المختلفه علي مر العصور والتاريخ
تقريبا مش شغالين في مصر دلوقت بسبب الاحداث الحاليه بس نسبه المرشدين الي شغالين قليله نسبيا

بالنسبه للي فاكر انه هيدرس حاجه في الدراسات الفندقيه سواء كانت طبخ او غيره هتميزه عن شخص تاني في الفندق , يلغي الفكره من دماغه
اي فندق في الدنيا = لغه + خبره ( وبس )
لو واحد جاهل ومعاه لغه وخبره هيبقي فوقيك

في حاله انعدام الخبره بتبدأ في الفندق زيك زي غيرك من الصفر وتترقي

وانا من رأيي الشخصي لو حد عايز يتعلم الطبخ يتعلم تحت ايد شيف متميز وله خبره في مجال العمل .