لو كنت مكانى هتختار ايه؟!

[Avada kedavra]

الحمد لله النتيجة ظهرت النهارده وجالى طب بيطرى القاهرة
بس كنت مقدم فى جامعة خاصة على طب اسنان وحجزت مكان فيها
مش عارف ادخل ايه الصراحة؟
الخاص هيكلفنى فى السنة ما لا يقل عن 40 الف جنيه... واسرتى مش "فاحشة الثراء" للدرجة دى.. ده غير بعد 5 سنين عيادة الاسنان بتكلف 200 الف ع الاقل..
هى اسرتى تقدر بس هيكون فى حسابات تانية من ناحية بيع املاك وكده..!!
طب بيطرى مش وحشة وزى ما قرأت هنا مجالات العمل فيها كويسة وكتير.. بس الاسنان اسنان..مش محتاجة كلام يعنى
يا ريت لو حد كان فى نفس موقفى يقولى اختار ايه؟ او اى حد تانى له راى

[عاشقة الطفولة]

انا ف نفس موقفك بابا وماما عارضين عليا خاص

بس انا بصراحة ها ارضى بالبيطري لاني لسه عليهم مسؤليات واخواتي لسه اصغر مني ومحتاجين مصاريف وكفايا

اصلا المصاريف الي صرفناها ع الدروس وانا خلاص مش ها اقبل بالخاص

[Ezel]

مبررووك
نصيحه من واحد ف بيطرى ومر باللى انت فيه دلوقتى
سيبك من حوار الخاص ده وخليك ف بيطرى

[Dr.Mohamed Attia]

انا فعلا كنت مكانك السنة اللى فاتت واخترت بيطرى لان فيه كذا سبب اولا
انا هدرسى طب وهكون طبيب يعنى دكتور ودا جزء من حلمى
ثانيا انا مش هدخل خاصة بعد تعب سنتين بحالمهم عشان كنت اجيب 97.5%
والحمد لله جبتهم بس التنسيق بقى واروح فى الاخر اتساوى بواحد جايب 70% وكان بيلعب طول الثانوى و فى الاخر داخل خاص بالفلوس وادفع زيى زيه دا ظلم ليا ولاهلى و ممكن كمان بعد كدة مش هتساوى ببتاع اسنان الحكومى هو هيكون ليه اولويه عنى عشان كدة انا اخترت بيطرى والحمد لله على كل حال

[Avada kedavra]

شكرا لردودكم.. احب اوضح شوية نقط..
اولا تنسيق الجامعات الخاصة للطب 95 حد ادنى واسنان 92 وكذلك الصيدلة تقريبا..يعنى الطلبة اللى هيقدموا كويسين ومستواهم عالى يمكن التوفيق لم يحالفهم ف الثانوى..
ثانيا جامعة 6 اكتوبر فيها تكليف و شهاداتها معتمدة..
لما تتخرج بامتياز محدش هيسالك انت كنت خاص او حكومى..المهم الكفاءة
ثالثا حتمال انك تتخرج من بيطرى ومتلقيش وظيفة_ احيانا_ كبير!!
انا بميل للبيطرى.. بس الاسرة ليها منطق وراى مقنع.. اللى هتصرفه فى 5 سنين.. فى اقل من سنتين هيرجعلك!!

[عاشقة الطفولة]

وانت يعني ضامن انك اول ما ها تشتغل ها يجيلك فلوس ف سنتين عندنا دكتور اسنان ما شاء الله عليه

اشتهر اه بس سنة حاليا فوق 40 سنة لكن الي بيشتغل اول مرة معتقدتش ف سنتين ها يكسب نفس المصاريف

[Avada kedavra]

مظبوط رأيك..مش شرط اول سنتين لكن فى اسوا الاحوال هيكون له دخل جيد
هو يعتبر استثمار نوعا ما..يعنى مفيش طبيب اسنان مش لاقى شغل..ومين فينا ما بيروحش لطبيب اسنان
خريج علوم او بيطرى صعب يتخرج ويلاقى الوظيفة مستنياه.

فى الخارج(اوروبا وامريكا) بيطرى زى بشرى بل احيانا احسن.. طبعا لظروف الحياة فى الخارج..كل اسرة عندها حيوان او اكثر(قط كلب..)..لكن فى مصر...!!
انا قلقان من انى ادخل بيطرى واجى بعد خمس سنين اقول يا ريتنى قدمت خاص ودفعت ان شاء الله مليون.. فى ناس عشان تجيب وظيفة لابنائها دلوقتى بتدفع ما يقارب النصف مليون.. طب ما دفعهم( لو قادر) دلوقتى وريح نفسى بعد كده..!!
عموما هى كلها اراء شخصية وكل واحد بيختار الانسب له..وظروف كل واحد مختلفة عن الاخر..!!

[Dr.Mohamed Attia]

حضرتك انا ليا واحد صاحبى داخل اكتوبر ب 80% السنة اللى فاتت وواحد السنة اللى فاتت ب 86% و كل دا بالواسطه دى مش فكرتنا
بص بقى انت ماتعرفش حاجة عن شغل بيطرى فعشان كدة بتقول صعب شغلة ومش عارف ايه ما علينا لو عاوز تعرف ادخل على النت وشوف مجالاتة ايه هنا وبره
نيجى بقى للاسنان انت عاوز تقنعنى انك اللى هتدفعة فى 5 سنين اللى هو حوالى 300 الف جنية و و عشان تعمل عيادة بعد كدة حوالى 100 الف وكمان هتكون مش عيادة كويسه اوى انك هتجيب الفلوس دى فى سنتين او فى عشره حتى ههههههههههههههههههه ابقى قابلنى بتوع الاسنان دلوقتى فعلا قليلين وعليهم طلب ماقولتلكش حاجة لكن بعد 5 سنين شوف عدد اللى هيتخرجوا من الجامعات الحكومية اد ايه و الكم المهووول اللى هيتخرج من الجامعات الخاصة ايه وهيتكون فيه بطاله فى الاسنان زى ما فيه فى الصيادله والبشرى دلوقتى صدقنى احسبها صح الفلوس اللى انت هتدفعها دى انت اولى بيها فى حياتك هتتجوز و تجيب عربيه و تفتح عيادة حيوانات اليفة فى مكان راقى و هتكون مش ملاحق على الشغل والحالات اللى هتجيلك ولو مش مصدقنى انزل اى حى من الاحياء الراقيه فى مدينة نصر او المعادى او المهندسين الخ و شوف الدكاتره البيطرى هناك شغالين ازاى و الحالات عندهم اد ايه خلى الخاص دا للى جايله تجارة او علوم ومش هيعرف يشتغل ايه بعد كدة صدقنى احسبها صح عشان ماترجعش تندم ودا ان شاء الله اللى ناوى اعملة اتخرج من جامعة حكومى و فلوس الخاص اللى انا مادخلتوش اتحطت فى البنك لحد ما اخلص واعمل العيادة و اجيب شقه وعربيه واتجوز كمان هقولهالك للمره الاخيره احسبها صح

[Avada kedavra]

طب ما تطبق نفس الكلام على البيطرى..بعد خمس سنين هيكون شوف عدد اللى هيتخرجوا..والاعداد السنة دى اللى هتخش بيطرى اكتر..

[poske1995]

بص يا معلم انا حالتى نفس حالتك بظبط و قدمت انا كمان ف 6 اكتوبر اسنان و جالى ف تنسيق الثانويه العامه بيطرى ف قعدت مع عمى هوة دكتور بشرى حوالى 60 سنه المهم قالى اسنان دى هتدخل تدفع 300 الف و 250 الف عياده دى اقل حاجه ل عياده الاسنان و تقعد 4 او 5 سنين عشان تشتهر و يجيلك ناس و لو بصيت ل بيطرى انت شوف انك تخصصك بعد الكليه كمان مش داخل الكليه يعنى بتتخرج م الكليه قدامك 15 تخصص تشتغل فيهم و كمان مزارع مثلا الطيور دى بتبقى ب ملايين انت لو اشتغلت ف واحده الى الناس مستقلاها دى اوى اول راتب ليك على الاقل مش هيقل عن 10.000

[Avada kedavra]

شكرا لردك..بس بالله عليك انت مصدق الكلام اللى انت كاتبه؟
وظيفة ايه اللى لما تتخرج اول راتب لا يقل عن 10.000 ؟! ده انا لو ببيع مخدرات لو مؤاخذة مش هكسب كده؟
وبعدين بتقول هتقعد 4 او5 سنين على ما تشتهر؟ مظبوط..طب البيطرى؟ هتتخرج هتلاقى مزرعة طيور مستنياك بفراخها ؟! او وظيفة حكومية؟!
انا مش كاره او بحاول اكره البيطرى..ابدا.. انا بس بحاول اجمع اكبر عدد من الاراء ووجهات النظر

[el sa7er]

بص يا دكتور فى حسبه بسيطه مع أهلك كده وببساطه شديده

انت علشان تدخل كليه مالهاش تكليف إسمها طب أسنان 6 اكتوبر يبقى بتضحك على نفسك لعده أسباب

اول سبب ان السنه واقفه عليك ب 40 الف × 5 = 200 الف جنيه

وكمان يا دكتور لما تخلص هتدفع قدهم علشان العياده يعنى بالميت دخلت فى نص مليون جنيه

غير مصاريفك طول الخمس سنين

انا بأه أفضل ليك انك تدخل طب بيطرى وبعدين لما تتخرج تفتح لنفسك مزرعه بنص الفلوس دى

واقسم بالله هتبقى مليونير فى ظرف سنه واحده

[Dr.Mohamed Attia]

يا جماعة سيبوه يعمل اللى هو عاوزة هو مش عاوز يقتنع خليه هو حر وانا واثق انه هيندم بعد كدة لو عمل اللى فى دماغة ويارب ظنى يكون غلط وربنا يوفقك

[اية ابراهيم]

انا نفس حالتك
جاتلى بيطرى بنها وامل حياتى انى ادخل علاج طبيعى وقف معايا على درجة ونص
حجزت علاج طبيعى فى جامعة مصر التنسيق بتاعها واخد 95.5يعنى هايبقوا كلهم شاطرين الكلام بتاع 80 فى المية يدخل دة راح علية خلاص دلوقت ما بقاش يفرق خلاص عن الحكومة وبيتخرجوا وليهم تكليف من الحكومة عادى زيهم زى الحكومة
لما جاتلى بيطرى حاولت اقنعع نفسى بيها لما شوفت مجالاتها واقتنعت بيها شوية لما لاقيت انى ممكن اشتغل فى شركة ادوية بس لما سالت وفكرت قالوا بيبقى صعب اوى وبيحتاج وسايط الشغل المتوفر دلوقت بيبقى فى مزارع الدواجدن
وانا اصلا بخاف من الحيوانات جدا ومش متخيلة انى اقضى عمرى كلة معاهم
فققررت ان شاء اللة ادخل خاص واحقق حلمى واضمن شغل وان شاء اللة العلاج الطبيعى دلوقت مطلوب ونعوض الفلوس الى هانتدفعها فى الجامعات الخاصة

[اية ابراهيم]

الحكاية دة ترجع بردة لميولك وحبك للحيوانات لان الولاد الشغل قدامهم ان شاء اللة متوفر ويعرفوا يسعوا لاى حاجة وربنا يسهلكوا