حوار مع أحد خريجى كلية الحاسبات و المعلومات

[ccna.and.mcse]

هذا نص الشات الذي دار بيني و بين أحد خريجي كليات الحاسبات و المعلومات و هو مهندس و مدير مشروعات سابق بشركة فودافون ومدير إقليمي بأوروبا و الشرق الأوسط بأحد أكبر شركات البرمجيات و تكنولوجيا المعلومات في العالم.

س: اية رايك في كلية و في سوق العمل لحديثي التخرج ؟

ج: بالنسبة للكلية بالتأكيد من وجهة نظري هي أفضل الكليات و إلا ما كنتش دخلتها، لكن بشكل عام الكلية دي او المجال ده يفضل إن اللي يدخله يكون بيحبه و غاويه و إلا احتمال كبير مش هينبسط و هيكره الدراسة و حياته و هتبقي اسوأ كلية في نظره، إذا فالمهم هو حب المجال و عدم التردد و الشك في الكلية بسبب ما يردده الناس من شائعات أو معلومات غير دقيقة حولها.
أما بخصوص سوق العمل، فمن المعروف ان اكتر المجال التي يوجد بها فرص عمل و بمرتبات كبيرة من الممكن تتراوح داخل مصر لحديث التخرج من 3 الي 6 الاف جنية هو مجال صناعة البرمجيات و تكنولوجيا المعلومات و ده بينطبق علي السوق المصري او السوق العالمي بوجه عام و اظن ده كلام معروف لكل المهتمين و المتابعين للمجال و تقارير الطلب علي الوظائف اللي بتنشرها المؤسسات الدولية، لكن للأسف اغلبية المصريين و نظرا لعدم فهمهم لطبيعة قطاع التكنولوجيا او متابعتهم ليه و انحصار الشركات المتخصصة بالمجال داخل القاهرة الكبري فقط، فده بيخلي المواطن العادي ما يفهمش طبيعة و شكل العمل و الوظائف هذا التخصص، فما بالك أنه يفهم ان ليه فرص عمل كتير او قليل ... و بالتالي معظم أولياء الأمور بينصحوا أولادهم يدخلوا التخصص و الكلية اللي يعرفوها لأنها الأضمن من وجهة نظرهم و طبعاً ده خطأ كبير و بيدمر مستقبل أولادهم بسبب الجهل و عدم توافر المعلومات الدقيقة، و بالتالي بنخسر عقول كتير في مجال قائم علي العقول اللي ممكن تصنع الكتير للبلد و قصادنا النماذج كتيرة في دول العالم المختلفة.

س: اية رايك في ناس الي بياخدو دورات it ؟

ج: طبعاً لازم نفرق بين دورات الآي تي المختلفة، لكن بشكل عام الدورات بتدرس ازاي نستخدم تكنولوجيا معينة سواء تعلمك تستخدم الويندور و الاوفيس او حتي تعلمك تبقي ادمن علي شبكة ويندوز او تعمل برامج بالفيجوال بيسك كل ده بنصنفه انه استخدام للتكنولوجيا، و ده أمر متاح للجميع انهم يتعلموه ما فيش مشكلة، لكن لازم نفهم ان ده شيء و انك تتعلم و تدرس علوم الحاسبات و المعلومات ده شيء آخر لانك في الجامعة بتتعلم عشان تكون مهندس برمجيات او نظم او معلوماتية عشان تصنع التكنولوجيا و تسخر التكنولوجيا المتقدمة زي الذكاء الصناعي و الواقع الافتراضي و غيره في صناعة مشاريع كبيرة، و بالتالي نقدر نشبه اللي بيحصل علي دورة و اللي بيدرس في جامعة اكاديمياً باللي بياخد دورة اسعافات اولية او تمريض أو وقف شوية في صيدلية، و طبعا لا الاول عمرة يبقي طبيب و لا التاني ينفع يكون صيدلي، فهنا لازم نعرف ان المعرفة التكنولوجية و التثقيف مطلول للجميع و احنا بنشجعه لكن ما ينفعش نخلط بينه و بين التخصص العلمي و الاكاديمي لان ده اساس اي مهنة و صناعة حقيقة، و هنا ممكن حد يقول انا موهوب و درست لوحدي و حققت نجاح و احنا بنقوله ده شيء عظيم لكن حاول تدرس اكاديميا ً افضل لو كنت بتحب المجال عشان بتدع فيه اكتر و اكتر و الدارسة الاكاديمية النهاردة اصبحت متاحة للجميع بفضل التعليم الخاص فما فيش حد عنده حجة انه ما يتعلمش صح خاصة لو بيهوي العمل في هذا المجال عشان يكون متأسس كويس و نقدر نصنع تكنولوجيا حقيقة و متطورة زي باقي الدولة اللي بتنافسنا و علي رأسهم اسرائيل و ما نفضلش واقفين في مرحلة الهواية.

و بخصوص الشركات المتخصصة و سوق العمل و رؤيتهم لهذا الأمر، هنلاقي ان كل الشركات المتخصصة سواء صغيرة او كبيرة اصبحت تطلب في الوظائف بشكل واضح و صريح مهندسين ومطورين برمجيات خريجي كليات الحاسبات و المعلومات و احيانا يطلقوا عليها علوم حاسب اختصارا بصفة هذا القسم هو اقدم اقسام الكلية، وده نتيجة توافر العمالة المتخصصة من مهندسين برمجيات خريجي حاسبات او مهندسين حاسب خريجي كليات هندسة، لكن الوضع ده زمان خاصة في التسعينات ما كنش كده و كان فعلا فيه فرص كتير لاي حد غير متخصص و كانت دورة او اتنين كافية كشهادة انك تشتغل بيهم كمبرمج في احد الشركات، لكن الوضع تغير نتيجة التوسع في افتتاح الكليات و الاقسام المتخصصة و السوق بطبيعتة بيبحث عن التخصص ومن هنا اصبحت الدورات غير مجديه للحاصلين عليها و اصبحت بنسبة 99٪ الحاصلين علي دورات بيرجعوا لمجال دراستهم الاصلي و يعلموا فيه.

س: لقيت شغل بعد متخرجت بسهولة ؟

ج: بص يا حسام ما ينفعش نقيس ظاهرة علي شخص واحد، فموضوع التوظيف بيتقاس علي اجمالي الخريجين و اقدر اقولك ان اقل نسبة بطالة ما بين خريجي كل الكليات في مصر هي بين خريجي حاسبات، وكذلك اسرع معدل توظيف لحديثي التخرج هو لخريجي حاسبات خصوصاً لو كنت مقيم في القاهرة لان 99٪ من الوظايف فيها، و ده هيجاوب علي سؤال الناس اللي ممكن يدور في بالهم ان خريجين حاسبات مش لاقيين شغل عندنا في البلد، و انا بقولهم ان ده مش بسبب ان ما فيش شغل ليهم، لا بالعكس لكنه بسبب ان فرص العمل موجودة في القاهرة الكبري للاسف و محروم منها باقي المحافظات و ده لاسباب سياسة و اقتصادية الكلية برىئة منها، و عشان كده بنصح اي خريج او اي حد هيدخل الكلية انه يستعد بعد التخرج انه ينتقل للقاهرة للبحث عن عمل و الاقامة هناك لحين ما تقوم الدولة بعمل توازن بين المحافظات و بعدها ممكن يرجع بلده لما تتوافر فيها شركات كويسه يقدر يشتغل فيها.

اما بالنسبة لي انا شخصياً فكنت بشتغل من قبل ما اتخرج بفترة و بعد التخرج جالي في نفس الوقت اكتر من وظيفة في كذا شركة كبيرة و كمان كمعيد في الجامعة الالمانية و انا اخترت افضلهم و اشتغلت فيه و بعدها بفترة اشتغلت مهندس و مدير مشروعات في شركة فودافون و بعدين مدير اقليمي في اوروبا و الشرق الاوسط في في احد الشركات الامريكية الكبري في مجال البرمجيات و تكنولوجيا المعلومات
وأحب أأكد ان دايما فيه شغل كتير ممكن يقل في بعض السنين لاسباب و لاخري زي سنة الثورة مثلا لكنه لا يتوقف ابدا و يعود لمعدله الطبيعي فيما بعد و طبعا كل ده غير الشغل الخاص اللي ممكن تعمله و الشغل اونلاين و غيره يعني من ناحية الفلوس و الشغل لو انت مجتهد و بتحب المجال و "مصحصح" هتلاقي شغل كتير و هتعمل فلوس كتير قوي و بسهولة و ممكن من و انت طالب لو حبيت كمان.

و بالنسبة للمرتبات في الوقت الحالي حديث التخرج بيكون مرتبه في المتوسط 3 الاف جنية و بيوصل في الشركات الكبيرة و الاجنبية ل 6 الاف جنية لحديث التخرج.
و كل سنة بيزيد انت و شطارتك يعني اللي عنده خمس سنين خبرة مثلا ممكن مرتبه يكون 10 الاف جنية و ممكن ازيد و الاكبر من كده مرتباتهم بتعدي لارقام كبيرة جدا
و خارج مصر طبعاً المرتبات أعلي بكتير حسب الدولة و عدد سنين خبرتك.

س: اية رايك في معرض الوظايف الي بيتعمل كل سنة في عين شمس و هو بيجيلو وظايف كتير ؟

ج: هي بتتعمل كل سنة و في كذا كلية بتنظم معارض و علي رأسهم حاسبات عين شمس طبعاً و في معرض قومي بيكون تابع لجمعية مهندسي البرمجيات إللي هي الممثل لنقابة مهندسي البرمجيات "تحت التأسيس" و بيكون علي مستوي الجمهورية وكل الجامعات و بيحضره الوزراء و الشركات الكبري و الصحافة و الإعلام و كان آخر معرض العام الماضي و حضرة وزراء الاتصالات و التعليم العالي و التنمية الادارية السابق و غيرهم من المسؤلين و رؤساء الجامعات و عمداء الكليات و مديرين الشركات الكبري زي مايكرسوفت و اوراكل و جوجل و غيرهم.

و المعارض دي بيكون هدفها تعريف الطلبة بالشركات و مسؤلين الشركات و عرض مشاريعهم للاعلام و هي فرصة كويسه طبعاً
لكن وجود فرصة عمل مش شرط يكون في معرض توظيف لأن في الوقت الحالي كل شيء ممكن يخلص اونلاين

س: بما ان حضرتك سافرت تشتغل بره هيا حاسبات و معلومات معترفة ككلية هندسية ؟

ج: خلينا نوضح مجموعة نقاط ممكن تكون مش معلومة للجميع:
أولا: كلية الحاسبات و المعلومات تصنف في المجلس الأعلي للجامعات في مصر كأحد كليات قطاع الدراسات الهندسية مثل كليات الهندسة و التخطيط العمراني و يدخلها خريجي الثانوية العامة من شعبة الرياضيات او الشعبة الهندسية مثلها مثل كليات الهندسة و التخطيط العمراني، و تختص بشئونها لجنة خاصة للدراسات الحاسوبية و المعلوماتية و هي الكلية الوحيدة التي تختص بدراسة أي علوم متعلقة بالحاسبات و المعلومات.

ثانىاً: انت بره و جوه تصنف كمهندس لكن اللي خلي فيه مشكلة في مصر ان خريج حاسبات ما يقدرش يبقي عضو في نقابة المهندسين و من هنا حصلت الازمة، ان الخريج مهندس لكن لا يمكنه ان يكون عضو في النقابة، و ده كان سببه ان وقت انشاء الكلية نقابة المهندسين كانت تحت الحراسة و عليه لم يكن من الممكن تغير اي بند في قانون النقابة لتقبل خريجي حاسبات و استمر الوضع كذلك سنوات و استقر الامر في هذا الوضع بدون حل واضح، و عليه قرر الخريجين و الطلاب و الاساتذة انشاء نقابة منفصلة لمهندسي البرمجيات حتي تحل هذه المشكلة، و ذلك اسوة بوجود نقابة للاطباء و نقابة اخري لاطباء الاسنان فكانت الفكرة ان يكون هناك نقابة للمهندسين و اخري لمهندسي البرمجيات و الحاسبات و المعلومات بشكل عام.

ثالثاً: مهنيا انت داخل الشركات في مصر مهندس و تتساوي في ذلك مع خريج كليات الهندسة، لكن احيانا تواجه بعض الخريجين مشكلات في شركات القطاع الحكومي حيث ان بعضها لا يجد كدر وظيفي محدد مما يسبب لهم مشكلات مادية و لكن هذا الوضع سيتم تصحيحه في وقت قريب جدا.

رابعاً: في الدول الأجنبية زي بريطانيا و امريكا و الاتحاد الاوروبي و استراليا مثلا جميعها بتعتمد خريجي كليات الحاسبات و المعلومات واقسامها الفرعية في هيئات و مجالس و روابط المهندسين عندهم اللي هي مناظرة لنقابة المهندسين في مصر و في الدول العربية زي السعودية مثلا بيدوك مسمي مهندس حاسب بشكل رسمي و بتغيره في الرقم القومي و الباسبور كمان هناك أو هنا بالمسمي ده، بس عموما القضية مش مسميات و لا نقابات فما تشغلش بالك بالقصة دي مهندس دكتور استاذ مش فارقة المهم تكون بتحب دراستك و تشتغل حاجة مستمتع بيها، فالمسمي ليس هدفا و لكن المهم هو المهنة و تطويرها.

س: اية رايك في الكورسات ؟ و رايك ابدا فيها امتي ؟

ج: بص يا حسام طالب حاسبات ما ينفعش ياخد كورسات لانه المفروض هو اللي بيصنع التكنولوجيا فعيب في حقه يعمل كده، و المفروض عنده الكتب يتعلم منها من المصدر نفسه ده اولا، و ثانيا الكورسات في الوقت الحالي بقي معظمها نصب وهدف اللي بيعملها ربح بأي طريقة، و خسارة فيها الفلوس خصوصا مع وجود الانترنت عند كل الناس و ان كل المواد التعليمية موجودة اونلاين و ببلاش سوا كتب او فيديوهات فايه الداعي ان الواحد يدفع فلوس و يدرس عند ناس ممكن يكونوا اقل منه علمياً و يدرس حاجات المفروض هو بيتعلم انه يعملها بنفسه.
و ضيف علي كده ان اللي بيتعود علي الكورسات و ان ياخد العلم بالمعلقة من حد تاني في مجالنا ده بيفشل بنسبة كبيرة في حياته العملية، لان مجالنا بيعتمد علي تكنولوجيا متغيرة كل يوم و بسرعة كبيرة، فالنهاردة هتتعلم بكورس طيب بعد ما تتخرج و تشتغل و تتحط في مواقف لازم تعتمد فيها علي نفسك، ساعتها ممكن تفشل لانك مش متعود تعتمد علي نفسك، فهنا بقي اهمية ان الواحد يبقي متعود يعتمد و يقرا لوحده و يدور و يشوف مراجع و فيديوهات و كتب و كل حاجة و بكده هتبقي اقوي بكتير، و هتتعب في الاول لما تتعود علي كده لكن بعد اول كام شهر هتلاقي ان ده احلي و افضل بكتير من التعليم في سنترات و كورسات و ده سوا للمواد الدراسية في الكلية او الكورسات العملية زي تعليم لغات البرمجة و غيره.

س: بما ان حضرتك جالك عروض عمل ممتازة حضرتك جبت امتياز ؟

ج: انا فعلا كنت من أوائل دفعتي، لكن للأمانة في الكلية غالباً الاوائل ما بيكونوش شطار قوي في الشغل العملي و المهني و بيكونوا شطار اكتر في الاكاديمي و البحث العلمي، لكن الحمدلله انا كنت بحاول احافظ علي الاتنين لكني كنت بفضل الجانب العملي و الحياة العملية اكتر من البحثية عشان كده قررت ما اكملش في الكلية اكاديمياً و بدأت اتعلم مع نفسي من اول سنة و اسبق الكلية بخطوه، فلذلك قدرت اشتغل من وانا طالب، و بعد التخرج كان الموضوع سهل لان عندي خبرة معقولة فجالي شغل بسهولة الحمدلله و اتدرجت بسرعة في المناصب الوظيفية يعني تقدر تقول اختصرت حوالي عشر سنين و سبقت بيهم معظم الناس اللي مند سني.
----------------------------------------------------------------------------------------------------------------------------------
معلش الاسئلة مركزة معظمها بعد التخرج علشان لو عاوز اسئلة في كلية كنت ممكن اسئلها لاي طالب في كلية

منقول

[Eng.Ahmed Hagag]

وإيه اللي جاب الموضوع في قسم هندسة يا جماعة كل حاجة في قسمها ..

[issac-newton]

ينقل للقسم المناسب

[matrexbaby]

لو سمحتوا انا عوز اعرف ايه الفرق بين كلية الحاسبات و معهد الحاسبات

[ccna.and.mcse]

كلامك عايم شوية .. حدد يعنى اية معهد حاسبات .. يعنى معهد عالى ولا اية

[ccna.and.mcse]

الزميل المشرف .. هناك بعض الطلبة بتسأل عن حاسبات فياريت تسيب البوست و الأهم من كدا ان حاسبات من مجموعة الكليات الهندسية و بتقبل المجموعة الهندسية فى الثانوية العامة

[Eng.Mo'men]

حاسبات ومعلومات تقبل من الشعبة الهندسية فقط , دي مافيهاش كلام
بالنسبة للقطاع الموقع بتاع الحكومة مش موضحها لأن القطاع الهندسي فيه علوم حاسب وفيه قطاع تاني اسمه قطاع حاسبات ومعلومات وبرده فيه علوم حاسب المهم خد اللينك دا وشوف كليات القطاع الهندسي وزير التعليم العالي قايل عليها ايه

http://www.masrawy.com/News/Egypt/Po...ani_helal.aspx

[Eng.Mo'men]

http://www.tansik.egypt.gov.eg/appli...el/index1.aspx

شوف الشعبة الهندسية من اللينك دا

[dr/nor pt]

ههههههههه حلو للجذب بس طبعا هىى من افضل الكليات وبلنسبة ليا افضل من همدسة انا مش حاسبات انا دكتورة ان شاء الله بس بلتوفيق حاسبات روعة والى يقول عليها فكسانة هو الى فكسان

[ccna.and.mcse]

المشاركة الأصلية كتبت بواسطة om_2000

لا حول ولا قوة الا بالله

هههههههههههههههههههههههههههههههههههه

طيب لما كلية الحاسبات والمعلومات لا تتبع قطاع الحاسبات والمعلومات يبقى مين اللى بيتبع هذا القطاع ؟!!!!!!!!!!!!!!!
كلية الطب مثلا ؟!!!!!!!!!!!!!!!!!!!!!!!!!!!!!!!!!!!

و بعدين جايب لينك مقالة كتبها صحفى وبتعتبره دليل !!!!!!!!!!!!!!!!!!!!!!!!!!!!!


طيب ايه رأيك فى اللينك دا ، وشهد شاهد من أهله

فى الموضوع عن الفروق بين الحاسبات والمعلومات وشعبة الكهرباء بكلية الهندسة ، وشعبة الرياضيات بكلية العلوم

تم ذكر تصنيف الكليات

وتم ذكر أن كليات الحاسبات والمعلومات ضمن قطاع الحاسبات والمعلومات

http://thanawya3ama.blogspot.com/201...formation.html

زمان كانت كلية الحاسبات و المعلومات تتبع قطاع الدراسات الهندسية و بعدين لقوا ان القطاع بيديها وقت قليل لتطويرها مع كليات أخرى فراحوا فاصلينها فى قطاع الحاسبات و معلومات و الكلية تتبع قطاع الحاسبات و المعلومات دون غيرها فى المجلس الأعلى للجامعات

لكن هناك لجنة تجمع قطاع الدراسات الهندسية و الحاسبات معاً من أجل مناقشة القضايا المشتركة و العلوم المشتركة و التكامل فيما بينهما
تسمى لجنة الهندسة و الحاسبات ..

و دى اللينكات بتاع اللجنة فى المجلس الأعلى للجامعات


http://www.mediafire.com/view/?tqzs6yu2l97b9y8

و حضرتك خريج كلية أخرى غير حاسبات فمتجيش عندنا المنتدى لو سمحت

[ccna.and.mcse]

المشاركة الأصلية كتبت بواسطة dr/nor pt

ههههههههه حلو للجذب بس طبعا هىى من افضل الكليات وبلنسبة ليا افضل من همدسة انا مش حاسبات انا دكتورة ان شاء الله بس بلتوفيق حاسبات روعة والى يقول عليها فكسانة هو الى فكسان

شكرا جزيلا ا دكتورة شرفتينا و نورتينا