ياريت حد يساعدني

[aalaaabdelhamed]

السلام عليكم
انا في تانية ثانوي السنة دي بتقابلني مشاكل كتير منها مش بحب الرسم ومش بعرف ارسم رسومات الاحياء خالص ومش عارفة اعمل ايه والانجليزي مستواي فيه مش اوووي نفسي ابقي قوية فيه وحاسة اني مش عارفة احدد هدفي حاسة اني تايهة
لو سمحتم ممكن تساعدوني

[Dr.Noha Sami]

بصي ياجميل الاحياء مش لازم يبقى رسمك حلو المهم ان مضمونها يبقى صح والبيانات سليمه انتى مش اول ولا اخر واحده تكونى مش بتعرفى ترسمى هى الفكره كلها انك تحاولى طول السنه ترسمى بأيدك اى رسمه تقابلك علشان تعودى ايدك ع الرسم ,,الانجليزي انا كنت حاسه زيك وانا في ثانويه عامه بس بقيت بذاكر وبحل كتير ومن كتب كتير واقرأ براجرافات بجيبها من ع النت علشان تفيدنى في كتابة البراجرافات ف الامتحان وبشوف ترجمه بأجابتها وهكذا وبالتدريب هتبقى تمام ,,هدفك شوفى انتى نفسك تكونى ايه ؟ انتى داخله تسألى في قسم طب بشري يعنى اكيد نفسك تكونى دكتوره ..ده هدف مش صعب وباجتهادك هتحققيه ان شاء الله ,,بالتوفيق

[aalaaabdelhamed]

شكرا بجد يا دكتورة وان شاء الله هنفذ اللي حضرتك قولتي عليها بس بالنسبة للتعبير الوظيفي والابداعي والبلاغة مستواي فيهم مش اووي اعمل ايه ومش بعرف اظبط مواعيد نومي يعني المفروض اذاكر كام ساعة ع الاقل وعندي صوحابي كل ما اشوفهم يقولولي احنا مش بنذاكر ويحبطوني وبالنسبة لهدف الطب ده مش صعب فعلا وجزاكي الله خيرا يا قمر

[Dr.Noha Sami]

المشاركة الأصلية كتبت بواسطة aalaaabdelhamed

شكرا بجد يا دكتورة وان شاء الله هنفذ اللي حضرتك قولتي عليها بس بالنسبة للتعبير الوظيفي والابداعي والبلاغة مستواي فيهم مش اووي اعمل ايه ومش بعرف اظبط مواعيد نومي يعني المفروض اذاكر كام ساعة ع الاقل وعندي صوحابي كل ما اشوفهم يقولولي احنا مش بنذاكر ويحبطوني وبالنسبة لهدف الطب ده مش صعب فعلا وجزاكي الله خيرا يا قمر

العفو تحت امرك ,,بصي التعبير فعلا كان من اكبر مشكلاتى بس هطمنك الاول بحكايه كده قبل ما انصحك ,,وانا في ثانويه عامه كان الامتحان طويل جدا وكنت سايبه التعبير للاخر وماكنش باقى غير 10 دقايق اكتب فيهم التعبير فطبعا اتوترت جامد وماعرفتش اكتب حلو خالص وقمت مروحه من الامتحان معيطه وقولت كده ضيعت ال14 درجه بتوع التعبير ,ويئست تماما وفوجئت بعد كده انى ناقصه نص درجه بس في العربي فعرفت بعدها من المدرسين ان في التصحيح لو لاقوا حد مجاوب كل الفروع صح مش بينقصوه كتير في التعبير لانه واضح من اجاباته في باقي الفروع انه اصلا شاطر اللى اقصده انى اطمنك ان ممكن تجيبي درجه عاليه في العربي والتعبير عادى ,,بالنسبه للنصيحه اللى هقولك عليها افتحى امتحانات الثانويه بتاعت السنين اللى فاتت وكل يوم جمعه مثلا امسكى ورقه وقلم وحاولى اكتبي تعبير من اللى جوم في السنين اللى فاتت ,اول مره هتلاقى نفسك كتبتى موضوع مش حلو وخاد منك وقت طويل بس مره في مره هتلاقي الموضوع اسهل بكتير وبقى عندك قدره في الكتابه ,,او زى ماقولت لك في الانجليزى حاولى تقرأى مواضيع تعبير علشان تكتسبي منها مقدره ع الكتابه وكلمات قويه ,,,وحاولى تستعملى الكلمات القويه اللى بتبقى في مواضيع القراءه او النصوص في االتعبير علشان يبقى قوى ,,واحفظى ايات قرآنيه وابيات شعر على الاقل في الموضوعات المشهوره زى العلم والعمل والوطن ,,الخ لانك ممكن تدخليهم في موضوعات كتير ,,بالنسبه للبلاغه في كتاب اسمه الرساله مراجعه نهائيه عربي بيبقى فيه 120 قطعه نحو باجابتها و120 قطعة بلاغه باجابتها حاولى تحلى منهم وتبصي لطريقة الاجابه بتاعتهم علشان تتعودى على الاجابات الصح وهو في البلاغه استحاله تلاقى اجابه زى التانيه وجاوبي بأسلوبك عادى بس المهم ان المضمون يبقى صح ,,كتاب الرساله ده كنت جيباه في3ث مش عارفه في زيه ل2ث ولا لا ,,عموما ابقى اسألى ,,التعبير الوظيفي اعرفي بس طريقة كتابة الرساله ,التقرير,التلخيص,واكتب في مضمون الجمله في 10 اسطر مثلا (عكس التلخيص) ,المناظره ,البرقيه ,الاعلان.....وفي حاجات تانيه برده ,,المذاكره مش بعدد الساعات نهائي كل واحد بمقدرته ولازم يبقى في وقت للراحه ماتسمعيش كلام صحابك في حاجه وماتصدقيش حد لانهم اكتر ناس بتودى في داهيه خليكى مع نفسك ذاكري مثلا ساعه وربع وخدىى تلت ساعه او ربع ساعه راحه وبعدين ارجعى خدى ساعه وربع كمان وهكذا ,,,معلش طولت عليكى اوى بس حاولت اساعدك بالتوفيق ياقمر

[aalaaabdelhamed]

شكرا يا احلي دكتورة وجزاكي الله خيرا وربنا يكرمك ويوفقك ياااااااارب

[Dr.Noha Sami]

المشاركة الأصلية كتبت بواسطة aalaaabdelhamed

شكرا يا احلي دكتورة وجزاكي الله خيرا وربنا يكرمك ويوفقك ياااااااارب

العفو يا حبيبتى تحت امرك

[aalaaabdelhamed]

لو سمحتي يا دكتورة ابه راي حضرتك في المذكرات من علي النت واخصص وقت ادين للنت

[Dr.Noha Sami]

بصي فى مذكرات ع النت بتبقى كويسه زي مذكرات الاستاذ انور عبد الله فيزياء وانا كنت بستعين بحاجات كتيره من ع النت وهو على فكره مهم جدا للى عايز يستفاد منه شوفى ع youtube شرح برنامج مدرسه ع الهواء (بس ده في 3 ث ) دول بتوع البرامج التعليميه وبيبقى شرحهم فوق الممتاز وعلى فكره ممكن تعتمدي على شرحهم وانتى فى ثانويه عامه وماتخديش دروس ,,مفيش حاجه اسمها اخصص وقت اد ايه للنت انتى اول ماتعوزى حاجه مهمه منه قومى شوفيها طالما بتستفادى منه فهو مش بيعتبر تضييع وقت ,,انتى احيانا بتحسي انك زهقانه من المذاكره فى الكتب فساعتها قومى ذاكرى ع النت علشان تستعيدى نشاطك ,,ومفيش اى مانع انك تشوفى حاجات بره المذاكره كنوع من الراحه بس مايكونش وقت طويل يعنى ,,النت مهم مهم مهم للى عايز يستفيد منه ,,وهو من احد العوامل اللى ساعدتنى بشده فى الثانويه العامه
حاجه اخيره نسيت اقولها ف العربي هتلاقى مذكرات كتير عباره عن اسئله واجابه في الفروع بلاش منها نصيحه يعنى واقرأى الدرس كله على بعضه او فصل القصه على بعضه وبعدها بقى ممكن تشوفى الاسئله والاجابه ,,لان مذاكره اسئله واجابه بس فى العربي ممكن تضيعك ,,افهمى مضمون الدرس على بعضه افضل

[aalaaabdelhamed]

جزاكي الله خيرا يا دكتورة تشرفت بمعرفة حضرتك هو ينفع اكلم حضرتك من غير ما اكتب موضوع يعني خاص ولا ايه

[Dr.Noha Sami]

اكيد ينفع تحت امرك في اى وقت لو عزتى حاجه

[aalaaabdelhamed]

يعني لما اعوز اكلم حد خاص اعمل ايه

[Dr.Noha Sami]

اضغطى على اسمى هيطلع لك اختيارات اختاري ارسال رساله خاصه

[aalaaabdelhamed]

بيقولي لازم يكون عندك 100 مشاركة

[Dr.Noha Sami]

ايوه فعلا انتى المفروض تبقى مشاركه في الموقع 100 مشاركه علشان تعرفى تبعتى رسايل
عموما لو احتجتى حاجه اسألى هنا وانا تحت امرك فى اى وقت

[aalaaabdelhamed]

متحرمش منك ابدا يا قلبي والله انا ارتحت ليكي خاالص متنسيش تدعيلي ف صلاتك يا دكتورة