حل للطلبة اللى اتظلمت بسبب الكوسة اللى كانت فى الثانوية

[محمد مودى]

أنا بدعوا كل الطلبة اللى اتظلمت السنة دى فى تانية سنوى(أنا واحد منهم) انها تعمل جروب عالفيس بوك وتطالب فيه ان تانية تتلغى من مجموع الثانوية والمجموع يبقى على تالتة بس.
وان الطلبة المتفوقين يبدئوا يطالبوا بكدا فى برامج التوك شو
أنا جايب98.3% بس اتساويت باللى مابيفهموش وكدا التنسيق هيضيعنى

[محمد مودى]

أرجوا تثبيت الموضوع

[الجمالwالباكي]

بصراااااااحة كل الطلبة اللي في المنتدى يجيبو الشلل عشان كل واحد جايب 98 ولا 99 مش عاجبو ولا حامد ربنا امال لو كانت الامتحانات زي السنة اللي فاتت كنتو عملتو ايه؟؟؟؟؟؟؟؟ وبعدين يا اخينا انتا لسة في 2 ثانوي ومدام مش عاجبك 98 عوض في تالتة وجيب 150 من 100 بجد حااجة تجنن امال انا اعمل ايه اولع في نفسي بمجموعي يمكن ملحقش علوم يا ريت
لو جبت بس 93 مش 98

[محمد مودى]

ماهو انت هتتظلم أول واحد لأن التنسيق لما يرفع انت مش هتلحق ولا كلية

[محمد مودى]

اللى موافق عالفكرة يضيفنى عالفيس بوك عشان أبدأ أعمل جروب وأضيف فيه كل الطلبة
أنا اسمى (مصطفى منجى)
أما الأكونت اللى أنا فاتحه دا بتاع أخويا أصل الأكونت بتاعى مش راضى يفتح

[كوكبه]

هيا فعلا ناس كتير اتظلمت
طب الادبي يجيب زي اما يجيب لكن مهنة الطب ازاي واحد يدخلها بالغش والله ايام سوده جايه لما الواحد يروح بعد كده لدكتور مذكرش ويديلة علاج ميفهمهوش خالص وساعتها هنعمل ايه عشان الغش والكوسه وانا معاك في الفكرة دي

[Egyptian Shooter]

يا عم احمد ربنا على مجموعك ,, انا معاك فى كلامك بس هنعمل ايه .. انت فى مصر يا بابا

[sasooo soft]

يا اخ احمد ربنا على مجموعك وبص للى ملحقش يكمل ال 90
حسبى الله ونعم الوكيل
اصل دى بجد حرقة دم

[The king Boy]

بص يا سيدي صلي على النبي
الي جاب المجموع ده السنة دي بالكوسة مش هيجيبها السنة الي جاية لسبب ان المتوقع ان امتحانات السنة الي جاية هتبقى صعبة علشان يوازنوا العملية بسبب الاعداد الرهيبة ال هتدخل الكليات السنة دي فالي كان بيغشش مش هيغشش حد السنة الي جاية و بعدين انت كده المفروض تفرح لان السنة الي جاية لو لا قدر الله نزلت هيبقى مجموعك برده عالي و ربنا يكرم الجميع و

[mohamed_yousri_22]

كفاية بقا هيا البلد مستحملة احنا لية منقولش الحمد لله و نعدى الايام دى ع خير.......وعسى ان تكرهوا شئ و هو خيرا لكم.......اتقوا ربنا فى البلد دى....احنا انانين بنبص بطمع ع متطلبتنا و البلد تولع و البيعمل كدا مايستهلش يعيش فيها احسن

[omarhaleem]

متزعلش منى ف الكلمتين الى انا هقولهم دول
انا مش فاهم انتا عايز ايه بالظبط انتا اجتهدت وجبت مجموع محترم وفى زيك كتير اجنهدوا ومجابوش المفروض تحمد ربنا مش تقول نلغى مجموع تانية

[كوكبه]

يااستاذ عمر ماهو الطلبة اللي ذاكرت ومجبتش بسبب اللي مذكروش وجابوا فاهمني يعني حتى لو جايب 100%وواحد مذكرش وجاب 95%اكيد بتاع 100%هيزعل على وقته حرقة الدم المصاريف تعبة وارهاقه وتعالا لواحد مذكرش وجاب المجموع ده ومفيش اي حاجه الا شوية قلق الامتحان طب مانا كنت اقعد فريش ولا اذاكر ولا احرق في دمي ولا مصاريف واجيب المجموع ده قارن هتحس بالظلم

[fire king]

يا جماعه
في نتيجة المرحلة الاولى حوالي 70000 جايبين فوق 95% (شعبة علمي)
حسبي الله ونعم الوكيل

[h3ossam]

اللى بيقول انه اتساوى مع ناس تانيه (مبتفهمش)
يا عم اولا قول الحمد لله انك جبت المجموع ده غيرك كان نفسه مجموعك

و ثانيا انت كنت فين من الأول لما معظم اللى فى لجنتك كانوا عمالين يغشوا و انت ساكت ؟
انت كده تستحمل نتيجه سكوتك عليهم
و لو فعلا كان كل واحد مسكتش على الغش اللى كان فى اللجان بتاعه
كنت هتكون مبسوط بمجموعك و هتعرف تخش الكليه و انت حاطط رجل على رجل كمان

و ان شاء الله ربنا مش هيضيع تعب حد

[العم الكبير]

المشاركة الأصلية كتبت بواسطة محمد مودى

أنا بدعوا كل الطلبة اللى اتظلمت السنة دى فى تانية سنوى(أنا واحد منهم) انها تعمل جروب عالفيس بوك وتطالب فيه ان تانية تتلغى من مجموع الثانوية والمجموع يبقى على تالتة بس.

أنا جايب98.3%

بص يا باشا انت مجموعك كبير يعنى لازم تبص لقدام ...عملنا اللى قلت عليه...السنة الجاية صاحبك جاب اقل من السنة دى و ملحقش الكلية اللى هاوس نفسه بيها هينزل قدام الوزارة و يقول اشمعنا السنة اللى فاتت اتلغت..ايه رايك؟