طلب استشارة الاخوة الزملاء للضرورة

[mode moon]

اعمل معلم اول في تخصص الفلسفه
وبصراحه نفسيا متضايق جدا من التدريس بصفه عامة
وعندي فرصه انقل لتخصص اخصائي مكتبات
ايه الاحسن لو سمحتم
ولو ممكن من زملائنا الخبره يسردوا لنا تفاصيل عمل اخصائي المكتبات
في المراحل المختلفه بعد اذنكم

[طلال سلومه]

لو عايز رأييى الشخصى بعد خبرة 21 سنة فى مجال المكتبات

أنصحك بلاش

مجال المكتبات متعب جدا خاصة فى ثانوى ( ما بين مسابقات وزارية ومسابقات ادارة ومديرية ومسابقات مكتبات نموذجية ومهرجانات قراءة غير السجلات الكتير ال بتشتغل فيها يومياً ضيف لكل ده العهدة ... احنا بنشتغل فى ظل نظام تعليم ما زرعش قيمة الثقافة من الأساس .. انا شفت أكثر من فيلم تسجيلى عن المكتبات المدرسية بالخارج حاجة تشرف وخاصة فى دولة زى ماليزيا .

ده رأييى الشخصى انما انت لو مقرر النقل فأنا تحت أمرك فى سرد أى تفاصيل تخص العمل فى المكتبات المدرسية وخاصة فى المرحلة الثانوية العامة ال بأشتغل فيها

عموما ربنا يوفقك ومرة ثانية انا تحت أمرك

[arafat sherif]

نصيحة لله "خليكى بعيد أحسن عن شغل المكتبات وأرافها"

[خاطرة قلم]

تخصصنا مميز جداً جداً جداً
إنك تكون أخصائى مكتبة ..... شغلك بين العقول اللى داخل سطور الكتب
شىء خيالى بمعنى الكلمة

.....
بس مش داخل مصر
.....
ثقافتنا موصلتش اننا نزرع فى الطفل حب القراءة من الصغر
وثقافة تعليمنا بدون أساس

وبالتالى انك تحاول تزرع دا فى طالب فهو مرهق ومحبط فى أوقات كتيرة
ع الرغم من الاهتمام الكبير جدا بالمكتبة ومحاولات الارتقاء بيها وتطويرها
إلا إن الاساس متصدع
سجلات كتيرة جدا (اساسية وفرعية )
عهدة
منهج غريب (رأى الشخصى )
مطلوب منك فى الشهر تعمل شغل كمى وكيفى كمان وبأسماء طلبة متعلمتش ازاى اساسا تتعامل مع الكتاب
دا طبعا مع الحصص
وكمان الاحتياطى اللى موجود لأخصائيين المكتبات لإنهم قاعدين بيكتبوا فى السجلات

مجرد رأى ..

[seif20010]

خليك فى التدريس افضل لان المكتبات اصبحت حمل تقيل
ومتعبة لدرجة ان اى حد تايه وماشى بجوار سور المدرسة
بيسأل على المكتبة احنا زهقنا

[فاين فاين]

حتندم العمر كله لو حولت الي أخصائي مكتبات. عمل المكتبات لا ينتهي وسجلاتها كثيرة وموجهين المكتبات متصلطين ولا يعجبهم أي شيء ومعظمهم ستات متخلفات. فهم يبحثون عن الأخطاء فقط. وعمل المكتبات مستمر طول العام حتي في الاجازة عايزين نشاط صيفي. بصراحة أسوأ وظيفة في التربية والتعليم هي المكتبات. ولا تنسي جرد آلاف الكتب آخر العام وعهدة ووجع ألب والمرجع أو القاموس الضايع حتدفع ثمنه من جيبك. من الآخر ابعد عن الشر وغنيله
أنا أخصائي مكتبة أكتر من 20 سنة ومعلم خبير لغة انجليزية 5 سنوات