الواسطه والكليات العسكريه ....؟!

[النجم7610]

السلام عليكم يا احلى اعضاء فى بوابه الثانويه

طبعا خلاص الامتحانات خلصت وكلنا مستنين النتيجه اللى ان شاء الله هتكون تمام وكلنا ننجح وكل واحد يدخل الكليه المفضله ليه باذن الله

اما اللى ناوى يدخل كليات عسكريه وانا أأمل انى اكون واحد منهم .. بس لما رحت مركز التأهيل للكليات دى عشان يأهلك لاختبارت القدرات والكشف الطبى وخلافه ..... وجدت كل اللى رايحين عاملين حسابهم على واسطه وكمان بيقولى ليا لاااااازم واسطه ؟؟؟

انا عارف ان الواسطه دخلت فى كل حاجة بس اللى مش معاه فلوس الواسطه اللى بتكون بمبالغ رهيبه يعمل ايه يقعد فى البيت احسن ؟؟؟

انا اول يوم رحت اتمرنت فيه بجد تعبت جامد لان التمرينات بتكون زى ما قال الكتاب وكان عندى احباط من الكلام اللى سمعته بخصوص الواسطه

بس لما رحت تانى يوم وشوفت كل اللى عاملين حسابهم على واسطه فى منهم اللى انسحب من التمرين واللى سمين ( زائد فى الوزن ) وعايز يدخل الشرطه عرفت فايده الواسطه بالنسبه ليهم ...

يعنى بدون فخر وجدت نفسى كابتن المجموعه لان المدرب اللى بيدرب طلعنى وخلانى اوريهم التمارين فى وضعها الصحيح

بصراحه لاقيت كلوا داخل ومعتمد على الواسطه

انا اطمنت نسبيا وخليت واسطتى ربنا اللى اكبر من الكل وان شاء الله الواحد يعمل اللى عليه وكله على ربنا طبعا وان شاء الله لو فعلا تعب ف التمرين وخلى بينه وبين نفسه بالفعل ان ربنا معاه ان شاء الله هيعدى ويدخل الكليه اللى بيتمناها

فانا عملت استطلاع اتمنى اشوف رايكم فيه ...... فى انتظار الردود

[أسيل رزق]

من أيام رد قلبى و الكليات العسكرية عايزة واسطة

ده موضوع بخصوص الكليات العسكرية

عاوز تدخل حربية ؟؟ عاوز تدخل شرطة ؟؟ .. خليك معايا ( متجدد ان شاء الله )

[prof.ahmed4d]

خلى الناس تاكل عيش يا عم احمد

الموضوع ده من زمان ومش ايخلص طول ما الحال ماشي ( انت فاهمنى بقى )

في رعاية الله

[eng.sabry elbrins]

ميه ميه يانجم وربنا كلامك يابنى كله صح من الالف للياء فعلا انا اما رحت من يومين للاكاديميه صباح الاستغلال فى الفلوووووس وسمعت قوواميس شتايم عمرى ماسمعتها فى ياتى اما بالنسبه للتعب فاانا شكلى مش هروح تانى وبالنسبه للواسطه دى مفيش كلام فيها انت المفروض تدور الاول على الوسطه وبعد كده على المجموع والكليه وده فى اى حاجه وفعلا نعمه بالله هو احسن من اى حد.......

على العموم انا هبقى ادور على وسطه ليا وليك
تقبل مرورى
فى رعاية الله

[_GUIDE_]

هل للواسطه دور للقبول فى الكليات العسكريه ؟

طبعا بالواسطة يعنى هى هتيجى على دى
ده انت حتى لو حبيت تدخل
حمام فى الشارع
لزم تدفع للراجل اللى واقف عليها نص جنيه ولا حاجة
علشان يرضه يخليك تدخل حمام محترم

[** MR.SmilE **]

من زمان و الكليات العسكرية عاوزة واسطة او فلوس

افتكر من كام سنة واحد من الجيران كان بيحكي زيك كدة

انه راح و شاف ان كتير اوي مش ينفع يبقي ضابط ( او حتي عسكري نفر ) بأي شكل من الاشكال

و لما سألهم ردوا بكل برود ان معاهم واسطة اللواء فلان و العميد علان .. و كله بيمشي !!

المصيبة ان دول اتقبلوا .. صحيح ان جاري ده كمان اتقبل بس ما زال مستغرب ازاي هيكونوا دول حماة مصر

في المستقبل .. هم يضحك و هم يبكي

ربنا يوفقك و تتقبل

[Shourouk]

لو قولت ان الموضوع مش متوقف على وسايط تبقى بتضحك على نفسك
انا اخويا قدم للحربية و مجموعه كان كويس
وعدا كل الاختبارات والمفروض فرصتو كانت اكبر من غيرو
و طبعا فهمت ماتقبلش ليه
منهم لله بقى
بس عندنا بيدوروا على واسطة تانية
وهيقدم السنة دى ربنا يستر

[BaNZeR]

في بلدنا الكوسة هي الحل

[The Secret]

لازم طبعا واسطة او فلوس وياسلام لو واسطة وفلوس دا انت كدا تبقى خلاص ع الابواب ( كله بامر ربنا طبعا )

ودلوقتى الواسطة ف كل حاجة مش ف الحجات دى بس برده بعد ما تخلص كليتك محتاج برده واسطة عشان تشتغل

ف مجالك اللى كنت بتدرس فيه او مجال تانى ملهوش اى دخل بمجالك

انا صاحب اخويا من سنتين او تلاتة كان مقدم على حربية وبرده عدى كل لاختبارات كلها

حتى ف الاخر عجزوه وقلوله بص احنا عايزينك تعدى من تحت الباب دا عشان طبعا يخلصوا منه بس طلع منها

وطلع البطاقة تقريبا بتاعته ورماها من تحت الباب حتى اللى قاله كدا اشتغل يضحك بعد ما شاف تصرفه دا وكان نظره ستة

على ستة حاد والمشير طنطاوى كان مرشحه لجوية

بس ف الاخر برده متقبلش وكل واحد بياخد نصيبه

على فكرة النيابة دلوقتى بيدفعلوها 200 الف تقريبا

بس الفلوس اللى بتدفع دى حرام ولا مش حرام ؟

[بروف انس]

انا والله يا جماعه معروض عليا الفنيه العسكريه وانا مجموعي جايبها وعديها كمان بخمسه في الميه قلت لابويا اكيد هنعوز واسطه ضحك وقالي اكيد قلتلوا انا مش عايز ابدا حياتي بواسطه ومش عايز لاي حد جمايل عليا وان كان معاك الفلوس بتاعت الواسطه انا بعد ما اخلص كليتي انا اعمل مشروع او اسافر بره بس مش عايز وسايط من حد ولا اي حد والحمدلله انا لائق بدنيا وعلميا بس انا نفسي عزيزه عليا ولو كلنا اتبعنا نفس المبدا والله يا جماعه هنحقق لنفسنا حاجات كتير

[MoHammed Youssef]

ان شا الله ربنا يكرمك وتدخلها اعتمادا على الله

[MoHammed Youssef]

بس انا اخويا دخل بالواسطة لانها حاجة اساسية بقت دلوقتى ............ شوية لقادم وهيقلولك فى الاستمارة من هو وسطتك ؟؟؟؟؟

[CoMMaNdo]

عن تجربه منى ومن اصحابى
الوسطه ملهاش اى تدخل فى القبول بالكليات العسكرية
ولو كان للواسطه دور بيبقى فى التحريات و كشف الهئيه فقط
الى هوا اخر اختبار
يعنى الطبى والرياضى ومعظم الاختبارات مفهاش وسطه
وانا واحد صحبى والده عميد جيش
ومقبلش فى الكليه الحربيه
واتكتبله غير لائق طبيا

[Last Fantasy]

أنا معرفتش أختار لأنها بإرادة ربنا بس

[abdelRhman772007]

مش عارف أصدق مين و أكدب مين
يحضرنى بيت الشعر ده عن حالنا
يا بلدنا فيكى حاجة محيرانى نزرع القمح فى سنين تطلع الكوسة فى ثوانى