العلاج الحرارى Thermotherapy

[DPT-Blue Phoenix]

#‏العلاج_الحرارى_او_العلاج_باستخدام_الطاقة_الحراري ة‬
‪#‎Thermotherapy‬
‪#‎Heat_Therapy‬

- ايه حكاية العلاج الحرارى دا بقى ؟! يعنى ايه علاج حرارى اصلا ؟! و هل فعلا الحرارة ليها تاثيرات على الجسم بحيث تؤدى لعلاج الامراض ؟! و الى اى مدى الحرارة فعالة فى علاج الامراض المختلفة ؟! و ايه دور دكتور العلاج الطبيعى هنا !؟ طيب امتى استخدم الحرارة دى و امتى لا ؟!

‫#‏العلاج_الحرارى‬ : هو استخدام درجات الحرارة العالية و خاصة من المدى 40 ل 45 درجة او اعلى شوية لعلاج الامراض المختلفة ..
- طيب الحرارة دى بتعالج ليه تعالوا نتسلى مع بعض كدا ؟!
- لما بطبق الحرارة على مكان معين على الجسم ايه الى ممكن يحصل يا ترى ؟! اكيد اول حاجة هنشوفها ان هيحصل تمدد للاوعية الدموية يعنى هيحصل ليها Vasodilation و نتيجة لزيادة درجة حرارة سطح الجسم عن تجويف الجسم لان الحرارة بتطبق من الخارج طبعا هنلاقى الدم يجرى من اعضاء الجسم الداخلية بكمية كبيرة ناحية الخارج و تنشط الدورة الدموية بشكل كبيرة و تزيد سرعتها Increase Circulation ..
- مش بس كدا زى ما احنا عارفين ان الجسم ما هو الا مجموعة عمليات حيوية و تفاعلات كيميائية بتحصل و لما انا بزود درجة الحرارة بتزيد سرعة التفاعلات الكيميائية فى الجسم و بالتالى بيزيد التمثيل الغذائى Increase Metabolism بمعنى ان الحرارة هتشتغل هنا كعامل حفاز .. معنى زيادة التمثيل الغذائى هو زيادة عمليات البناء و الهدم فى الخلية..
- ومن الآثار الى احنا شايفينها دى الحرارة بتزود مجرى الدم و بالتالى الدم بيوصل للمكان الى احنا مطبقين فى الحرارة شايل معاه المواد الغذائية و الاكسجين مش بس كدا و تزيد عمليات البناء فى الخلية و بالتالى الخلية دى لو مصابة تبدا تتشفى يعنى يحصلها Healing و بالتالى يقل الالم بدرجة معينة و لحد دلوقت الجسم بيعالج نفسه بنفسه شوف جمال العلاج الطبيعى .. لكن لازم اخد بالى هنقول كام ملحوظة ..
- مش بس كدا الحرارة بتروح على عضلات الجسم و تعمل فيها ارتخاء لانها بتقلل من مقدار الشد فى العضلات و تعملها استرخاء مش بس كدا و كمان بتودى ليها كميات كبيرة من الدم و الاكسجين و المغذيات و بالتالى بتقاوم الشد العضلى ..
بس نتيجة للحرارة مجهود العضلة بيقل و تبدا تدخل فى حالة راحة ..
- الحرارة بتقلل الالم ليه ليه ليه ؟! هنقول الاول الالم بيبدا ازاى يا ترى تعالوا نفتكر مع بعض كدا !؟ بافراز بعض المواد الى بتبدا سلسلة الالم لكن الحرارة بما انها بتزود الدورة الدموية فالدم بيعمل صرف للمواد دى و ياخدها فى طريقه و بالتالى بتبدا تقف سلسلة الالم Removal of waste products و مش بس كدا كمان الحرارة بتعمل استثارة للاعصاب الكبيرة الى اسمها A-beta و الاعصاب دى بتقفل ممرات الالم و بالتالى يقل الالم كمان ..
- و نخلى بالنا ان الحرارة بتعمل خفض لضغط الدم طبعا لان زيادة قطر الاوعية الدموية بيعمل خفض للضغط تبعا لقانون بويل فى الفيزياء ..
و طبعا بتزيد كمية العرق نتيجة زيادة درجة حرارة الجسم و بالتالى الجسم بيتخلص من كتير من السموم و طبعا نتيجة نشاط الدورة الدموية بيزيد معدل ضربات القلب و بيزيد التنفس ..
‫#‏تعالوا_نحكى_قصة_دكتور_لسه_فى_البداية‬ اخونا حمادة و نشوف عمل ايه ؟!
دكتور حمادة دا دكتور علاج طبيعى لسه كدا فى اولى علاج طبيعى و هو طبعا قرا عن العلاج الحرارى و درسه و مبسوط اووووى فلقى ايه اخوه الكبير عنده التهاب فى مراحل الاصابة الاولى بتاعته Acute Inflammation و زى ما قلنا الالتهاب عبارة عن زيادة فى نشاط الخلايا ؟!
قام ضاحك ضحكة ثقة كدا و قال لاخوه سبنى اتصرف انا دكتور و العلاج الطبيعى دا فل و قام جايب الكمادات السخنة و راح حاططها على مكان الالتهاب .. بنبص بعد ربع ساعة لقينا الالتهاب الى كان واحد سم بقى 5 سم و اخوه بيصوت من كتر الوجع و جرى ورا اخونا حمادة بالشبب ؟!
هههههه اخونا حمادة هنا مفكرش ان الحرارة هنا هتزود الالتهاب ليه ؟! لان كمية الدم الى رايحة هتزيد و هيزود معدل التمثيل الغذائى و بالتالى نشاط الخلايا يزيد اكتر و بالتالى الالتهاب يزيد و الالم هنا مش هيقف لا دا هيزيد نتيجة زيادة الالتهاب ..
يبقى مينفعش اطبق الحرارة فى مراحل الاصابات الاولى و لا على الجروح المفتوحة لانها هتزود النزف و لا على شخص عنده حمى و درجة حرارته مرتفعة ولا شخص حاطط شرائح و مسامير مينفعش اطبق عليها لانها هتسخن و تعمله حرق ..
لكن الحرارة تنفع لو هطبقها على مراحل الالتهاب الى بعد كدا الى اسمها Subacute and chronic stages فى المرحلتين دول ايه الى بيحصل خلينا فى الالتهاب ..
Subacute or chronic inflammation ايه الى هيحصل للالتهاب ؟!
فى المراحل دى نشاط الالتهاب دا بيقف او بيقل خاااااالص و بيبدا يبقى اسمه التهاب مزمن او تحت الحاد ..
فلما انا بطبق الحرارة هنا و نشاط الخلايا واقف اصلااااااا ؟! بيبدا تروح كمية كبيرة من الدم و شايلة معايا اجسام مضادة و كريات دم بيضاء هتحارب الالتهاب دا و هتبدا تعمل صرف للمواد الى بتعمل الم فيخف الالم و يبدا الجسم اوتوماتيك يقاوم الالتهاب و يحصله تشفى ..
و نفس الكلام فى حالات و ليكن مثلا Edema فى المراحل الاولى احنا قلنا بيحصل تجمع للسوائل طيب المراحل الى بعد كدا بتكون السوائل اتجمعت خلاص و المكان بتاعها كدا انتفخ لكن وقف تدفق السوائل طيب لما اعمل حرارة فى الوقت دا ؟!
هتروح كمية دم كتير و تشيل السوائل دى و تخليها تدخل فى الطريق الوريدى و الليمفاوى و بالتالى تبدا المواد دى او السوائل دى يحصلها صرف و الجسم يتخلص منها فى الكلية او غيرها ..
‫#‏حمادة_رجع_تانى‬ : اخونا حمادة برده كان بيلعب كورة مع اصحابه فصاحبه حصله شد عضلى راح قال ايه الحرارة بتقلل الشد العضلى و راح رايح و قام مطبق الحرارة على صاحبه الى عنده شد عضلى ؟!
صاحبه شكره لان الشد بدا يخف لكن جه يقوم يلعب مش قادر يجرى ؟!
ايه السبب ؟! ان الحرارة بتقلل من نشاط العضلات و عشان كدا مينفعش اطبق حرارة الا اذا كان الشخص دا هيرتاح بعدها لكن مينفعش اطبقها على حد هيقوم يعمل مجهود تانى ..
لكن اطبق Cold لانه هيخفف الالم و هيزود نشاط العضلة ..
و من هنا لو احنا فى المراحل الاولى او ما تسمى بال Acute نطبق Cold انما فى المراحل الى بعد كدا الى اسمها Subacute and chronic نطبق Heat و ناخد بالنا من حكاية الشد دى و طبعا بندمج كل دا مع التمارين العلاجية ..
-- من وسائل الحرارة كتير جدا فى الكمادات الساخنة و دى ليها حاجات خاصة ممكن شمع البارافين و المريض يحط فيه الجزء الى تعبه و يبقى زى الماسك كدا و يتشال بعد فترة ممكن الاجهزة الى بتستعمل الماء الساخنة و تدورها زى جهاز اسمه حوض الدوامة فى الصور تحت Whirlpool و ممكن فى اجهزة الاشعاعات زى الاشعة تحت الحمراء او اجهزة الانفاذ الحرارة او غيرها ..
-- الحرارة ليها استعمالات كتير جدا و واسعة جدا منها مشاكل العضلات و الآم العظام و بعض مشاكل الاعصاب و مشاكل المفاصل و الغضاريف و غيرها و بتتنوع بتنوع الاجهزة ..
و بدون اى آثار جانبية و من خلال معرفتك و دراستك لتاثيرات القوى دى و دراستك للجسم بتقدر تحدد ايه الانسب و امتى استخدمه و الاهم انك بتخلى الجسم هو الى يعالج نفسه بنفسه و دى عظمة العلاج الطبيعى ..
العلاج الطبيعى العلاج الحرارى ..