الى البنت اللى سهرانة

[Âñå Prïñcëŝŝ zoza]

إلي البنت اللي سهرانة لهذا الوقت
وبتفكر ف واحد كان زمان روحها - لكن مابقاش كده دلوقت
وبترتب دولاب وحدتها بالواحدة
وبترتب دولاب صداقتها على واحدة - خدِت منها رصيد أحضان ومشيت قبل ماتردّه
إلي البنت اللي فيها كلام بيجمع ضد مع ضده
بتضحكلك وشايله دموع
وتكتم حزنها المسموع
ولما تخش ف الموضوع - بتحكي هموم بشر تانيين
إلي البنت اللي لو حبّت .. بيفرز شوقها أدرينالين
إلي الصاحية على سريرها
تعاتب أهلها النايمين
" مساء الخير " على عيونك
وطظ ف حد بيخونك عشان شافك يادوب شهوة
ياخايفة من جميع الناس وثقتك بس ف القهوة
أنا شايفك وحاسس بيكي والله - يا فاردة لخوفها دراعاتها
سراير شوك بتحوي بنات .. تنام من نور موبايلاتها
مساء الخير على دموعك
وعلى خوفك من الماشيين
مساء الخير على جراحك
وكل الخلق مش شايفين
مساء الخير على جسمك - سهام مرشوقة بني ادمين
أنا حبيت أقولك بس
بإن المجتمع لو حسّ
هيضرب نفسه ميت مرة
عشان بيبُص من بره
ومش حاسس بأوجاعك
باعتلك حضن بيساعك
وشوكولاته من النوع اللي بتحبيه
وبادعيلك تقابلي فلان وتكملي بيه
وبادعيلك بطفل يكون بيشبهلك
وأهل يكونوا شايفينك
وناس ف المشي صاينينك
وفرحة تدوسي عتباتها
.............................
" إلي الأرض اللي فيها بنات - دموعها ف نور موبايلاتها "
‫#‏الي_البنت_اللي_سهرانة‬
‫#‏عمرو_حسن‬

[عبد السلام الراشد]

شكرااااااااااااااااااااااااااااااااااااااااااااااا ااااااااا