كلمتين صغيرين ياحلوين يامقطقطين(الطلبه الجدد بطب بيطري القاهره )

SENDRILLA · #11 29-09-2009, 07:02 PM

كل سنه وانتو طيبين
الدراسه ع الابواب
الحقو افتحولها بقي قبل ما ترجع في كلامها وتقوللكو هعدي عليكو السنه الجايه

النهارده بقي معانا كام نصيحه كده
بس ايه بقي
انا عارفه انكو داخلين علي دنيا جديده
ومهما حد كلمكم عنها لازم تعيشوها وتجربوها بنفسكو
بس اهوه بدل ما نعيشها كده سبهلله نلاقي ع الاقل حد يوعينا نعمل ايه ومنعملش ايه

طبعا الكلام ده هيبقي من خبره متواضعه في كليتنا العزيزه اللذيذه لا تتعدي السنه
بس اهوه كلمتين ينفعوكو في وقت زنقه
1- الدكاتره ع العموم في كليتنا او غيرها مبيحبوش اللوك لوك لوك لوك عارفينه هاه

يعني مش طول مانت قاعد في المحاضره ماسك في ودن اللي جنبك لحد ما تخربهاله

2- خليك مؤدب وظريف مع الدكتور عشان الدكتور في ايده كل حاجه
ينجحك يشيلك يخليك تعد سنه اضافي كل ده في ايده حتي لو كان الدكتور ده انت مش بتحبه او بتستتقل الماده بتاعته وساعتها تاخد بالمثل الشهير اللي بيقول ..........

3- خلي في عمار بينك وبين المعيدين

فاهمين ازاي ؟ لأ طبعا مش فاهمين
طيب طيب متزقوش هقول اهوه

يعني المعيد ده سنه اقربلك من الدكتور وفاهم كتير طبعا عني وعنك
ومعظم المعيدين بيبقو حابين يثبتو للطلبه انهم محل ثقه واي سؤال تسأله هيحاولو يردو عليك
وانت لازم تستغل النقطه دي كويس اوي
يعني روح للمعيدين كتير واسأل عن ده وده وخليه يشرحلك الجزء اللي مش فاهمه اسأله الامتحان بييجي ازاي ازاكر منين كل الحاجات دي هيفيدوك فيها
بس ملحوظه هذا الكلام غالبا لا ينطبق علي المعيدين اللي بيدو دروس
وانتو عارفين ليه

4- الدكتور بيحب الطالب الذكي النبيه اللي بيذاكر اول بأول
ومش هييجي يقوللك يا شاطر ذاكرت المحاضره اللي فاتت وللا لا

لا طبعا هتلاقيه في وسط المحاضره بيسأل في حاجه خدتها قبل كده وهيتبسط منك اوي لو جاوبتها واحنا مش عايزين اكتر من ان الدكاتره يبقو راضيين علينا

5- ذاكر اول بأول ترتاح
ماكدبش عليكو الموضوع مش سهل اوي زي مانتو فاكرين
بس لو يوم رجعت متأخر وملحقتش تذاكر حاجه
اضعف الايمان اقرا اللي خدته النهارده شوف صورت ورق ايه الدكتور اتكلم عن ايه
لانك لو ركنتها هتيجي الاسبوع اللي بعده في المحاضره اللي بتستكمل نفس الموضوع
هتبلم وتبقي ولا كأنك سمعت حاجه عن الموضوع ده قبل كده
6- في السكاشن حاول تكون صاحي عشان بتبقي محتاجه تركيز اوي
وكل ما تركز ده يسهل عليك بعدين

7- حاول تحضر كل المحاضرات متفوتش منها حاجه
هو انت لو فوتت كام محاضره مش هتسقط يعني

بس بجد الدكتور بيقول كلام في المحاضره ممكن يفك زنقتك وانت في امتحان الشفوي

والدكتور بيعرف اللي فاهم من اللي مش فاهم واللي بيحضر من اللي مبيحضرش
والشفوي سيد مين يعرف الدكتور الفرق

8- حاول تلتزم بمواعيد محاضراتك وسكاشنك
السكاشن عشان ميفوتكش حاجه
والمحاضرات برده عشان ميفوتكش حاجه وعشان الدكتور ساعات بيرخم وبياخد غياب وده بيبقي مش لذيذ لو كتبك غياب وانت حاضر المحاضره اساسا

9- مش اي حاجه تذاكر منها ومش كل حاجه تذاكرها
بمعني
مش انا عندي في الهستولوجي 20 مصدر اذاكر منه اقوم مذاكر ال20 مصددر وافتكر اني كده واد شاطر عشان ذاكرت كل حاجه

لأ ده بالعكس بيشتتك اكتر ما بيفيدك
انت لوحدك اللي هتحدد تذاكر كل ماده منين
الموضوع محتاج شوية وقت بس الشاطر اللي يقدر يحدد بدري بدري عشان يلحق نفسه
10- اصحابك
اصحابك دول بعون الله ممكن يخلوك تجيب امتياز وممكن برده يخلوك متطلعش حتي بمقبول
حاول تختار اصحابك صح ومش اي حد يتصاحب
وبرده شطارتك انك تقدر تحدد مين كويس ومين وحش واصاحب مين وماصحابش مين من البدايه كده

11- متفتكرش ان الشاطر هو بس اللي يخلص محاضرته ويجري علي سكشنه وبعدين ع البيت
لأ مش شرط
انت بس المهم تعرف ان وقت الجد جد ووقت اللعب لعب
مش بقوللك قضيها واستني التقدير يجيلك ع البريد

لأ بس عيش حياتك صح متبقاش حياتك كلها مذاكره وبس
الكليه عامله زي السوبر ماركت بالظبط ان جاز التعبير

فيها كل حاجه وانت بتختار
في اساسيات ماقدرش استغني عنها لازم اخدها(الدراسه )
وفي حاجات يعني ممكن اخدها عشان هتبسطني او هتريحني (اصحابي و الترفيه عن نفسي وكده)
وحاجات بقي هتضرني لو خدتها(تضييع الوقت وانك تعيش حياتك زياده عن اللازم يعني )
12- سيبك من الكورسات والكلام ده كله
صدقني ملهاش لزمه
وبتضيع وقت وهو مفيش وقت اساسا
حاول تعتمد علي نفسك مش زي ثانوي لو مخدتش درس في الفيزياء هسقط فيها مثلا
مع العلم اني مخدتش ولا درس وانا في ثانوي

متهيألي كفايه عليكو كده عشان بس متزهقوش
ولو دكتور ميجو حابب يضيف او يعدل حاجه التوبيك تحت امره طبعا

ولو حد عنده اعتراض علي حاجه من دول يقول

بس النصايح دي عن تجربه شخصيه ممكن تختلف من حد للتاني
بس يعني اكيد في حاجه ممكن تفيدك
واسفه علي الاطاله
وطبعا مش محتاجه اقوللكو لو في استفسار احنا موجودين