نظرة الناس مش هتتغير بالنقابة .. تعالوا نحسبها يا بشمهندسين

dando-255 · #1 26-09-2009, 08:23 AM

السلام عليكم يا بشمهندسن
كتر الكلام عن النقابة و بقى مبالغ فيه
يا جماعة النقابة مش هى اللى هتغير نظرة الناس لينا ولا هى اللى هتعلى تنسيق الكلية
و الدليل ان كلية اقتصاد و علوم سياسية اللى هى واحدة من أعرق كليات القمة
ملهاش نقابة
و مع ذلك خريجينها واخدين حقهم الادبى و المعنوى تالت و متلت .. و لهم هيبة
..
لو عاوزين الناس تغير نظرتها لينا .. يبقى باجتهادنا إحنا
نتميز و نجتهد و نطور من مهارتنا و نخلى طموحنا ملوش حدود
لما الناس يشوفونا ناجحين و ملعلعين هيغيروا نظرتهم لينا
كل واحد فينا يخلى طموحه انه ف يوم من الايام هيعمل شركة تنافس جوجل و مايكروسوفت
لو خلينا دا طموحنا هنوصل .. و حتى لو موصلناش هنقرب .. و القرب فى حد ذاته انجاز
و هيخلى الناس مش بس تغير نظرتهم فينا .. لأ دول هيفتخروا بينا كمان
زى ما بنفتخر بجهاز المخابرات و بشركة مصر للطيران .. عايزين نوصل لمرحلة اننا نخلى الوسط بتاعنا مصدر فخر للمصريين
عاوزين رمز مصر بدل ما يبقى الهرم و ابو الهول .. يبقى الهرم و جهاز لاب توب
والله احنا عندنا عقول زى الفل و أحسن عقول فى العالم كله .. هما الهنود أحسن مننا فى ايه ؟!!
دا المصرى الواحد دماغه توزن 4 هنود .. بس هما مكتسحين مجال البرمجة عشان الطموح و الاجتهاد
..
ننسى كلام الناس .. و نركز فى التارجيت بتاعنا و الحلم الاكبر .. شركة ايجى سوفت
اللى هنوصل بيها للعالمية
..
ايه رايكم كل واحد فينا بدل ما يفكر فى نظرة الناس و وضعه قبل و بعد ما يتخرج
يفكر احسن فى فكرة برنامج او سيستم او موقع او نظام تشغيل .. متكونش اتعملت قبل كدا
و ينفذ الفكرة بعد ما دراسته تؤهله لتنفيذها
هو دا الى هيخلى الناس تحترمنا
و ساعتها الحكومة هى اللى هتتحايل علينا عشان تعملنا نقابة
حطوا دايما فى دماغكم اننا أكتر كلية عملية فى العالم فيها مساحة للابداع و تشغيل المخ بحق و حقيقى
يللا بينا نندمج جوة مجالنا و ننسى كل شىء حوالينا
و نمشى ع الحكمة اللى بتقول
الكلاب تعوى و القافلة تسير

eng.ahmed55 · #2 26-09-2009, 12:57 PM

عندك حق يا بشمهندس
فعلا الكلية دى مش هتعلى الا بمجهودنا
وان شاء الله هحاول بقدر الامكان انى اجيب اخرى فى الكلية
وان شاء الله نبذل اقصى جهدنا عشان نبقى احنا التوب فى البلد دى

ahmed abdelaziz · #3 26-09-2009, 02:39 PM

باذن الله نعلى من نفسنا و من كليتنا و من بلدنا كمان

eng_sarah · #4 26-09-2009, 06:15 PM

بجد كلامك مشجع جدا يا بشمهندس وان شاء الله الكل يستفيد من الكلام دة بس احنا عندنا في مصر في اي مجال سواء كان دراسة او عمل مفيش اكتر من الكلام اللى بيكون مشجع وجميل جدا بس الفرق ان في ناس بتعمل بالكلام دة وفي ناس بتدخلة من ودن وتطلعة من التانية واحنا فعلا عندنا الناس عندهم مخ وبيفكرو كويس لكن في الهند والبلاد المتقدمة عامة بيسمعو وينفذو يارب احنا كمان نسمع وننفذ زيهم وهنبقى احسن منهم (ان شاء الله)

BêDô ΜâśĦâĶëL · #5 26-09-2009, 08:40 PM

بصراحة يا بشمهندس كلامك ده بيحمس الواحد بزيادة اوى
وياسلام لو كل بتوع حاسبات كدا هيبقي فعلا رمز مصر ابو الهول واللاب توب بس يبقي صنع ف مصر بقا

وعلى فكرة مش بعيدة يعني ..
فيه بلاد كانت متأخرة عننا بكتير ودلوقتى بقوا رواد ف مجالات كتيرة
يعني لسه فيه امل
وامل كبير كمان لان العالم كله بيشهد وبيحترم عقليه المصرى

the Bosy cat · #6 26-09-2009, 10:27 PM

كلامكم جميل يا بشمهندسين ان شاء الله بلدنا وكليتنا هتعلى بينا واحنا اللى هنخلى الناس تحترمنا وتقدرنا

eng/el doktor · #7 29-09-2009, 05:03 AM

كلام جميل جدا ومنطقى جدا وشيق جدا ومشجع جدا وجيد جدا
بس أنا عاوز اقول حاجه
بالنسبه للدليل اللى إنت أدليت بيه
بتاع إقتصاد وعلوم سياسيه
متنساش إن إقتصاد وعلوم سياسيه التوب بالنسبه للأدبى
يعنى كده كده لازم هيخدوا حقهم
لان ده المقياس بالنسبه للمصريين
اللى داخل أدبى ده أقصى حاجه يتمنها إقتصاد وعلوم سياسيه
النقيض بقى للعلمى والرياضه كمان
لان فيه ساحة تنافس كبيره أوى بين الكليات
وطالما إن هندسه مثلا تنسيقها أعلى ( وده طبعا للإقبال الكبير مش أكتر ) تبقى هى الاحسن
بصرف النظر إن كان ده صح ولا غلط
صحيح إن النقابه مش هى اللى هتديلنا قيمتنا
لان فعلا إحنا اللى هنعمل قيمتنا بمجهودنا زى ما انت قولت
لكن هى هتدى للكليه قيمتها
لان أولا لما النقابه تتعمل الإقبال ع الكليه هيزيد وهيزيد أوى كمان
شوف كام واحد جايب هندسه ونفسه ف حاسبات ومتردد من كتر الكلام اللى بيسمعه
الفكره هتتغير جامد والتنسيق بالفعل هيرفع
لكن قيمتنا كمهندسى برمجيات احنا اللى بنصنعها واحنا اللى بنجبر اناس إنها تحترمنا

وشكرا ليك بجد موضوع جميل
جزاك الله خير