إمتحانات الثانويه

[222ahmed222]

قصة امتحانات الثانويه العامة ال مكبرينها دي
كل سنه الإمتحانات بتيجي و يطلع بردو طلبه يعيطوا عشان معرفوش يحلوا
المشكله مبتبقاش في الإمتحان
المشكله بتبقى في الطالب ال مبيعرفش يتحكم في اعصابه لما يلاقي الإمتحان فيه كام تريك بسيطه فيروح ينهار و يفقد تركيزه وبالتالي ميحلش حاجه خالص
والدليل انه هتلاقي طلبه كتير مقفلين الإمتحان عادي جداً
الإمتحان الوحيد ال شوفته يتقال عليه صعب صعب يعني هو امتحان رياضه اتنين لسنة 2008 و الفيزيا كمان 2008
و الرياضه واحد لسنة 2010 ال هي الدفعه بتاعتنا
غير كده بقى الباقي كله عادي جداً
الإنجليزي كل سنه لازم بيكون فيه صعوبه لأنّ اللغات بشكل خاص انا شايف انه مش منطقي ان اي حد يقفل فيها الإمتحان وخلاص
يعني انت كده تروح تشتغل مواطن في بريطانيا لو جيبت الدرجه النهائيه
بعيداً بقى عن كل دا
الطلبه ال زعلانين جداً من مستوى الإمتحانات
طيب ياسيدي هنفترض انهم جابولك امتحان سهل
و انت حليت كويس وقفلت الماده
بس في طلبه غيرك كتييييير بردو قفلوا الماده لأن الامتحان سهل
بالتالي المجاميع هترفع
و التنسيق هيرفع
هتيجي تقول الحكومه مش حاسه بينا و رفعت التنسيق عشان الجامعات الخاصه
انا زمان كنت بصدق الكلام دا
بس بعدين اكتشفت ان دا كلام اهبل
جامعات خاصة ايه ؟ الكليات لها سعه معقوله تتحملها اكتر من كده التعليم هيبوظ
لو خليت المعمل ال آخره يدخله 20 طالب داخل فيه 50 محدش هيفهم حاجه ولا حد هيشتغل في المعمل اخرهم هيتفرجوا على المعيد و هو بيشرح بس!
الكليات لها طاقه فلو جبتوا مجاميع عاليه التنسيق هيعلى و هتزعلوا بردو
لو الامتحانات صعبه والمجاميع قلت التنسيق هينزل بردو
يعني الموضوع ماشي بعلاقه طرديه
فركزوا في اللحظه الراهنه والإمتحانات ال قدامكم ومتفكروش في ال بيعدي لأنّ مهما كان الإمتحان مش هو النهايه لأنّ هيترتب عليه التنسيق لو كان صعب التنسيق هيقل و يبقى تعبك مراحش ببلاش يعني
متاخدش زوم على كدر واحد ف مشهد الثانويه و تنسى باقي التفاصيل ال ف المشهد
يعني متاخدش زوم على سهولة وصعوبة الإمتحان بس و تنسى التنسيق ال هيترتب عليهم بعلاقه طرديه مش عكسيه متخافش
هي الحاجه الوحيده ال انتشرت و سلبيه جداً ولازم السيطره عليها هي مشكلة تسريب الإمتحانات ودا بيضيع مجهود طلبه كتير طبعا
بس انا دا مش محتاج اتكلم فيه لأنّ الكلام هيكون معروف طبعاً