استفسارين عن اولي ثانوي

[nmego]

انا انشاء الله داخل اولي ثانوي عام - و انا في ثالثة اعدادي كنت بذاكر من كتابين خارجيين و مذكرة عربي و بالنسبة للانجليزي كنت بذاكر في الترم الثاني من كتابيين خارجيين و كنت ببص علي كم مذكرة كدة بصة سريعة

الممهم دة لخبطني شوية في الاول و ضيعلي وقتي (كنت في اوول الترم الثاني بذاكر من ثلات كتب خارجية و مذكرة بس شلت الكتاب الثالث)

انا دائما بقرا في كل حتة علي النت - ذاكر من مصدر واحد بس - ذاكر من كتاب واحد بس

تمام بس كتاب خارجي واحد بس مش هيديني كل الاسئلة اللي ممكن تيجي في الامتحان فلازم اجيب اكثر من كتاب خارجي - و فيه كتب خارجية فيها اسئلة بدون اجابات و انا بكون محتاج الاجابة النموذجية (في العربي و الانجليزي مثلا) لكن فيه كتب ثانية فيها الاسئلة دي باجابتها
انا عارف ان فيه اسئلة الكتب حاللاها بطريقة مختلفة هاخد بالي من دي و اختار احسن طريقة بس دلوقتي اعمل ايه؟ احنا داخلين علي سنة جديدة - انا تمام في كل المواد محتاج كتاب خارجي واحد ما عدا العربي و الانجليزي فهل اجيب كل الكتب الخارجية الجامدة عن العربي و الانجليزي و افتح قدامي خمس كتب وقت المذاكرة و لا اعمل ايه بالظبط
و بعدين انا بحبش الملخصات انا بحب الحاجات الشاملة ال
thorough

دي نقطة - النقطة التانية في عجالة
انا سمعت ان منهج العربي و الانجليزي اتغيروا تمام - بس فيه واحد مدرس اعرفه قاللي ان الرياضيات برضه هتتغير - فهل كل المناهج هتتغير؟

اسف للاطالة و شكرا

[Mohamed Shawky99]

خمس كتب وقت المذاكرة ؟!!!!
انت ليه مصعبها علي نفسك كدا ، الموضوع أبسط من كدا بكتييييير
اولا هسألك سؤال ، احنا بنجيب كتب خارجية ليه اصلا ؟
_عشان الشرح فيها منظم اكتر عن كتب المدرسة + فيه تدريبات و أسئلة كتير
موضوع ذاكر من مصدر واحد بس ده صح ، لأنك بتختار كتاب تذاكر منه طول الترم و تحفظ إجاباته و طريقة حله ، لما هتجيب كتاب تاني اكيد هيبقي مختلف عن الاول في طريقة الشرح و طريقة الاجابة ، فمن الطبيعي تتلخبط
و علي فكرة هي مش بكُتر الكتب ، انت مش شرط لازم كل الأسئلة اللي تلاقيها في الامتحان تكون حليتها قبل كدا بالنص .. اه ممكن تكون فكرة السؤال عدت عليك قبل كدا بسبب كثرة الحل بس عادي ممكن تحل الاسئلة من غير ما تكون عدت عليك قبل كدا ، لو مذاكر الدرس كويس و حافظه "بالنسبة للعربي" هتحل اي اسئلة عليه
بالنسبة للأنجليزي ده عايز حل كتير ايوة بس مش بالكم اللي بتقول عليه ده .. انت في اعدادي و داخل اولي ثانوي يعني كمية الكتب دي انت بتضيع وقتك بيها بصراحة + انت بتسهل علي نفسك اكتر لو عندك حصيلة كلمات و بتفهم دروس الجرامر كويس

انا مابقولكش ماتحلش كتير بس بقولك في المعقول بحيث انك تستفاد و في نفس الوقت ماتضيعش وقتك اللي هتحتاجه خصوصا ان النظام في ثانوي هيبقي جديد عليك و المواد هيبقي فيها توسع اكتر مش زي اعدادي
بإختصار عشان ماطولش عليك ، في اولي و تانية ثانوي يكفيك كتاب واحد فقط في كل مادة لو ماكنتش بتاخد درس فيها ، لو بتاخد درس يبقي كفاية كتاب او ملازم المدرس بتاعك لأنه أدري منك بنظام اولي و تانية ثانوي
هتذاكر الدرس من الكتاب و تحل تدريباته خلاص يكفيك كدا اوي عشان زي ماقولتلك هتحتاج الوقت لأن عندك المواد كبيرة و الوقت يادوب علي القد فملوش داعي تضييع الوقت طالما اتمكنت من الدرس و جمعت افكار اسئلة كتير عنه

وعايز اعيد تاني .. انت هتخش الامتحان تحل اسئلته كلها و مش شرط تكون عدت عليك بالنص طالما مذاكر و فاهم و حافظ الدرس

و لو احتجت حاجة احنا موجودين معاك لو عايز تعرف اي حاجة تاني