أرجو المساعدة: دفعتى بشعة

[M.E.M.s]

أنا الحمد لله السنة دى داخل كلية
كلية طب ان شاء الله
و تخيلوا يا جماعة هى دى سبب مشكلتى
أنا الحمد لله مؤدب و من منزل صالح
و الحمد لله متفوق دراسيا و كل سنة أما الأول أو الثانى بالتبادل مع زميلة لى.
للأسف بسبب كده كل زمايلى بيضايقوا منى أصل أنا قدرى انى مع دفعة من الصبيان مفيهاش أى طلبة متفوقين أو حتى نقول عليهم كويسين الا واحد ولا اتنين.
و من ساعة النتيجة و هم معاملتهم غريبة الله أعلم حقد ولا غيرة و لا ايه بالضبط؟
للأسف الموضوع ده وصل لانهم يقولوا عليا كلام بشع و اللى ما قالش صدق.
و كمان لان فى واحد راهن عليا انه هيبوظنى ف الثانوية و هيخلينى ما ادخلش كلية من كليات القمة و اللهم لا شماتة هو دلوقتى بيتحسر و مأجل مواد كتير.
و دلوقتى مفيش أى حد أمشى معاه الا واحد هو حبيبى و صديقى هو ملهم و انا ذكرت اسمه بسبب حبى و ثقتى فيه هو الوحيد اللى ماعمريش حسيت بحاجة زى دى من نحيته على الرغم من انى جايب مجموع عالى الحمد لله و هو جايب مجموع يمكن أقل منى بثلاثين درجة بالمائةبس الحمد لله انا مش ببصلها من نحية المجموع المهم شخصيته الرائعة و الطيبة.
مع العلم ان للأسف مافيش حد الا القليل او يمكن مفيش خالص حد عندنا فى الدفعة بيصلى او يعنى الى حد ما عارف ربنا .
و انا كان نفسى امشى مع واحد يساعدنى على التقرب أكثر من ربنا.
و الحمد لله أنا بحاول اهه مع ملهم و يارب أنجح و تنجح صداقتنا.
و انا ان شاء الله من بكرة رايح معاه نشترك فى جمعية حماة المستقبل.
اهى حاجة تساعدنا على الصلاح.
و يا جماعة أمانة عليكم تدعولنا بنجاح الصداقة و كمان بالهداية للطريق الأصح.
و شكرا و لو فى أى مساعدة رجااااااااااااااااااااااااء الرد.
محمد

[bluestorm]

ربنا معاك و ربنا يوفقك
وتنجح وتطلع دايما الاول
وتلاقى الصحبة الصالحة

[M.E.M.s]

امين يا رب

[M.E.M.s]

علشان كده انا ملهوف و كل شوية اسأل مين معايا داخل الكلية لانى بخاف جدا من الأصحاب

[Prof.Dr/A.T.M]

يا محمد مينفعش توصف الدفعة بانها بشعة لمجرد انك تعرف اصحاب بشعين
انا سبق وقولتلك على احسن ناس فى دفعتنا
ممكن تصاحبهم وهما متدينين اوى
وخصوصا الولاد اللى داخلين معانا
متقلقش هتلاق ناس كويسة فى الدفعة لسه متعرفهاش

[M.E.M.s]

والله انا أقصد طلاب مركزى و بجد أنا بتكلم جد مش كويسين أبدا

[د\ الاء]

ان شاء الله ربنا هيوفقك وتلاقي اصحاب كويسين
وف الكليه هتقابل ناس من بلاد تانيه اكيد هيبقي فيهم ناس كويسين
واكيد طالما انت كويس هتلاقي اصحاب كويسين يتمنولك الخير

[Prof.Dr/A.T.M]

المشاركة الأصلية كتبت بواسطة محمد عماد الدين محمد

والله انا أقصد طلاب مركزى و بجد أنا بتكلم جد مش كويسين أبدا

مش لازم يكون اصحابك من مركزك
حاول بس تصاحب ناس بجد
ولو احتجت بعد كدة فى الكلية معلومة عن اى واحد اسالنى هنا على المنتدى ومش هابخل عليك بالمعلومة

[M.E.M.s]

يا جماعة دى الأمور وصلت لدرجة ان فى واحد كان مراهن مع واحد تانى على انه هيبوظنى و مش هدخل اى كلية من كليات القمة و هو دلوقتى اللهم لا شماتة مأجل

[M.E.M.s]

المشاركة الأصلية كتبت بواسطة a.t.m

مش لازم يكون اصحابك من مركزك
حاول بس تصاحب ناس بجد
ولو احتجت بعد كدة فى الكلية معلومة عن اى واحد اسالنى هنا على المنتدى ومش هابخل عليك بالمعلومة

الف الف شكر ووالله ما قصرتى و ان شاء الله

[M.E.M.s]

شكرا و ياريت المساعدة تكتر

[punisher]

ربنا يهديلك ملهم
و يهدى اصحابك و يااااااااااااااااااارب يهديك
و يهدينا كلنا و يهدى الشباب
و فعلا من أكتر المشاكل و اوحشها مشاكل الأصحاب

[M.E.M.s]

شكرا جزيلا على الرد يا أخpunisher

[JOUDI ANA]

ربنا معاكو ويفقكووا ان شاء الله
احمد ربنا ان حصل كده عشان تعرفهم على حقيقتهم وتبعد عنهم

[M.E.M.s]

فعلا الحمد لله