مبرمج او مطور ويب اروح فين واعمل ايه؟ ساعدونى بالنصيحة

php man · #1 17-01-2011, 03:15 AM

بسم الله الرحمن الرحيم

انا محتاج مساعدتكم اللى ممكن تغير مسار حياتى ومش هنسي اللى ساعدنى بالدعاء الخالص من قلبي والشكر
انا احمد من احدى القري, بحب الكمبيوتر جدا والنت اكتر وانا بعرف كتير فى اى حاجة تخص تطوير المواقع او الانترنت او Webdevelopment واشتغلت فى مواقع كتيرة Web Developer وكتبت مقالات عربية واجنبية فى مجال البرمجة فى لغات لها علاقة بالانترنت فى مواقع كبيرة, واشتغلت مع شركات عربية واجنبية وقدمت ليها اعمال, وانشأت العديد من الانظمة البرمجية وطورت برامج ادارة مواقع عربية كثيرة ولى العديد من الابلاغات عن الاخطاء البرمجية او الثغرات لشركات كبيرة عربية واجنبية مثل : Gmail, Yahoo وليا مشاريع ع النت بخطط ليها ومتأكد انها هتكسر الدنيا وهتتغلب على كل منافسيها, وبعرف HTML, HTML 5, PHP, CSS3, some JAVA, وعملت برامج متطورة, ووصلت لـ OOP والبرمجة الشيئية, وبعرف اتعامل مع اشهر البرامج وبعرف كويس فوتوشوب واشتغلت مصمم فترة, وبعرف اليستريتور, وبعرف QT, Dev C++ ... وبعرف انجليزي وبكلم اجانب على طول عشان اطور من مهاراتى اللغوية والنطق, وتعاملت مع شركات كتيرة فى المجال ده,
وكلامى دا مش عشان اتفاخر بيه لا, بس عشان ابين مدى حبي للبرمجة او للكمبيوتر وتطوير الويب,
انا عندى عقيبة كبيرة وهو مجموعى قليل جدا لانى بطبيعة كونى فى قرية حبيت انى اعمل انجازات وافوز باي مسابقة تبع البرمجة او تطوير الويب والمطورين او احد تقنيات الويب مثل SEO والمسابقات اللى دخلت فيها المركز الاول دايما, واهملت دراستي وبصيت للمواقع وللنجاح وللشغل وللفلوس وسبت المذاكرة والنتيجة جبت مجموع وحش فى تانية ورسبت فى مادتين الكيمياء والرياضة وان شاء الله هجيب فى تانية 70% ولما ادخل تالته ان شاء الله هبذل قصاري جهدى وهسيبنى من القورصات اللى بقدمها او من البرمجة, واللى عايزه انى اعرف انا هدخل ايه فى تالته ادبي ولا علمي زي ما انا, واى كليات او معاهد هتقبلنى, وايه المناسب ليا, واللى عايزه اى حاجة فى مجال حبي : برمجة تطوير ويب ... , مع العلم ان حالتى الاجتماعية مش كويسة "بالنسبة للجامعات الخاصة باهظة الثمن" بس الحمد لله,
واتمنى من حضراتكم اى احد يحط نفسه مؤقتا فى مكانى "بعيد الشر عليه بس مؤقتا" ويقولى لو مكانى هيعمل ايه, مثلا انا هدخل تالته كذا "علمي او دبي مثلا" وهروح معهد كلية جامعة كذا مقسم كذا تخصص كذا وبعديها هعمل كذا وكذا وكذا.
آسف للاطالة عليكم ويارب وفقكم ويحقق لكم احلامكم وتوصلوا لهدف حياتكم وتكونوا احسن ناس فى الكون واسمائكم تظل على لسان التاريخ, شكرا لكم.

~: Zac :~ · #2 17-01-2011, 04:09 AM

ممم بص يا غالي ف رأيي انك تكمل طريقك في العلمي وتحاول على قد متقدر تجيب مجموع عالي جدا لعل وعسى ربنا يكون كاتبلك تدخل حاسبات ومعلومات بس محتاج تتعب عشان توصلها .. لو لا قدر الله معرفتش ان شاء الله المجموع يدخلك علوم وتدخل قسم نظم معلومات ودي احتمالها كبير ان شاء الله .. ولو لا قدر الله منفعش بردو فرأيي انك تحاول تدخل تجارة انجلش و تحاول تتميز فيها وتبقى كويس في مجال المحاسبة والتسويق والمبيعات والادارة والحاجات دي وف نفس الوقت تطور خبراتك في مجال الويب بتعليم نفسك من النت او بكورسات ... واه لو كلية حاسبات هتستفاد منها اوي وهتأسسك ف حاجات كتير .. ولو شهادة من كلية زي حاسبات ومعلومات او هندسة قسم حاسبات بتقدير كويس هتفيدك في السي في بتاعك بس صدقني الخبرة في مجالك اهم بكتير المهم يكون السي في مليان عشان يزغلل عين اي حد وانت ما شاء الله عندك علم بحاجات كتير من دلوقتي يعني تقدر في خلال سنتين تلاتة تكون بقيت بروفيشنال في الويب ديزاين والويب ديفيلوبنج والبروجرامنج والداتابيز المهم ان دا هايحتاج منك شغل كبير وهيتوقف على دا ... وان شاء الله ربنا يكرمك ويوفقك وتحققك كل طموحاتك وترفع راسنا

php man · #3 17-01-2011, 11:10 AM

انا اهم حاجة عايز اجيب شهادة تثبت طموحاتى واذاي هخش تجارة انجليزي وانا طموحى فى البرمجة والكلام ده؟, وبعدين حضرتك بتقول كلية علوم وكده؛ انا هجيب آخرى السنة دى اللى هي تانية ثانوى 70% والسنة الجاية هعمل كل ماعندى
وبالنسبة للتعليم فانا عندى القدرة من دلوقتى على التعليم الذاتي باللغة الانجليزية كويس اوى ومصدر المعلومات ليها كبير جدا حسب تجربتي.
شكرا كتير لردك

~: Zac :~ · #4 17-01-2011, 11:29 AM

لو شديت حيلك اوي ممكن اوي تجيب مجموع علوم ان شاء الله فيه امل ..
واقصد انك تدخل تجارة انك تجمع بين الاتنين .. تقدم السي في يلاقو عندك خبرة في المجالين وطبعا اي شركة تحب دا
ولو عرفت تاخد كورسات او حتى تمتحن بس عشان تاخد شهادات يبقى كويس جدا ودا اضافة كبيرة ومهمة للسي في ...
وياريت فعلا تركز ع تعليم نفسك حاجات كتير ومش شرط تستنى الاجازة الا لو مفيش وقت ... بس ف اي وقت فاضي مادام مش هيعطلك ممكن تقرا اي حاجة او تطبق على اللي تعرفه عشان متنساش التطبيق ..

php man · #5 17-01-2011, 11:45 AM

تقصد ايه بالسي؟, وبالنسبة للتعليم فانا بتعلم دايما وعندى عادات ايجابية تقريبا وهى انى اقرى كتابين كل اسبوع كتاب فى التقنية او البرمجة الجديد فيها وكده وكتاب تانى لحبي فى القراءة مرة عن تطوير والنفس و nlp ومرة فى الفيزياء ومرة فى الكهرباء ومرة فى الرياضيات وكده, والانجليزي انا كل يوم بتعلم حاجه جديدة "لانى بقرا مقالات لاجانب + كتب انجلش عن البرمجة"
اللى عايز اقوله اذا كان ع الخبرة ممكن اجيبها بس ازاى شركة معينة هتثق فيا وانا ممعييش شهادة فى مجال خبرتى ومعايا فى مجالى تانى
لو كنت هتعبك معايا فانا اسف جدا, بس انا محتاج المساعده

~: Zac :~ · #6 17-01-2011, 12:17 PM

Cv
ملف بياناتك اللي هتقدمه للشركات ...

واتطمن الشركات كل اللي يهمها الخبرة ..
والشهادات دي مجرد تاكيد عالخبرة ... بس لو واحد دخل حاسبات وخد شهادة بس مش بيعرف يطبق علمي اوي وواحد مش ف حاسبات وممتاز ف التطبيق اكيد هايخدو التاني

يعني انت حاول توصل للشهادة ولو معرفتش متقلقش واحمد ربنا ع كل حال و خد شهادة تانية تنفعك وتفيدك بردو
بس اهم حاجة تتعب وتعمل اللي عليك عشان ربنا يوفقك للي فيه الخير ليك ان شاء الله
وشهادات اللي تاخدها من كورسات او امتحانات ف شركات تدريب مهمة بردو خصوصا لو كانت معتمدة ...

ومفيش تعب ولا حاجة اعتبرني اخوك الكبير لو ينفع

php man · #7 17-01-2011, 12:38 PM

شكرا ياباشا على المساعدة وانا تفتكر انى احول ادبي فى تالته عشان اكون علمى متأدب؟ اعتقد ان دا هيكون احلا من ناحية قبول الكليات او المعاهد لمجموعى ولا ايه؟