يا جماعة ينفع اخش علوم ب علمى رياضة ؟ و حبة اسئلة تانية بليز الرد

[Elmobd3]

يا جماعة ينفع اخش علوم ب علمى رياضة ؟

انا بتكلم علوم فيزيا كيميا و كده

مش رياضة !!!

و ايه مستقبلها

هل بتشتغل فى شركات الدواء هل ليها شغل فى البترول و كده

بليز واحد فاهم يخش يرسينى على الحوار

لحسن انا جايب السنة اللى فاتت 93 و شكلى هتفسح السنة ده و مش هلحق حاجة
بعد اللى شوفناه فى التفاضل و الفيزيا و الفراغية و الميكانيكا و اخيرا الاحصاء !!!!!!!

و بالنسة بمعاهد المساحة

ده ايه نظامها ؟ سمعت انها بتدرس فيها سنتين و تخش هندسة !

و بالنسبة لفنون تطبيقية هل مستقبلها حلو ؟

يعنى لما ادخلها قسم عمارة مثلا كويسه و لا ايه النظام

اصل واحد قالى تعبانه فى العمارة مش اد كده

و معلش الفنية العسكرية
هل بتحتاج نظر و عادى مش مهم ؟
اصل نظرى ضعيف

و انتوا ايه رائيكم ؟ تقترحوا عليه بايه

بصراحة انا محتار و مش عارف هل اعيد السنة و لا اخش تجارة و لا اخش ايه بالظبط
تخطيطاتى باظت خاالص بعد اللى حصل السنة ده

يلا قدر الله ما شاء فعل و الحمد لله على كل شىء

[LA STELLA]

بص انا ادك ع فكرة
ورياضة زيك وعارفة اللى بتعانيه :D
علوم فيزياء كيميء ،، اه ينفع
مستقبلها معرفش

اما فنون تطبيقية بقى
فدى حبيبتى بجد بجد
انا اصلا دى الكلية اللى نفسى ادخلها من وانا طالبة فى اعدادى
وخلى بالك فيه فرق بين فنون تطبيقية وفنو ن جميلة
فنون تطبيقية 14 قسم اروع من بعض
ومستقبلها المعروف انه جميل جدا ان شاء الله
وخلى بالك امتحان القدرات بتاع العمارة اللى انت امتحنته دا مالوش دعوة بفنون تطبيقية خااااااالص
روح الكلية بتاعت فنون تطبيقية بكرة ان شاء الله واعرف تروح امتة تسحب استمارة امتحان القدرات بتاعها

اتمنى اكون افدتك

[LA STELLA]

اه بالمناسبة شيل من دماغك فكرة تعيد السنة دى
الدنيا مش هتقف على كلية
وربنا وحده اعلم الخير ليك فين
وانسى انك فى مصر هنا تشتغل بالكلية كمان
انت هتشتغل بامكانياتك ومهاراتك
وركزع اللغات والكمبيوتر
وارضى باللى يقسمهولك ربنا
عشان ترتاح بجد
وبص للجانب المشرق من الحياة
:D:D
مش الثانوية اخر الدنيا ولا هى كل حاجة اصلا
حتى بعد اما تتخرج تقدر تدرس اللى بتحبه دراسة حرة كمان

شوف انت بامكانك ايه وتقدر تصلح وتعمل ايه
وربنا يوفقك

[Elmobd3]

المشاركة الأصلية كتبت بواسطة hkk-happy

بص انا ادك ع فكرة
ورياضة زيك وعارفة اللى بتعانيه :D
علوم فيزياء كيميء ،، اه ينفع
مستقبلها معرفش

اما فنون تطبيقية بقى
فدى حبيبتى بجد بجد
انا اصلا دى الكلية اللى نفسى ادخلها من وانا طالبة فى اعدادى
وخلى بالك فيه فرق بين فنون تطبيقية وفنو ن جميلة
فنون تطبيقية 14 قسم اروع من بعض
ومستقبلها المعروف انه جميل جدا ان شاء الله
وخلى بالك امتحان القدرات بتاع العمارة اللى انت امتحنته دا مالوش دعوة بفنون تطبيقية خااااااالص
روح الكلية بتاعت فنون تطبيقية بكرة ان شاء الله واعرف تروح امتة تسحب استمارة امتحان القدرات بتاعها

اتمنى اكون افدتك

اولا شرف لى انك تبقى قدى

ثانيا متعرفيش الاقسام فى فنون تطبيقية ايه ؟ اصلى بصراحة معرفش عنها حاجة !
و لما بروح احضر عندهم كورسات هل كويسه و هخش امتحن هقفل الامتحان و اخد لائق علطول

اصل بعيد عنك انا خطى مش اد كده

[LA STELLA]

بص انا اللى هيخلينى اخد الكورس ان شاء الله
انى عاوزاها بجنون بجد
فبحاول اعمل كل حاجة ممكن تضمنهالى ان شاء الله
وتوكل على الله
واللى فيه نصيبك وربنا كاتبهولك وفيه الخير ليك هو اللى هييجى لك فى الاخر
ممكن يكون خطك فى الكتابة مش اد كدة بس تكون خطوطك فى الرسم والتصميم كويسة
اما الاقسام
فادى ال14 قسم بتوعها
أقسام الكلية

1. - قسم الغزل النسيج والتريكو
2. - قسم طباعة المنسوجات والصباغه والتجهيز
3. - قسم الملابس الجاهزة
4. - قسم الإعلان
5. - قسم الزخرفة
6. - قسم النحت و التشكيل المعماري
7. - قسم الاثاثات والانشاءات المعدنية والحديدية
8. - قسم المنتجات المعدنية والحلى
9. - قسم التصميم الصناعي للأجهزة والمعدات
10. - قسم الزجاج
11. - قسم الخزف
12. - قسم التصميم الداخلي و الأثاث
13. - قسم الطباعة و النشر و التغليف
14. - قسم التصوير الفوتوغرافي و السينمائي و التلفزيوني

كنت بسمع زمان انهم بيشتغلوا من الكلية كمان بمرتبات كويسة جدا ،،

خد الاقتباس دا كمان جبته من الويكيبيديا

و تهتم الكلية بدراسة الجانب الذى يمكن تطبيقة من الفنون في الحياة العملية كل قسم في مجاله. تقبل الكلية الحاصلين على الثانوية العامة المصرية بقسم العلمي و لكن بشرط اجتياز اختبار القبول الذى تعده الكلية. وتسمى النقابة الخاصة بخريجي الكلية بنقابة مصممي الفنون التطبيقية ، ويشترك خريجى قسمي النسيج وطباعة المنسوجات فقط بنقابة المهندسين أيضا ، كما يمكن للخريجين أن يشتركو في نقابة التشكيليين أيضا .

عدد سنين الدراسة فيها 5 سنين
اول سنة اسمها اعدادى
زى هندسة يعنى



ربنا يسترها معانا فى التنسيق ان شاء الله

[3olomgy]

يا جماعة ينفع اخش علوم ب علمى رياضة ؟

انا بتكلم علوم فيزيا كيميا و كده

مش رياضة !!!

و ايه مستقبلها

هل بتشتغل فى شركات الدواء هل ليها شغل فى البترول و كده

ينفع تدخل علوم بس مش هينفع تدخل الاقسام اللى فيها بيولوجى...حيوان نبات حشرات ميكروبيولوجى كيمياء حيوية الخ
بالنسبة لسؤالك عن شركات الادوية..انا ليا اخو صاحبى الانتيم لسه متخرج من صيدلة السنة اللى فاتت..كنا قاعدين نتكلم وكده فقال ان الكيميائى بيفهم احسن بكتير من الصيدلى فى تركيب الادوية وعموما ده له شغله وده له شغله والفرص متساوية
بالنسبة للبترول فله تلات سكك :
1- كيميا جيولوجيا وده الاعم والاشمل وفعلا فيه ناس اتخرجت وجاتلنا الكلية بيحكوا على حياتهم اللى بقى لونها وردى:D بعد ما اتخرجوا من القسم ده ولعلمك القسم ده شغله احسن من شغل كلية هندسة البترول بتاعت السويس، العيب الوحيد ان العدد كبير ( السنة دى هياخدوا 150 طالب )
2- جيوفيزياء وديه سكة رخمة ومعقدة ولازم تكون بروفيشنال فى الرياضيات ودى برده شغلها كويس لان التخصص ده نادر فى مصر وعدد الخريجين قليل وشغلهم مالوش دعوة باى كلية تانية ولا باى تخصص تانى ( هياخدوا السنة دى 25 طالب بعد ما كانوا هياخدوا 50 ) وفى القسم ده انت بتستغل علم الرياضيات والفيزياء عشان تعمل شوية حسابات تستكشف بيها الارض وده ينقسم لشغل حقلى وشغل مكتبى ، الشغل الحقلى هو اللى بيعمل الحسابات دى فى مكان الاستكشاف وبعد كده يبعت النتايج للشغل المكتبى عشان يحللها ويوضح النتايج
3- جيولوجيا منفرد..ديه سكة العلماء بقى لان القسم ده اصعب قسم فى الكلية واستحدثوا فيه حاجات عالمية تحس انك فى مكان اوروبى فعلا ولو خدت دبلومة بعد البكالوريوس هيتاح ليك انك تشتغل فى التنقيب عن المعادن وتصنيع الرخام والحاجات دى..وعلى فكرة رئيس مركز اكتشاف الكواكب فى وكالة ناسا دكتور عصام محمد حجي كان عندنا فى الكلية وطفش مننا وراحلهم وهو كان معيد عندنا فى قسم الجيولوجيا
والتخصص الجيولوجى ده بيكون الاهم فى التنقيب عن البترول..لما مثلا بييجوا يحفروا عشان البترول لازم ننزل بالبريمة فى اعماق معينة ودى طبعا عملية مكلفة، دور الجيولوجى بقى انه يدرس الحفريات اللى بتطلعها البريمة ويحدد فاضلنا قد ايه حفر عشان نوصل للبترول او يقولنا مفيش بترول اصلا ( ده اعلى مرتب على فكرة:D )
اخيرا فيه قسم نشأ جديد فى الكلية بس بفلوس( انا بتكلم على علوم القاهرة ) القسم اسمه (( علوم البترول الجيولوجية)) هتدفع كل سنة 6 الاف جنيه بس هتتدرب فى شركة شلمبرجير ( دى شركة بترول عالمية ) فى الصيف واول ما هتتخرج هتسافر المانيا تشتغل هناك وطبعا فى الحالة دى الشغل مضمون اول ما تتخرج بس ست الاف جنيه فى السنة كتير شوية.
اتمنى اكون افدتك وعموما وتلخيصا لكلامى علوم محتاجة جهد ودماغ رايقة واخلاص للى انت بتتعلمه ومذاكرة من اول يوم وعدم اكتفاء بالبكالوريوس..ساعتها هتلاقى المقابل كبير جدا

[هانى خيري]

شوف يا حبيب قلبي ...
بصراحة أنا سعيد جدا بالردود اللي قبلي اللي إن شاء الله هاتفيدك جدا ...هما كلمومك عن الفنون التطبيقية وعلوم اللي هما أدرى بيها وأنا هاكلمك عن بقيت سؤالك...
1- معاهد المساحة : أولا المعاهد الفنية الصناعية سنتين بتقبل دبلومات الصنايع بمجموع معين والثانوية العامة بأي مجموع , وهى فعلا مؤهلة لكليات الهندسة بشرط حد أدنى جيد جدا(75%) ..وبيكون ليها تنسيق لدخول كليات الهندسة زي تنسيق الثانوية العامة والتنسيق بيكون أقل وبالنسبة للدراسة في المعهد نفسه الدراسة عادية جدا وعايزة بس مذاكرة ومجهود وبصفة عامة هى أسهل بكتير من الثانوية العامة ومافهاش أى تعقيدات
ده كلام أصحابي في الكلية ..كانت مجاميعهم في ال ث.ع تعبانة جدا وبصراحة مستواهم عادي ... دخلوا معهد سنتين وجابوا امتيازات ودخلوا هندسة (أرزاق) والمعاهد برضه فيها دروس وكده .
الخلاصة : المعهد سنتين تدخل منه هندسة بمجموع " مش لازم يعني مساحة...أي معهد"
وبالنسبة للفنية العسكرية ....بعد الفاصل

[هانى خيري]

ها قد عدنا ...
شوف يا حاج الفنية العسكرية بتقبل الحاصلين ع ال ث.ع بحد أدنى (90%) وهي فيها تخصصات زي الهندسة ( ميكانيكا ..كهربا.....إلخ)
ومن رأيي إن لما الواحد يبقى ظابط مهندس دي حاجة جميلة (بصراحة لو كان قدامي فرصة ماكنتش أتردد) بس مش عارف هاتحتاج واسطة ولا لأ؟؟؟؟؟ دي المشكلة إنما النظر الضعيف مش مشكلة .
أهم بقى م الكلام ده في كام حاجة كده عايز أقولك عليها

[هانى خيري]

الأهم من كل ده إنك ماتخدش كلمة من واحد بس وتقفل دماغك عليها ... يعني اسأل أكتر من واحد ودور على أكتر من مصدر لمعلوماتك.
(يعني مثلا إيه المانع إنك تروح كلية الفنون وتتكلم مع دكتور أو معيد هناك ... أكيد هاتلاقي .... وهكذا ده مثال بس ) ,
بس برضه إوعى تسيب نفسك فريسة للوسوسة والتردد والقلق ع المستقبل واحسم أمورك في الوقت المناسب
وبعدين هانخاف من إيه """ علمت أن رزقي لن يأخذه غيري فاطمئن قلبي"""
يا رب تكون استفدت مني أي حاجة ولو عايز نكون على اتصال أو عايز تسأل عن حاجة ...ده إيميلي :
khairy1988@gmail.com
معلش نسيت أعرفك بنفسي (ده لو عايز تعرفني أصلا)
أنا محمد خيري طالب بهندسة القاهرة 20سنة

[هانى خيري]

شوف يا حبيب قلبي ...
بصراحة أنا سعيد جدا بالردود اللي قبلي اللي إن شاء الله هاتفيدك جدا ...هما كلمومك عن الفنون التطبيقية وعلوم اللي هما أدرى بيها وأنا هاكلمك عن بقيت سؤالك...
1- معاهد المساحة : أولا المعاهد الفنية الصناعية سنتين بتقبل دبلومات الصنايع بمجموع معين والثانوية العامة بأي مجموع , وهى فعلا مؤهلة لكليات الهندسة بشرط حد أدنى جيد جدا(75%) ..وبيكون ليها تنسيق لدخول كليات الهندسة زي تنسيق الثانوية العامة والتنسيق بيكون أقل وبالنسبة للدراسة في المعهد نفسه الدراسة عادية جدا وعايزة بس مذاكرة ومجهود وبصفة عامة هى أسهل بكتير من الثانوية العامة ومافهاش أى تعقيدات
ده كلام أصحابي في الكلية ..كانت مجاميعهم في ال ث.ع تعبانة جدا وبصراحة مستواهم عادي ... دخلوا معهد سنتين وجابوا امتيازات ودخلوا هندسة (أرزاق) والمعاهد برضه فيها دروس وكده .
الخلاصة : المعهد سنتين تدخل منه هندسة بمجموع " مش لازم يعني مساحة...أي معهد"
وبالنسبة للفنية العسكرية ....بعد الفاصل

[3olomgy]

حبيت اضيف معلومة كمان بالنسبة لبكالوريوس الكيمياء ..؛ انت بعد البكالوريوس لو خدت دبلوم تحاليل بتنضم لنقابة الاطباء وبيكون معاك تصريح انك تفتح معمل تحاليل

[Elmobd3]

شكرا ليكم جدا يا شباب

و بجد و الله بارك الله فيكم

و ربنا يوفقنا جميعا

[3olomgy]

شكرا ليكم جدا يا شباب

و بجد و الله بارك الله فيكم

و ربنا يوفقنا جميعا

لا شكر على واجب ولو عايز تيجى الكلية تعالى وهدخلك واقعدك مع دكتور جيوفيزياء ومعيد جيولوجيا يدوك معلومات اكتر ..انا موجود الاسبوع كله ما عدا الجمعة والخميس

[Elmobd3]

شكرا لك يا مان
باذن الله بعد ما النتيجة تطلع و نشوف التنسيق
بس عموما معلوماتك فدتنى جدا

ربنا يكرمك بجد و الله

[eng*moon light]

انا كمان علمى رياضة
و كنت عايزة اعرف ايه الفرق بين فنون عمارة و الفنون التطبيقية؟
وهل الفنون التطبيقية قسم فى الفنون الجميلة؟و اختباره هو العمارة اللى امتحناها فى المدرسة؟
و هل مستقبل الفنون عمارة حلو و لا؟؟؟؟

ارجو الرد بلييييييييييز