اللي داخل اولى صيدلة

[Mohamed_Hamza]

المواد اللي عندك في اولى:
Botany
math
organic chemistry 1
inorganic chemistry
pharmacognosy
ana lytical chemistry
دي المواد الاساسية الثابتة ضيف عليها بعض المواد الفرعية زي الانجلش وتاريخ الصيدلة ومدخل الصيدلة دي بتختلف من جامعة للتانية
(Botany): دا علم النبات بيعرفك كل حاجة عن النباتات اللي ليها استخدام طبي : تسميتها، بتتزرع امتى وشروط تخزينها والحاجات دي.. فيه جزء في الاخر صغير اسمه (leaves) بيشرح ورق النبات وانواعه..
=المادة دي ليها نظري وعملي وشفوي
النظري بتاعها سهل لو ركزت مع الدكتور في المحاضرة، صعب لو مركزتش وذاكرته مع نفسك.
العملي بتيجي عينة قدامك وانت تتعرف عليها تحت الميكروسكوب..

(pharmacognosy) : دا ابن العم البوتاني علم نبات بردو، نفس الدكاترة هيشرحوه ونفس النظام في كل حاجة بس بيتاخد في ترم غير ترم البوتاني، يعني لو خدتوا البوتاني الترم الاول دا هتاخدوه الترم التاني. او العكس..

(math) : رياضة يعني دي هتاخدوا فيها رياضة تانية اعدادي من تاني: خط الاعداد والدالة الخطية والتربيعية والمشتقات واللوغاريتم والكلام دا بس الفرق انه بالانجليزي.. يعني الدالة هتبقى function و س هتبقى X.. بس كدا

(organic chemistry 1) : دي بقى الكيميا العضوية فيها هتدرسوا الالكانات والالكينات والكحولات والاسترات والالدهيدات والكيتونات وحاجات شبه دي.. هتدرسوا تسميتها وخصائصها وتفاعلات كل مجموعة منهم.. غير شوية زيادات كدا زي الisomers اللي كان اسمها المتشابهات في تالتة ثانوي..
العملي بتاعها انك هتتعرف على مركب عضوي بكام اختبار للكشف..
فيها نظري وعملي وشفوي

(Inorganic chemistry) قريبة من (ana lytical chemistry ) عاملين زي البوتاني والكوجنو كد..ا نفس الدكاترة هيشرحوها ودي فترم ودي في ترم تاني، الكيميا اللي مش عضوية دي هتدرسوا فيها التفاعلات والعوامل اللي بتأثر عليها والكشف عن العناصر وانواع المركبات والالكتروليات ولوشاتيليه والph والمعايرة وحاصل الاذابة والكلام المعروف دا..
العملي بتاع الاناليتكل غالبا انك بتعمل معايرة (rotation) عشان تعرف تركيز مادة.. عبيط جدا..
والعملي بتاع الان اورجانك بتتعرف ع المركب بكام اختبار كدا للكشف عنه وسهل جدا بردو..
المادتين فيهم نظري وعملي وشفوي

(تاريخ الصيدلة) بتعرف فيها على اعشاب كان القدماء بيستخدموها في مداواة مرضاهم وازاي تطورت مهنة الصيدلة لحد ماوصلت لكدا وبيجيب في الاخر طريقة التحنيط عند قدماء المصريين..

(مدخل صيدلة او pharmacy orientation) دي المفروض انها بتحببك في الكلية يعني..

اللي فات دا مش مهم اوي كدا كدا هيتقالك في اول يوم..
ركز في اللي جاي دا عشان مهم ومش هكرره..

-احضر كل المحاضرات والسكاشن ماتفوتش اي حاجة عشان ماتشلش المادة.. المواد دي صعب عليك تذاكرها لوحدك..
-اشتغل انت بنفسك يعني لما يكون عليك لاب بوتاني مثلا ماتخليش زميلك يبصلك في الميكروسكوب عشان يقولك اسم العينة اللي معاك.. لا ركز انت مع الدكتور واشتغل بنفسك ولو معرفتش حاجة تسأل الدكتور.. اعتمد على نفسك عشان في امتحان العملي مش هتلاقي حد يبصلك في عينتك وخد بالك العملي دا اكتر حاجة تقدر تلم منها درجات وسهل جدا لو اعتمدت على نفسك فيه يعني مفروض تضمن درجته..
-ركز في المحاضرة واهتم عشان مذاكرة المادة وحفطها يبقى سهل بالنسبالك، حتى لو الدكتور شرحه مش اوي بس اكيد هتفهم حاجة اتنين ع الاقل ولما تركز في المحاضرة وتروح تذاكرها هتكون سهلة عليك وهتفتكر كلام الدكتور، ثانيا الدكتور ساعات بيجيب حاجات في الامتحان محدش بيحلها غير اللي كان مركز معاه..
وقبل الميد او الفاينال بيلغي اجزاء بيقول ركزوا على اجزاء تانية.. م الاخر يعني لازم تحضر.
-لو هتسجل المحاضرة بالموبايل يبقى كويس.
-استعين بالنت بردو يعني اي حاجة عندك في الكيميا مثلا واقفة قدامك لو دخلت ع اليوتيوب هتلاقي قناة اسمها Khan academy شرحاها انا استفدت منها جدا.. وهتلاقي قنوات ومواقع تانية مفيدة بس دي اكتر واحدة.
-اي درجات bonus خليك حريص عليها.. يعني لو الدكتور طلب اسيمنت اعمله لو بيسأل في المحاضرة جاوب.. تعالى محضر اللي الدكتور هيقوله مثلا عشان متبقاش زي كيس الجوافة وتعرف تجاوب.. كدا يعني.. الحاجات دي بتسندك والله لو عاوز تجيب امتياز..
-لو انت ضعيف في الانجليزي ربنا يعينك.. احسنلك احفظ الحاجة زي ماهي مش لازم تعرف ترجمة كل حاجة بالعربي عشان كدا هتتعقد.. اعتبر ان الكلمة الانجليزي دي ملهاش ترجمة ربنا خلقها كدا..
-في المحاضرة اكتب ورا الدكتور كل كلمة بيقولها او بيكتبها ع البورد (وانت مركز بردو مش آلة بتكتب وراه وخلاص) لو ملحقتش او لو حسيت ان الكتابة ورا الدكتور بتعطل فهمك لكلامه خلاص سيبك من الكتابة وركز معاه..
-ذاكر اول بأول ومتأجلش وتزنق نفسك ليلة الفاينال.. كدا بتعرض نفسك للخطر وللشيل..
-سهل تجيب امتياز فيها على فكرة.. في كذا واحدة معانا في الدفعة جايبين GPA 4/4 .. الولاد اشطر بس للاسف مبيذاكروش..

[Yasmeena.R]

جزاك الله خيرا ع المعلومات دى الواحد تايه وحضرتك جبت المختصر المفيد

اي درجات bonus خليك حريص عليها.. يعني لو الدكتور طلب اسيمنت اعمله

مش فاهمة دى صراحة ؟؟ وحضرتك صيدلة ايه ؟؟

[Mohamed_Hamza]

المشاركة الأصلية كتبت بواسطة yasmeena.r

جزاك الله خيرا ع المعلومات دى الواحد تايه وحضرتك جبت المختصر المفيد



مش فاهمة دى صراحة ؟؟ وحضرتك صيدلة ايه ؟؟

درجات بونص يعني درجات زيادة بيديها الدكتور للي شغال وبيتفاعل معاه اللي بيجاوب في المحاضرة اللي بيعمل اسيمنت كدا.. الاسيمنت دا ممكن يكون بحث ممكن يكون اي حاجة الدكتور يطلبها.. فيه درجات بونص على البرزنتيشن بردو دا الللي هو تبحثي عن حاجة وتتكلمي عنها قدام زمايلك..
البونص دا فايدته انه بيزودك درجات يعني لو جبتي في امتحان الميدتيرم 27 من 30 ومعاكي 3 درجات بونص كدا كأنك قفلتي الميدتيرم..
الروسية