جامعة القاهرة بعدستي الخاصة ..

[vampire1188]

~*¤ô§ô¤*~السلام عليكم ورحمة الله وبركاته~*¤ô§ô¤*~

مش عارف .. هل ممكن حد فكر في الموضوع دا قبل كدا ؟

هاتقولولي موضوع ايه ؟ ..

هاقولكوا موضوع ان كل واحد يصور المنطقة اللي بيدرس فيها ..

وييجي يعرضهالنا ونتفرج ونشوف .. ونقول آرائنا ..

على العموم .. انا النهارده جايبلكوا صور من داخل جامعة القاهرة

مصورها بنفسي .. وحبيت اعرضها عليكوا .. وافرجكوا على جامعتي ..

نبدأ العرض بقي ونشوف >>>

>> دي صورة اكبر مدرج في الشرق الاوسط كله .. مدرج د/ محمد حازم العيوطي التذكاري



>> دي صورة اكبر واحدث مكتبة في جامعة حكومية في مصر (المكتبة المركزية)
تم افتتاحها على ايد السيدة سوزان مبارك السنة اللي فاتت
ملحوظة: المكتبة دي بتنور بالليل بالليزر ..



>> ودي بقي صورة كلية التجارة قسم الانجليش
يسميها البعض اختصارا ( FCES ) .. مبني مكيف داخليا ..



>> صورة مبني كلية الاداب الرئيسي ..



>> صورة ملحق كلية الاداب .. واللي ورا دا مركز الترجمة ..
بيحصل حاجات جامدة اوي هناك !!



>> صورة القبة من وضع الباب الرئيسي



>> صورة مدرج مشرفة التاريخي بتاع كلية علوم ..
احلى قعدة تقعدها هناك ..
لو مشيت في الشارع اللي انا مصور منه دا طوالي قدام
المتجه يمينا يسلك طريق Love Street
والمتجه يسارا يسلك طريق دقة والجلاب ومن بعده معمل علوم !!



>> صورة مدرج هـ .. تم افتتاحه ايام الرئيس السادات
مصمم على هيئة دورين .. بس طبعا مافيش غير دور واحد بيتفتح والتاني للمناسبات ..



>> مشهد للقبة التذكارية للجامعة من عند كلية علوم



>> صورة لمبني كلية الحقوق الرئيسي ..
اسف لو كانت الكواليتي بتاعتها مش مظبوطة .. عشان الشمس مش اكتر !!



>> صورة للقبة .. من جنب المدخل الرئاسي ..



>> صورة لكلية الهندسة من قدام البوابة الرئيسية للجامعة ..



نييجي بقي لصور القبة من الداخل ..

كل اللي عايز اقوله .. ان دخول القبة دا كطالب عادي شبه استحالة ..

لإن مكتب رئيس الجامعة جواه .. بالتالي اول ماهاتيجي تعتبه هاتتلاقي 5000 امن طالعلك !!

من حسن حظي ان رمضان اللي فات .. كان فيه حفلة لليلة المحمدية معمولة داخل القبة

ولحسن حظي ان من اول سنة او من اول اسبوعين ليا في الجامعة .. اخش القبة واشوفها ..

وطبعا حرام اخشها .. وماصورهاش .. وجايبلكم صورها اهو ..

>> دي صورة القبة من جوا .. طبعا هيا مستويات للاضاءة كمان
دا يعتبر المستوى التالت من الاضاءة ..



>> دي برده صورة للقبة من جوا .. بس مستوى اضاءة 1



>> دي بقي صورة اللوبي بتاع القبة .. الطريق المؤدي للقبة من جوا ..
بس طبعا المشكلة ان كان فيه ناس كتيره داخلة وخارجه .. فماعرفتش اصور صح ..



>> ودي كمان .. صورة المسرح الرئيسي بتاع الجامعة .. اللي هوا تحت القبة ..



ملحوطة بس كدا صغيرة احب اقولها ..

صور القبة من جوا دي .. بيتهيألي انها نادر انكوا تلاقوها في منتدي تاني

ممكن تكون دي اول مرة تشوفوها .. بس بجد رأيي الشخصي

انها من اروع مايمكن انها تتشاف ..

فعلا صدق اللي كان مسميها جامعة الملك فؤاد الأول !!

[u4me]

تصدق الصور دى جامدة

بس انا مدخلتش القبه من جوا ولا مرة

انا اول مرة اشوفها كدا

طب مش كنت تصور تجارة بالمرة عند (ج,د)

وانا عندى شوية صور للجامعه ع الموبايل

اصلى طول ما انا ماشية بصور فيها

منهم نص اللى انت حاططهم دول

[vampire1188]

طب ماتحطيهم .. اهو الناس تستفيد برده ..

لا هوا بالنسبة للقبة .. كان ليا الحظ والشرف اني اخشها بعد اول اسبوعين من الدراسة ..

وماعتقدش اني هاخشها تاني اصلا !!

بس جامدة اوي من جوا .. الحقيقة احلي من الصور بكتييييييييير

وعلى فكرة .. العيوطي انا مصوره من عند الشبابيك ..

[u4me]

بكسل انزل صور ع المنتدى

معلش بقى

استحملنى شوية

بس صورك واضحة يا باشا

[vampire1188]

هيا من ناحية واضحة اه .. انا بنقي الصور اللي فيها زاوية الشمس واضحة ومنورة ..

بحيث انها ماتحتجلهاش اضاءة اوي كدا

وفي نفس الوقت بحاول بقدر الامكان ماعملش زووم على المنطقة اللي بصورها

عشان الريزليوشن يطلع عدل وطبيعي ومظبوط ..

حتى انتي تلاحظي الصورة بتاعة مبني حقوق الرئيسي تعبانه .. عشان الزووم

اما باقي الصور فطبيعية جداااا ..

صورة زي بتاعة المكتبة المركزية دي طلع عيني عشان اصورها ..

بس مسيري هاييجي في يوم وانزل صور المكتبة المركزية من جواها ..

بس عموما .. هيا من احلي مايمكن صراحة .. 5 ادوار ..

والرخام فيها اللي من النوع اللي تشوف فيه وشك !!

[dr.zomba]

صور جميله جدا

تسلم ايدك

علي فكره انا جامعة القاهره كلية تجاره بردو

بس لسه مستجد

[u4me]

انا مصورة الجامعه بليل

بس خرافه

خصوصا القبه والساعه والمكتبه

بينوروا بس تحفه

بس صورة المكتبه بايظة منى

مش عارفه اجيبها مظبوطة تقريبا عشان النور الاخضر بيتحرك

وانا عملالها زوووووم

بوظتها يعنى

بس القبه والساعه وخدالهم صورة مع بعضهم

ومتسألنيش ازاى

بس جبتهم وخلاص

المنظر تحفه

هى من بعيد بس شغاله يعنى

وانا عمرى ما دخلت المكتبة من جوا ولا مرة

[vampire1188]

القبة والساعة في وقت واحد ؟!!

يا سبحان الله !! .. ايه يعني شيلتي الساعة بايديك ونقلتيها جنب القبة وصورتيهم معا بعض ؟!

وصورتيها ازاي اصلا ومنين ؟! .. طلعتي على سطوح كلية العلوم مثلا وصورتيهم ؟!

دا حتى سطوح كلية العلوم مش هايجيب زاوية التصوير !!

ماعلينا ..

هوا بالنسبة للمكتبة المركزية هيا جامدة جدا صراحة من جوا ..

والقراية فيها متعة .. ونضيفة جداااااااااااا جدا جدا ..

ومنتهي النظام والهدوء والأدب .. تحسي بالادمية جوا بجد ..

بس عيبها الوحيد .. انك تتلجي جوا عشان التكييف المركزي فيها شديد شويتين ..

شويتين ؟ .. لا هوا 3 شويات ..

لا هوا 10 شويات صراحة ..

انا في مرة دخلتها وكنت بشر عرق .. هوا بالظبط ربع ساعة كنت برصرص من البرد !!

تمسكي ايدي تلاقيها ساقعة !

[u4me]

وحياة ربنا مصوراهم مع بعضهم ف صورة وحدة

وكل ما اورى لحد الصورة دى يقولى نفس الكلام ده

انتى شلتى حاجة جنب حاجة

عسان يطلعوا ف نفس الصورة

بس انا مصوراها من بعيد

ومن ناحية الحته اللى بتدخل منها دى اللى عاملة زى القناطر

عند علوم كدا

مش انت لما بتروح علوم بتطلع سلم صغير كدا

مكتوب عليه ممنوع الجلوس والا ستتعرض لسحب الكارنيه

دى انا مسمياها القناطر

المهم اول ما تطلع السلم ده وتنزل لعلوم وتبص للقبه

هتلاقى القبه جنب الساعه ف الصورة

تقريبا انا مصوراها من هناك

[vampire1188]

ماهو دا المكان الوحيد اللي تعرفي تصوري منه ..

بس يمكن ..

بس اه عارفه المكان دا ..

دا جديد على فكرة .. لسه معمول اجازة الصيف اللي فات ..

بس عموما الجامعة حلوة وشياكة يعني ..

بس فيه اللي احسن منها طبعا ..

بس طبعا انا مش عايز اعقد نفسي واسترجع ذكريات الماضي ..

خلينا في جامعة القاهرة .. حلو اوي كدااااااا ..

[u4me]

اى خدمة اهو

قلتلك مكان حلو تصور منه القبه والساعه ف صورة وحدة Exclusive

[vampire1188]

اكسكلوسف ؟ .. يااااااااه

حتى الصور بقي فيها اكسكلوسف ؟!

انتي لو تلاحظي انا حطيت على كل صورة من تحت اسمي ..

عشان حكاية اكسكلوسف دي.. حاكم انتي عارفه المنتديات ماشاء الله بتقلب من بعض !!

مش بعيد تلاقي الصور دي محطوطة في منتدي تاني عاااااااادي يعني ..

[u4me]

يا عم يعنى حد هيسرق الصور ويقول انا اللى منزلها

بس انا عمرى ما شفت حد عرف يصور القبة والساعه

لو جدع تصورهم انت ف صورة وحدة

وابقى نزلها انت ع النت

واكتب عليها اسمك

ولا تزعل

[vampire1188]

تحدي ؟ .. مااااااااااااشي .. بيني وبينك المنتدي ..

بس تخش الدراسة ووريكي ..

اول مانزل الجامعة هالقطها واجيبها واغيظك !!

[u4me]

تصدق يا فامباير

بصيت للصورة دلوقتى

لقيتها من زاوية تانية

مش من عند القناطر يعنى

بص هى القبة ع اليمين

والساعه ع الشمال

وزى ما يكون لازقين ف بعض كدا

بس مش فاكرة انا خدتها منين بظبط