ياريت الناس تغير فكرتها شوية عن كلية السياحة والفنادق

[Eslam_Tourism]

انا عملت الموضوع ده مخصوص عشان اغير فكرة الناس شوية عن كلية السياحة والفنادق .

معظم الناس بتفتكر اللى هيتخرج من الكلية هيبقى شيف او طباخ فى مطعم ويتساوى بخريخى الدبلومات الفنية .

لا ياجماعة الكلام ده ممكن يحصل مع قليل من خريجى قسم الدراسات الفندقية وكمان بيحصل فى الفنادق الصغيرة او الفنادق اللى فى شرم الشيخ او الغردقة

وكمان خريجى قسم الفنادق بيبقى ليهم اولوية للعمل فى الفنادق الكبرى وفى الخارج لان معاهم مؤهل عالى يعنى سهل جدا جدا يشتغلوا فى اى فندق سواء كبير او صغير

وكمان خريجى الدبلومات الفنية مبيشتغلوش فى الفنادق الا لو كان معاهم خبرة وبياخدوا مرتب اقل من خريج قسم الفنادق وعلى فكرة الكلام ده شوفته بعنية يعنى مثلا كان فى واحد خريج دبلوم تجارة كان عنده خبرة جامدة فى الفنادق اشتغل بـ650 جنية اما خريج قسم الفنادق اشتغل بـ1200 جنية وده كان فى فندق فى مصر .

وكمان معظم الناس فاكرة الكلية عبارة عن قسم فنادق وبس ومبيطلعش منها غير شيف او طباخ او اى وظيفة فندقية .

وطبعا الكلام ده الغلط لان الكلية فيها 3 اقسام وده اللى ميعرفوش معظم الناس والاقسام دى : - دراسات فندقية
-دراسات سياحية
-ارشاد سياحى

وانا موضح كل حاجة عن الاقسام دى فى موضوع مثبت فى القسم هنا اسمه " كل ما تحب ان تعرفه عن كلية السياحة والفنادق"

وفى ناس غريبة بقى اول ما الواحد يقوله انا فى سياحة وفنادق يقوم قايل فى حد يا بنى يدخل سياحة وفنادق فطبعا لازم اشرحله واحكيله كل حاجة عشان يفهم .

وفى ناس كمان لما اقولها انى لما اتخرج من الكلية ممكن اشتغل فى اى شركة طيران يتعجبوا ويقولوا يا بنى لازم واسطة وبعدين الحكاية مش سهلة كده .

حكاية الواسطة دى بتحصل فعلا بس خريج كلية السياحة لو كان الانجليزى بتاعه جامد جدا ومعاه لغة كمان ومتمكن من الكمبيوتر جامد وده طبعا لو حصل على شهادة ICDL مش هيسيبوه و هيمسكه فيه طبعا يعنى هما هيلاقوا واحد زى ده فين .

على فكرة فى حاجة سمعت منها اسمها كورسات اماديوس وجاليلو ودى لو حصلت عليها يبقى مش هتغلب فى شغل لانها بتأهلك لتشتغل موظف حجز تذاكر طيران سواء فى شركة سياحة او شركة طيران وعلى فكرة مفيش شغل من غير الكورسات دى دلوقتى .

ولو كنت عايز تشتغل فى مصر يبقى تاخد كورس اماديوس اما لو عايز تشتغل فى السعودية او الخليج يبقى تاخد جاليلو .

واتمنى فى الاخر انى اكون غيرت فكرة الناس عن كلية السياحة والفنادق .

لو فى حد عايز يضيف حاجة يتفضل يقولها .
____________________________________

مع تحياتى/ Esalm_Tourism

[reda_mafia50]

نفس لانا لبقوله والله كله فاكر انا اطلع طباخ

[max_p2008]

مشكوووور أخى

[RoOz:D]

شكرااااا على مجهودك الرائع

[Sherif Shoman]

عليا النعمه
انت بتقول كلام زى الفل

[ايفا محمد]

:abdoog8:اولا انا شايفك انك بتزعل من كلمه طباخ او شيف الكلمه ديت المفروض ماتزعلش منها لانك اصلا مش تطول انك توصل ليها لان اصلا الكليه بتعتك ديت وبتعتي برضو مابتعلمكش حاجه في اي حاجه انت بتطلع منها ابيض عايز تتعلم من جديد ودا كلام دكتور وقايلو لينا احنا وانا زيك سياحه وفنادق فابلاش تكدب وتخدع الناس وتعيشهم في وهم زي كلام الحكومه
ثانيا انت بتقول خريخ تجاره ومعاه خبره وتاني معاه شهاده بتاع الشهاده خد اكتر انت كده بقي كداب رسمي لان في شغلت السياحه بيقدمو الخبره عن الشهاده يعني ازاي واحد معاه خبره 10 او 5 سنين والتاني معاه شهاده ولسه هايتعلم من جديد وياخد خبره لما هايرحو يشتغلو بعقلك هايختارو مين ابو شهاده ومش عارف يشتغل وعايز يتعلم من جديد ولا الي معاه الخبره وجاهز يشتغل علي طول انت لو صاحب شركه هاتختار مين يامهوم كان زمان عادل امام بيقول بلد شهادات دلوقتي بقت بلد خبرات ومعاه الوسطه ديت حاجه ثابته فياريت بلاش توهم الناس بحاجات مش موجوده اصلا

[Eslam_Tourism]

المشاركة الأصلية كتبت بواسطة ايفا محمد

:abdoog8:اولا انا شايفك انك بتزعل من كلمه طباخ او شيف الكلمه ديت المفروض ماتزعلش منها لانك اصلا مش تطول انك توصل ليها لان اصلا الكليه بتعتك ديت وبتعتي برضو مابتعلمكش حاجه في اي حاجه انت بتطلع منها ابيض عايز تتعلم من جديد ودا كلام دكتور وقايلو لينا احنا وانا زيك سياحه وفنادق فابلاش تكدب وتخدع الناس وتعيشهم في وهم زي كلام الحكومه
ثانيا انت بتقول خريخ تجاره ومعاه خبره وتاني معاه شهاده بتاع الشهاده خد اكتر انت كده بقي كداب رسمي لان في شغلت السياحه بيقدمو الخبره عن الشهاده يعني ازاي واحد معاه خبره 10 او 5 سنين والتاني معاه شهاده ولسه هايتعلم من جديد وياخد خبره لما هايرحو يشتغلو بعقلك هايختارو مين ابو شهاده ومش عارف يشتغل وعايز يتعلم من جديد ولا الي معاه الخبره وجاهز يشتغل علي طول انت لو صاحب شركه هاتختار مين يامهوم كان زمان عادل امام بيقول بلد شهادات دلوقتي بقت بلد خبرات ومعاه الوسطه ديت حاجه ثابته فياريت بلاش توهم الناس بحاجات مش موجوده اصلا

انا اللى بقولك عليه خريج قسم فنادق ده كان معاه خبره بس كان بيتدرب وهو فى الكلية واتدرب سنة بعد ما اتخرج و شاف دبلومات هناك وهو بيتدرب وبعدين اكيد طبعا الخبرة مهمة جدا وممكن تاخدها من وانت فى الكلية .

وبعدين يا عمنا سياحة وفنادق احسن من غيرها مش احسن من تجارة اللى بتخرج 60 الف كل سنة واكتر وبعدين انا بنصح اساسا ان الناس متخشش فنادق لانه قسم هتساوى فيه خريج اى حاجة ومعاه خبرة بس هو ليه شغل بره مصر .

انا عشان كده دخلت قسم سياحة اهو ممكن اشتغل فى اى حاجة تبع السياحة موظف حجز طيران مثلا ودى اكتر وظيفة مشهورة واللى بتخليك مؤهل اكتر ليها حاجة اسمها كورسات اماديوس وجاليلو وياما شوفت ناس اشتغلوا الوظيفة دى وممكن تشتغل فى اى وظيفة فى شركة السياحة بس بتاخدلك خبرة الاول .

وشكرا على زوقك .

[owner_magdy]

السلام عليكم ورحمه الله
كلام جميل
وبجد فرحان اني دخلت المنتدى دا انا دخلته عن طريق الصدفه معرفش ان فيه سياحه وفنادق
وانا طالب طالع سنه تانيه ان شاء الله
واحب استفاد وفدكم في القسم دا

وكلامك صح وانا باخد كورسات في الصيف وبجانب الدراسه وربنا يسهل
والسلام عليكم

[MuHaMeD kHaLeD]

يا استاذ هو حد يطووول يبقه شيف


دول بياخدوا مرتباااات قاااااااااااااد كده

[Bent 3bdo]

مش عارفه والله
هى بتاخد مجموع عالى
بس كفايه ان شامها سياحه وفنادق

[nosa kamanosa]

هى كورسات اماديوس وجاليلو وicdlدول باخودهم منين وبكام؟

[riham_eg]

والله نفس الكلام اللى بيقولوه ليه اى حد يعرف انى قبلت فى سياحه وفنادق وبيقولولى راحت فين تجاره واداب مش هم احسن من اللى انت عملتيه فى نفسك ده

[sympathique]

وعلى راى اللى قال

اللى ميعرفش .........

[rodita]

ايوة صح انا كل الناس بتقولي ايه سياحة وفنادق اللي دخلتيها دي هتعملك ايه يعني

[Avriliano]

اهم حاجة هتبقى ايه بعد الكلية وصدقني لو بقيت حاجة كويسة بعد كدة هتغير نظرة الناس للكلية
بس دا عادي لأنها مش كلية شعبية اوي وبعدين لو متضايق اوي يا اسلام قوللهم الكلية دي واخدة من 88% ادبي و91% علمي (حلوان)