|
م الثانوية للكلية.. مرحلة جديدة يا بنات
مبروك علينا جميعا ... إن شاء الله كلنا ناجحين فى الثانوية العامة .
حد فيكم فكر يا بنات فى المرحلة الجديدة اللى إحنا داخلين عليها ؟ أكيد شوية منكم فكروا . إيه إحساسكم ؟ فرحانين ؟ ده أكيد .... خايفين ؟ ممكن .... من إيه ؟ يمكن بتفكروا الجامعة عاملة إزاى , نظامها إزاى , المناهج و المحاضرات , الأساتذة و تشددهم و الصورة اللى إترسمت فى خيالنا عنهم . الزمالة ..... حطوا تحت دى بقى مليون خط !! طبعا الصحاب اللى كانوا معايا فى المدرسة مش حالاقيهم فى الكلية , و ضرورى لازم حاعرف ناس جداد ... يا رب وقعنى فى زملاء كويسين ... زملاء محترمين ... أعرف بنات صحابى خايفين من النقطة دى قوى , و كنا بنتكلم فيها كتير . تعرفوا ... أنا مش خايفة , و أخاف ليه ؟ أنا أقدر أفرض على اللى قدامى إنه يحترمنى و ده بتصرفاتى و طريقة كلامى و اللى مش عاجبه أو مش عاجبها تعرفنى زى ما أنا كده يدوروا على زميلة غيرى . أكبر نعمة ربنا يديها لأى بنت أو ولد هى الأب و الأم المتعقلين ... اللى بيتفهموا ولادهم و يكونوا قريبين منهم ... و أنا ألف حمد و شكر لك يا رب إنك اديتنى النعمة دى . ماما هى صاحبتى الأولى ... كتير من صحابى كانوا يستغربوا لما أحكى لهم على حاجة ... البنات بتعتبرها شخصية جدا و أقول لهم ماما قالت لى كذا أو عملت كذا ... يقولوا لى إنت هبلة , إنت ما لكيش شخصية مستقلة ... إنت ما تعرفيش تعملى لنفسك أسرار خاصة ... إنت نغة ....إنت ... إنت . المهم شوية من البنات اصحابى دول وقعوا نفسهم فى مشاكل مجعلصة و مش حاطول عليكم فى الآخر خالص خالص أهاليهم هم اللى حلوا لهم المشاكل . طب و كان ليه من الأول . البنت هى خط الدفاع الأول عن نفسها ... أيوة حتاخد وقت فى الأول لحد ما الكل يعرف شخصيتها ... لكن فى الآخر هى تقدر تبعد عن نفسها كل الحاجات اللى مش تمام . يا ريت تدونى رأيكم ... و يا ريت البنات اللى سبقونا للجامعة يدونا خبرتهم ... |
انا خايفه جدا من الموضوع ده لاني معرفش اي حد خااالص و انا الوحيده اللي في اصحابي اللي كانت علمي علوم
يعني ربنا يستر ان شاء الله ربنا يوقعنا في اصحاب كويسين .. انا بحاول اخد خبرات من اخويا الكبير و من والدتي و ان شاء الله كله خير |
انا فرحانة ومش فرحانة
فرحانه اني هندخل مرحلةجديدة مش فرحانة اني هسيب اصحابي اللي بقالي 6 سنين اعرافهم اعرف اهلهم كل حاجة عنهم بس انتي بنوته عسولة اووووي كويس اوووي انك بتحكي لمامتك دي حاجة كويسة ربنا يخلينا كلنا اهلنا وزي ما قلت القوي بيفرض شخصيتك ربنا معانا |
انا مرعوبه بجد
بس انام دلوقتى وادخل اقولكوا مرعوبه ليه وربنا يستر |
ما خاب من استشار
اقتباس:
بالتوفيق إن شاء الله :) :) :) |
اقتباس:
و ليه مش فرحانة ... دخول الجامعة ده نتيجة شقا كام سنة من عمرنا .. افرحى طبعا ... و خليها على الله .. و ربنا هو الحافظ و إن كان على أصحابك القدام ما تسيبيهمش أبدا لإن هما دول الأصحاب الحقيقيين اللى مش حتعوضيهم , و خاصة زى ما بتقولى تعرفى أهلهم و كل شئ عنهم |
اقتباس:
ليه مرعوبة ؟ كفى الله الشر ؟ كل شئ و له حل إن شاء الله |
انا اكيد خايفة موت من المرحلة الجديدة بس زي ما قلتي انك هتفرضي احترامك علي اي حد حتي لو هو مش محترم بس طبعا في الاول هتحسي بوحدة وقلق وان شاء الله نتعرف علي صحاب محترمين وكويسين
وندخل الي بنحلم بيه ومرسيه ليكي يا قمر عالموضوع الحلو ده |
أنا خايفه بجد مش عارفه هتصاحب ازاى وهمشى مع مين
مش عارفه حاسه ان الموضوع هيبقى صعب خصوصا ان انا مش اجتماعيه اوى انا حاسه انى هدخل الجامعه هتوه اصلا مش هبقى عارفه اروح فين ربنا يستر بس يا سلام بقى لو حد م اصحابى يبقى معايا ف نفس الكليه تبقى حاجه زى الجلاش |
مش حاسة باى قلق غير انى ادخل كلية وافشل فيها احساس مالوش حل :d غير كدة موضوع الاصحاب وبتاع ماعتقدش فيه مشاكل مانا لما دخلت اولى ثانوى ماكنتش اعرف غير واحدة بس صاحبتى ف اعدادى وطلعت من ثانوى عارفة اكتر من نص المدرسة :d ده غير انها مش فارقة اوى معايا .. مابقيتش عايزة اصحاب استكفيت .. عايزة بس ادخل كلية ابقى كويسة فيها :bosyht9: |
طبعا الكلية حاجه جديده وهتقابلنا حاجات جديده
وفعلا خايفه من حكاية الاصحاب دى ومضايقانى جامد ...... بس احتمال كبير يكون حد من اصحاب الثانوى معايا ويا عالم ممكن نكون احنا *بنات المنتدى * نتقابل صح؟ وعايزه اتعرف عليكوا اكتر ويا ريت نبقى اصحاب على طول يا بنات لانى لسه بادئه اشارك جديد يعنى ممكن؟ |
اقتباس:
|
الى نغم _18
قريبتى قالت لى ( على فكرة هى خجولة و مش بتعرف تعمل صداقات بسهولة ) أول ما دخلت الكلية كانت حاسة بإنها وحيدة و تايهة ... و مع الوقت اتعودت على المكان , و شوية شوية بدأت ترتاح لبنت معينة شافت إنها خجولة زيها , و بدأوا يقربوا من بعض و دلوقت هما أصحاب قوى ... و العملية مشيت عادى بعد كده , و اعتقد فهمت من كلامها إنهم بقوا جروب مش بس إتنين . الخلاصة ... ما تقلقيش |
اقتباس:
إن شاء ربنا يوفقك للكلية اللى فيها الخير لك ... و يوفقك و تنجحى و تتفوقى كمان و لما تبقى معيدة إن شاء الله إبقى إفتكرينى |
اقتباس:
|
| جميع الأوقات بتوقيت GMT +2. الساعة الآن 07:34 AM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.