للنقاش الهادف.. مطلوبات ونفقات الزواج
 

هو المفروض ان الناس لاتكتر اوى ولاتتساهل اوى يعنى المثال اللى حضرتك قولته ده بيعكس ثقافة غريبة اوى عندنا فى مصر ايه الفايدة من ان القايمة تبقى عالية وعلى فكرة الموقف ده بيتكرر كتير فى مجتمعنا اما امر الشبكة فاعتقد فى المدن مش بيدقوا فى الامور دى لكن عندنا فى القرية اللى بيروحوا يحضروا خطوبة قبل مايقولوا مبروك بيقولوا جابت شبكة بكام فالموضوع بيبقى منظرة مش اكتر اما عن المطلوب فده برده على حسب العروسة واهلها يعنى فى ناس بتفرد فى الطلبات شوية ويقولوا بيت مايقلش عن 5 حجرات وشبكة ب80الف ومهر 90000 اما المؤخر فبيبقى اعلى حاجة كنوع من التامين يعنى يعنى بتاع100000ده بالنسبة للى بيتوسعوا اما المعدل العادى او ابسط حاجة واللى شايفاه منتشربيت 3حجرات وشبكة 40000ومهر 30000ومؤخر زى المهر برده30000وده بيزيد باستمرار يعنى من3سنين بس كان العادى شبكة 20000ومهر10000 بس الدهب بيغلى فطبيعى لازم الشبكة تعلى ولما بتعلى بتعلى معاها الحاجات التانية

ايوووون عندك حق
المشكله كلها بتكمن عندنا ف الصعيد
ف وجه بحري الأهالي متفهمه إلى حد ما
طيب اولاً انتي شايفه 150 جرام دول كتار ولا قليلين؟؟

ماهو انتي كدا تقريباً متفقه مع اهل العروسه
يعني انتي شايفه الشبكه 40 ألف يعني اقل بشكل بسيط عن الشبكه ال أهل العروسه طلبوها
طيب وبالنسبه للقايمه؟؟!!

هو الدهب مالوش اهمية لكن من حق اهل البنت انهم يضمنوا ليها حياة كريمة بانهم يطلبوا شقة كويسة وحد كمان يكون مرتبة كويس ولازم من وجهة نظرى يكون المؤخر عالى هو الدهب بس اللى شايفة ان الناس لازم تقلل فيه شوية

بصراحة انا مش فاهمة القايمة دى بتكون عبارة عن ايه لكن انا بقول اللى بسمعه اقل شبكة حاليا بتكون40000ومتهيالى كمان بتكون حاجات بسيطة مش كتير وياريتهم اصلا يخلوا الشبكة دى زى زمان كده 3000 ولاحاجة بس يمكن عشان عندنا قرية والناس بتفكر الدهب الكتير حاجة حلوة بيرفعوا فيه على اد مايقدروا ده فى ناس كمان بتجيب 80000 وحاجات كده بس اهل العروسة بيشاركوا بمبلغ ولو هى معاها دهب بتشارك بيه برده يعنى مش بيكون كله على العريس

لا بس هو مش معنى إنّهم يضمنولها حياه كريمه انهم يعجزوه ف الطلبات
انتي شايفه الحاله الماديه ال فيها اغلب الشباب
والبطاله
وال شغال بيقبض بالكتير 1000 جنيه ولو حتى 1500 او 2000 مش هيخلوه يقدر ينفذ الطلبات دي
فأخرتها كله بينصب عليكم انتم في العنوسه
والأهل مش حاسين بكدا انهم بالشكل دا بيضروا بنتهم وممكن تعنس ف الآخر من اخرة الطلبات السخيفه دي

متفهمين لكن برده فى ناس بتبص لبعضها يعنى من سنة كان فى شبكة عبارة عن قران بس مافيش دهب الاهل موافقين عادى الناس قعدوا يقولوا ايه البخل ده مش قادرين يجيبوا شوية دهب وكله يتكلم بقى وشغل النميمة ده بس فى الاخر على فكرة مابيبقاش الاختلاف كبير قليل اوى لما يحصل زى ماحضرتك قولت ان ام العروسة تقول كده العريس غالبا هو اللى بيحب يجيب بزيادة عشان المنظر

هو مش بيدفع لوحده احنا عندنا هنا اهله اللى بيبقوا مجهزين البيت والشبكة والحاجات دى كل قرايبنا عملوا كده وهو بيبقى عليه المرتب بس وعلى فكرة 2000 جنيه كويس وبعدين مش كل الناس بتتشدد اوى ومافيش عنوسة ولاحاجة احنا عندنا مابيوافقوش على طول حتى لو اتاخروا شوية بس يلاقوا الناس المناسبة اما الناس اللى مابتتشددش فدول بيوافقوا حتى لو بنتهم فى الكلية هم نظامهم كده

استنى يابنتى وانا احسبهم معاكى هو اقل حاجة بتكون 3غوايش الواحدةبتاع 14 جرام و3 خواتم الواحد حوالى 6 جرام وسلسلة 18جرام يعنى كله بتاع 80 جرام ماهم دول اللى بيبقوا ب40الف لا بصراحة 150 جرام دول افترا اوى ليه يعنى؟

انا غلطان انا ماقصدش بحري عندكم اقصد المكان ال بدرس فيه وعارف فيه إلى حد ما تقاليد الناس ال هو القاهره

ازاي 80 جرام ب 40 ألف يعني؟؟!!
ال انتي قولتيهم دول ماشي 80 جرام بس ب 24 ألف مش ب 40 ألف
دا حتى لو كان دهب عيار 24 ال هو اعلى حاجه
الجرام منه ب 312.5 وبالمصنعيه نقول 350 مثلا يعني ال 80 جرام هيبقوا ب 28 ألف بس بردو

اه صح فعلا فى القاهرة ماحدش بيدور على الحاجات الصغيرة دى لان الناس كل واحد فى حاله مش زى عندنا وكمان هناك لان الناس ماتعرفش بعض فبيكون صعب ان البنت يجيلها عريس فمش بيتشددوا زى عندنا غير ان هناك الاسعار غالية فلازم يراعوا الظروف كمان يعنى احنا هنا مابيبقاش فى افترا فى الاسعار زى هناك