|
الفاتحة عالامن والامان.......
كتاب العربى: (مصر بلد الامن والامان ) كتاب التاريخ: (مصر بلد الامن والامان) كتاب الدين: (مصر بلد الامن والامان) ................ صحيح هى مصر بلد الامن والامان فيييييييييييييييين؟؟؟؟؟؟؟؟؟؟؟؟؟؟؟؟ الواحد بقى ماشى يتلفت حوليه كفاية انك تدخل المترو تطلع منفض كفاية انك تركب اتوبيس تطلع من غير محفظتك كفاية جرايم ال****** الى بتحصل فى عز الضهر كفاية الجشع الى البلد بقت فيه كفاية الحكومة بتنهب فى الشعب وتدخل ايديها بكل بجاحة تاخد فلوس مش من حقها موقف من حياتى واحب اعرضه عليكوا واحد جارنا صح الصبح لقى عربيته مسروق منها الكاست طنش ؟؟؟ تانى يوم صحى لقى العربية عجلها مش موجود لا بقى انا لازم ابلغ راح الراجل القسم وبسلامة نية ياحضرة الظابط انا عربيتى اتسرق منها العجل والكاست الظابط:عاوزنى افتح محضر طويل عريض علشان الكاست والعجل اتسرقوا سيب الناس تسترزق :eek: هى الحرامية هتسترزق على قفانا احنا ............................... طب وبعدين هنفضل كل واحد ياخد من حق التانى لحد امتى هنفضل عايشين فى خوف لحد امتى الواحد بى يخاف يمشى فى الشارع من بعد المغرب لو فتح باب الشقة يتخطف اية الحل ياناس حد يقولى الحل فين امتى هنحس اننا بجد مش خايفين امتى هنحس اننا واحنا فى الشارع كأننا فى بيتنا امتى هنحس ان الناس الى فى الشوارع دية اباهتنا واخوتنا امتى هركب مواصلة وانا مش حاطة عينى فى وسط راسى هو خلاص كدة خربت ؟؟؟؟؟؟؟؟؟ |
هو خلاص كدة خربت ؟؟؟؟؟؟؟؟؟
للاسف لسان حالى يبكى لما يحدث فى بلدنا الان ولكن اسمحوا لى اقول ان اللصوص غير مسؤولين بمفردهم عما يحدث فغلاء المعيشه والبطاله كلها اسباب ادت الى ذلك ادعو الله ان يصلح حال مصر ويوفقنا لما يحبه ويرضاه |
هو خلاص كدة خربت ؟؟؟؟؟؟؟؟؟
ايوة هيا فعلا خربت وخربانه من زمان بس احنا اللى مش واخدين او بنحاول مش ناخد بالنا الواحد يا عينى يروح يتسرق منه حاجه يروح يبلغ يقوم الضابط يقوله ايه بذمتك ليك وش تبلغ على هيفه زى دى طيب لما يتسرق منك حاجه اكبر ابقى تعالى حتى الواحد نفسه تتفتح ناقص تتغير العباره الشعب فى خدمه الشرطه طبعا فضلا عن الحاله الاقتصاديه اللى بيمر بيها الشعب المصرى. طيب انا هاحكيلك عن موقف شفته........... كنت راجعه قبل كده من الامتحان شفت والله سيده عجوز تبحث عن اى لقمه فى القمامه شفتى وصلت لدرجه ايه غيرها وغيرها ومش عايزة الشعب يبقا فى حاله هياج وخوف بس هانقول الحكومه بردو بتعمل علشان مصلحه المواطن المصرى والاصح محدودى الدخل؟؟؟؟؟؟؟؟؟ بس اسكتى انتى هاتعرفى اكتر من الحكومه . وميرسى على الموضوع يا نسوم وبدايه قويه كعادتك. |
مشكلة بلدنا والله نسمة هى السلبية كل واحد بيقول يالا نفسى او بيقول وانا مالى هو انا اللى هغير الدنيا حتى المسؤلين زى الضابط كدة ماهو مسؤل عن الامن .... بس للاسف بيتصرف بسلبية كبيرة اوى حتى لو حد شاف اذى لحد مش بيحاول انة يمنعة بنت بتتعاكس ...وواحد معدى ..ولا بيفكر انة يحميها من اللى بيعاكسها واحد شايف عربية بتتسرق ... يمشى ويسكت ويقول وانا مالى ...امشى فى حالى احسن الللى يسرق يعمل فيا حاجة دة يا بنتى حتى اليومين دول لو ركبتى اى مواصلة وطلع واحد كبير او سيدة كبيرة ...الشباب بيفضلوا قاعدين ونادر لما تلاقى حد واقف بس دة مينعش ان فى امن وامان بس قليلين تعرفى حتى فى اعلانات عن السياحة خير لينا وبلدنا جايبن ان السياح بدوا ينفروا من مصر علشان مش حاسيين بامن فيها الامان بقى قليل اوى زمان كان فى امان اكتر دايما ماما تقولى زمنكم غير زمننا بس علشان ترجعى الامن والامان زى الاول لازم ان المشاكل الاقتصادية تتحل ..علشان الناس متسرقش كل واحد يراعى عملة ويتقنة ... زى الظابط كدة مثلا وقبل كل لازم ان الوعى الدينى يكون عندنا ...لاننا لما يكون عندنا وعى دينى ... هنعرف ان مش من سمات دينا السرقة ولا السلبية ولا اذاء حد :d طولت شكلى كدة صح؟؟ |
الحكومه نصها حراميه والنص التانى بيحمى حراميه :d
|
احنا للاسف مع مرور الزمن بننزل في المكانة شوية سرقة الشباشب من قدام الجوامع شوية سرقة حبل الغسيل واخيرا اللي بيحصل حاليا فين الشعب المصري المعروف عنه شعب طيب حكومتنا خلتنا ندبح بعض علشان نعيش ربنا يصلح حالنا ويهدينا ويغفرلنا ويتوب علينا
|
هنحس اننا عايشين لما الناس ترجع لربنا
لما يكون الناس في تعاملاتهم صدق هيتعدل حالنا لما يكون هناك حاكم عادل وليس جائرا هيتعدل حالنا لما نجتمع على محبة الله ونفترق على طاعته بدون رياء أو نفاق هيتعدل حالنا لما نحب الاخرة اكتر من الدنيا هينعدل حالنا لما نحب الخالق أكتر من المخلوق هيتعدل حالنا لما نحب التوبة أكتر من حبنا للمعصية هيتعدل حالنا لما يكون حبنا للقبور أكتر من حبنا للقصور لما يكون حبنا لعمل الخير أكتر من حبنا للمال ساعتها هيتعدل حالنا شكرا لذلك الطرح الهائل |
اقتباس:
مفيش صدق خالص حتى مع الحبايب اللى الواحد خلاص قال دول منى وعليا و و و و مفيش نخوة مفيش صدق مفيش امان مصر جميلة واعتقد العيب فى اللى فيها اه يابلدى يا لى بقيتى زى الغابة اللى واللى وعجبـــــــــــــــــــــى |
اقتباس:
مش هلاقى كلام اكتر من كده اقوله فىرعايه الله |
اقتباس:
بصى يا نسمة كل امتى اللى انتى حاطاها دى اجابتها حاجة واحدة لما تلاقينا احنا كشعب خايفين ع بعض و بنحافظ ع بعض مش نستنى الحكومة تحمينا من بعض و عموما يا ناسووووووووم اهلا بيكى فى بلد الامن و الامان مصر |
اقتباس:
على فكرة المستوى الأمنى ده فى أى بلد تانية معناه البلد خرابه ملهاش كبير , و ده اللى بيعمله مجموعة من الناس (اللى فى تزايد ) انهم ياخدوا حقهم فورى بدراعهم يعنى و المحاكم حبالها طوييلااااااااا ان كان ليها حبال , بس تعالى فى بلد زى ليبيا ما علينا الناس فيها طيبين بردو بس الكلام اللى انت قلته بيتحقق هناك بالحرف , و لكن فى مصر يمكن يكون فيه بعض المبالغة لإن الدنيا لسه بخير بسبب الناس المحترمة اللى زى حضرتك ( و اللى فى تناقص ) بس النظام لو مشى كده اضمنلك ان هيحصل أكتر مما توقعته...... و مش هيحصل لإن لازم قشة تقسم ظهر البعير..... |
يا بنتى مصر بلد الامن والامان دى جملة كانوا بيضحكوا علينا بيها واحنا صغيرين اقتباس:
دلوقتى بقى ال مضايقنى ان الحرامية بقوا بجيحين اوى بيسرقوا بالنهار مهى بقت سايبة انتى عارفة لو يقيموا الحد زى ما اسلامنا بيؤمر زى ما بنشوف فى السعودية كده يعنى نسبة االجارام تقل بس دلوقتى للاسف ال داخل السجن بيبقى داخل يتفسح فسحة وطالع |
اقتباس:
بجد بقى حالنا يصعب عالكلب الميت :( |
اقتباس:
هو انا اول مرة اجى هنا ماعلينا ندخل فى الموضوع والله نهال دية بتقول كلام زى الفل:d |
ازيك يا نسمة وكل سنة وانتى طيبة
تعرفى ان انا اكتر واحدة فى مصر اتسرقت محفظتها بمعدل حوالى 4 مرات فى السنة واكبر احصائية سجلتها كانوا مرتين فى الشهر انا فعلا بمشى فى الشارع وانا خايفة بقيت احس انى فى غربة او كأنى ماشية وسط اعدائى فين ايام زمان لما كانت الناس لبعضيها كنا مع بعض فى الحزن قبل الفرح كنا بنحافظ على بعض وبنصون بعض دلوقتى حاجة تانية الناس اتغيرت والخطر كتر من كل حتة ومبقاش فى حد نفسة يعمل حاجة للبلد دى بقينا نحقد على بعض والحكومة الجميلة الى انا بحسدها على برودها لان برغم كل هذة المهازل فى البلد تتظاهر اننا كنا بلد الامن والامان |
| جميع الأوقات بتوقيت GMT +2. الساعة الآن 12:17 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.