اقتباس:
المشاركة الأصلية كتبت بواسطة just want heaven
عموما كلامك منطقي فيما يتعلق بالتعليم في مصر انه فاشل
بس انا ضد فكرة انه يضحك على طلبة ثانوية عامة و تبرير فشل المنظومة بالعدد
أولا و معلش استحملوا غلاستي ... كل موارد التعليم عندنا رايحة للوافدين اللي بيدفعوا بالدولار لا بنشوف سكاشن عدلة و لا امكانيات نضيفة رغم انها متوفرة و العمداء بيردوا ان دي مجانية تعليم !!!
ثانيا احنا مش بنحضر غير نسبة سكاشن العملي المقررة و اغلبية تعليمنا تعتمد على الكورسات اللي بتفهم اكتر من الكلية 6000 مرة .. و اوعى حد يفكر اننا مجربناش نفهم من الكلية قبل ما نتجه الاتجاه ده
بس دي مش ثانوية عامة دي أهم دي كلية طب و حياة بني آدم و لأني عايز أفهم طز في المكان سواء سنتر أو كلية المهم أفهم
من الآخر كليات الطب فاضية طول السنة الا من البعض
ثالثا بقى .. لو اتحجج ان المشكلة مشكلة خريجيين كتير و توظيف رده ايه عن انه سايب العدد مفتوح و النسبة مرحرحة للكليات الخاصة ؟؟؟ هما مش دول برضه خريجيين ؟؟؟ و لا مش مهم يتوظفوا المهم يدفعوا ؟؟؟!!!!
و ال 5000 مستشفى الي بنتبرع ليهم عشان نهضة مصر مش محتاجين دكاترة و نص دكاترة مصر اصلا مهاجرة بره ؟؟!!!
الفشل في المنظومة مش بكتر العدد ... و اللي فاكر ان لو قللوا العدد التعليم هيتحسن يبقى غلطان
انا لو عندي 1000 مريض و بنيت مستشفى على اعلى مستوى و بأفضل علاج و امكانيات بسعة 500 مريض
يبقى انا بضحك على نفسي لما اقول حسنت الصحة
لأن في عندي 500 تانيين لم يتلقوا علاج اصلا
كوننا بلد عدده كبير يبقى لازم غصب عننا نستحمل العدد ده لأن ان كانوا طلبة الطب كتيييير فصدقوني العيانيين أكتر و المجال الصحي متبهدل
عذرا على الاطالة
|
جميل جدا ... بس موضوع ان الفشل في المنظومة مش بكتير العدد ... واني لو عندي 1000 مريض المفترض اني اوفر لهم مستشفى واطباء ده مش معناه اني ادخل اي عدد وخلاص الكليات الطبية
وكون اني اقول والله انا في كلية طب او اسنان او بيطري واقول والله واقعد اوصف الوضع في كليتي سواء بقى الطلبة بتحضر او مبتحضرش سواء بقى فيه معيدين او مفيش سواء الكل بياخد كورسات او مابيخدش
ده مش مبرر لاني اقول مهي مش هتفرق لو دخلت ناس او مدخلتش ناس
اما بتكون المنظومة فيها خلل و عيوب بل انهيار ... بشوف ايه هيا مكونات وعناصر المنظومة كلها وبعيد معالجتها او صياغتها بصورة حقيقة
مش بمسك عنصر واحد بس من المنظومة واقعد اعالج فيه او اغيره كليا وانسى باقي العناصر ...
يعني احنا ماسكين دلوقتي في عنصر الطلبة والعدد وهي ركن من اركان العملية التعليمية ولازم نزودهم ووخلاص مش مهم الباقي
نقول لا العناصر الباقية مهمة ( المكان - هيئة التدريس - المناهج الدراسية )
مش اقول لا مش مهم العناصر دي ماهي عندنا مش عارف عاملة ازاي وفي المكان الفلاني ازاي !!!
لو هيا عندك كده فهي غلط تماما ولازم الغلط ده يتصحح وبعد لما يتصحح الاخطاء دي كلها اقيم العناصر تاني بما فيه الطلبة واشوف بقى هل ممكن فعلا اقبل اعداد اكبر ولا اقل ولا نفس الاعداد
ومش بالويم كده وخلاص لا ده فيه حاجة اسمها سوق عمل واحتياجات سوق عمل واحتياجات دولية ومعايير ونسب وتوسعات وامتداد مستقبلي ووووو وحاجات كتير جدا بتحدد الاعداد ومدى زيادتها لما تكون المنظومة ناجحة وصحيحة وعلى كفاءة جيدة ...
وفي النهاية اشكر ليك فعلا تفاعلك مع الموضوع واهتمامك وياريت تحاول تغير اي حاجة يمكن تغييرها الطلبة النهارده بقى ليها دور اكبر من الاول وفيه مساحة حركة اكتر .... طالما انت طالب في كلية طب وربنا معاك ان شاء الله