احداث يوم الاثنين لاعدادى اسنان الاسكندرية

[mohamed ashrf]

بسم الله الرحمن الرحيم

انا اسمى محمد اشرف اعدادى اسنان الاسكندرية عايزين كل يوم باذن الله طلبة اعدادى اسنان الاسكندرية يشاركونا هنا وكل طالب يقدر يفيد زمايله يحط محاضرة او معلومة يفيد بها زمايله اللى محضروش او حتى اللى حضروا عشان الصراحة انا مش شايف منتدى اسنان هنا نايم خالص

هابدأ بيوم الاثنين اللى هوا النهاردة اللى هوا اول يوم ناخد فى محاضرات خدنا النهاردة محاضرة واحدة بس فى مدرج 2 وادهالنا دكتور اسمه د.احمد مختار طبعا دا هيدينا فرع سيتولوجى فى مادة حيوان الصراحة هوا دكتور ظريف جدا ومنظم وشرحه كله على داتا شو هوا صح اغلب الطلبة مفهموش حاجة بس دا عشان اول محاضره

وقال ان نظام امتحانات ودراسة حيوان غير نظام صيدلة عندنا ست فروع هندرسهم على مدار السنة مش هنمتحنهم الا فى نهاية العام كل فرع عليه عشر درجات يبقى كلهم ستين وعندك 20 عملى فى الترم الاول و20 فى الترم التانى يبقى التوتال 100 درجة

محاضراته هتكون يوم الاثنين من 12-2 ويوم الاربعاء هتدينا دكتور سيسيل من 12-1 وراثة وهوا من 1-2

طبعا انا مش هحط محاضرة النهاردة لانى للاسف ملحقتش اكتب كل حاجة بس هوا ادانا مقدمة كدا وشوية حاجات من احياء ثانوى وطبعا شوية مصطلحات انجليزى زى الفل محتاج السنة كلها عشان تعرف تحفظهم

المهم الكتاب العملى ب90 جنيه فى الدور الرابع والنظرى بالحجز

وبالنسبة لادوات التشريح هوا قالها بس انا من رأيى اشترى الشنطة اللى فيها ادوات المعمل من مكتبة الايمان او من اى مكتبة وان شاء الله السكاشن من الاسبوع الجاى

واحسن حاجة عجبتنى النهاردة ان مدرج اسنان جميل جدا اللى هوا مدرج 2 ودا اللى فيه معظم محاضرتنا بعكس مدرج 3 بتاع صيدلة اللى الحمد لله مش هنحضر فيه ولا فيه مراوح شغالة ولا ميكرفون ولا داتا شو ولا اى حاجة

يلا باه عايزين مشاركتم ان بقالى 3 ايام بروح الكلية ومعرفتش اى حد من دفعتى خالص ولا عرفت اى حد من اللى كانوا بيشاركوا معانا هنا فى المنتدى