للتعليق على كلمة مبارك

[مستر أحمد حمدى]

شباب مصر وشاباتها بميدان التحرير

يا راجل مش بتوع ميدان التحرير اللى قلتم عنهم خونة وعملاء ومخربين وبياخدوا 50 جنية ووجبة كنتاكى وعاطلين واقذر الاوصاف ؟؟؟

وعلى اتساع أرض مصر أتوجه اليكم بحديث الأب

بدأنا الشحاتة بقى

بأننى أعتز بكم كجيل جديد

معقولة ؟؟؟؟؟

قبل كل شىء دماء الجرحى والشهداء لن تذهب هدراً

غريبة
هو انت بتعزينا فيمن قتلتهم ؟؟؟ يقتل القتيل ويمشى فى جنازته

وسأحاسب من أجرم فى حق الشباب بأقصى أنواع العقاب من القانون

كدة عرفنا انك مش ماشى

استجابتى لكم ولمطالبكم إلتزام لا رجعه فيه

سمعنا الكلام ده كتيييييييير
اللى خلاك كدبت علينا فى وعودك 30 سنة حنصدقك دلوقتى واللى خلاك محققتش الا الفساد وخراب البلاد والخصخصة وبيع ممتلكات الشعب وثروة ضخمة لك ولأعوانك

معقولة تقول الجارديان ان ثروتك اكثر من 70 مليار ومتطلعش تنفى ؟؟؟

وأحرص كل الحرص دون ارتداد أو عودة الى الوراء

يعنى عارف اننا مش حنصدقك والا لو كنت عارف اننا بنصدق كلامك ما كنت احتجت الى استخدام هذا التأكيد الشديد

وذلك بأقتناع أكيد

لسة مقتنع دلوقتى ؟؟؟؟؟؟

لأن مطالبكم عادلة ومشروعة

سبحان الله الذى أنطقك بالحق

قول بقى ل 0000و لمنافقوك ومن يدافعون عنك لا تكونوا أحرص منى فأنا اعترف بأنهم شرفاء وان مطالبهم مشروعة

مش عايز بعد كدة .... يتكلم على المتظاهرين نص كلمة فهاهو من تعبدونه من دون الله يقر ويعترف بمشروعية مطالبهم

وأعلم أن الخطأ وارد فى أى نظام سياسى

ولا يهمك يا ريس ايه يعنى 500 ماتوا و 7 الاف جرحوا ؟؟

الخطأ وارد

ايه يعنى بلطجيتك افزعوا الناس ودمروا البلاد ؟؟؟

الخطأ وارد

ايه يعنى تخصخص المصانع وتشرد العاملين ؟؟

الخطأ وارد

ايه يعنى تطيح فينا شرطتك تعذبنا وتبهدلنا وتقتلنا ؟؟؟

الخطأ وارد

ايه يعنى حالنا يصعب على الكافر فيتفشى الفساد والمحسوبية والواسطة وتنعدم الكرامة ؟؟؟

خطأ وارد

ايه يعنى تبيع لاسرائيل الغاز بدولار وربع وتبيعهولنا ب 5 دولار ؟؟؟

خطأ وارد

ايه يعنى شبابنا يغرق فى العبارات بتاعة محاسيبك وميتحاسبوش ؟؟؟

خطأ وارد

ايه يعنى يموت اهلنا فى الهلوكوست " قطارات الموت "
؟؟
خطأ وارد

ايه يعنى تحاصر الفلسطينيين وتبنى لهم جدار عازل فولازى أقوى من جدار اسرائيل ؟؟؟

خطأ وارد

ايه يعنى نثور ونقولك لا أكثر من12 مليون ونخرج فى مظاهرات وانت تفضل على قلبنا .؟؟؟؟

خطأ وارد

ايه يعنى تزور الانتخابات 99% حزب وثنى ومفيش معارضة ؟؟؟

خطأ وارد

والمهم هو الأعتراف به وتداركه وتصحيحه

لسة فاكر تصحح بعد 30 سنه
دا التصحيح ضاع بالتقادم

لا أجد حرجاً من الأستماع لشباب بلادى

طيب يا عم مهم بيقولولك امشى ؟

ارحل يعنى امشى ولا مبتفهمش ؟
الشعب يريد اسقاط الرئيس ؟

والشعارات الكتيرة ولا هى بيقولوها باللاتينى ؟؟؟؟

ولكن الحرج كل الحرج الأستماع الى املائات أجنبية تأتى من الخارج

هههههههههههههههه

والله ضحكتنى يا راجل

يعنى اسرائيل التى سعت الى تثبيت نظامك لأمنها ولغازها لم تفلح وامريكا التى تقف الى جانبك وتملى عليك تزرع قمح قد ايه عشان المعونة
يبقى مين اللى بيسمع كلام الخارج

ثم هو انت بتتكلم عن خلية من 12 شخص عشان تقول ذى الأغبية والبغبغاءات اجندة خارجية وكراسة خارجية وكتب خارجية ؟؟؟

دا 12 مليون مصرى

امتى اسرائيل جندتهم

امتى امريكا جندتهم

وصرفوا قد ايه لتجنيدهم ؟؟؟

فبلاش كلمة اجندات وكرسات خارجية خااااااااااااااالص

شباب مصر
أوكد عدم ترشحى ومتمسك بذلك

قديمـــــــــــــــــــــــــة

،وتفويض نائب رئيس الجمهورية بكل الأختصاصاتكما بنص الدستور

الدستور نفسة بيديك الحق فى استرجاع مهامك من نائبك كما ان النائب المفوض من الرئيس لا يستطيع حل مجلس الشعب ولا تعديل الدستور

يبقى حنعمل ايه بنقل الصلاحيات
يعنى بتضحك علينا ؟؟؟

ثم هو انت نفسك لك صلاحيات ؟؟؟

صلاحياتك سقطت يوم 25 يناير
بإرادة الشعب ودا نص الدستور

ان الشعب مصدر السلطات

وبلغ النصاب القانونى لاسقاطك

وسأمضى فى حماية الدستور

يا سيدى هو مستغنى عن حمايتك
ثم فيه حاجة اسمها الشرعية الثورية
وانت اعترفت بأنها ثورة

وعند حدوث الثورات يسقط الدستور

ودا لسبب بسيط

الدستور اعلى القوانين مكانه ولذلك القوانين العادية يتم تصويت مجلس الشعب عليها

اما مواد الدستور يصوت عليها مجلس الشعب ثم تعرض لاستفتاء عام
يعنى لازم اغلب الشعب يوافق عليها

طيب دلوقتى الشعب قال كلمته ب 12 مليون شخص ومعهم قدهم مرتين مخرجوش للتظاهر منهم من يحرس بيته من بلطجية الحزب ومنهم من لا يريد التظاهر ولكنه رافض للنظام

يعنى غالبية الشعب قالك لا

والدليل ان معدناش بنشوف مؤيدين ليك

لأن اللعبة ظهرت انهم كانوا مأجورين وبلطجية

فعليه يوجد الشرعية الثورية او الدستور الثورى

حتى يتم الأنتقال السلمى برؤية للخروج من هذه الأزمة بنحو يحقق مستقبل مصر فى اطار انتقال سلمى مع حوار لجميع أطياف الشعب المصرى للخروج بالوطن من هذه الأزمة

والله انت اللى أزمة

وبدءنا حوار وطنى مع الشباب

الشباب فى الشوارع

واسفر على توافق مبدءى بخطوط عريضة لنضع ايدينا على الطريق الصحيح ثم ننتقل به الى خريطة طريق

خريطة طريق تاااااااااااااانى

يعنى منستش مفاوضات الفلسطينين مع الاسرائليين

وهى فعلا خارطة طريق اللى قعدت اكتر من 8 سنوات ولم يتحقق منها شئ