يوميات التقديم بعد التحويل في المنصورة 1

[ningooooo]

بسم الله الرحمن الرحيم

بعد الفشل الذريع ليوميات التحويل في المنصورة ويوميات التحويل في المنصورة2 قررت بفعل الرخامة أني اكتب الموضوع ده و أحكيلكم رحلة التقديم
في الأول صحيت الساعة 9 إلا عشرة كده و نزلت علي الساعة 9 و عشرة و ركبت تاكسي و أخير وصلت للكلية و كانت أول مرة أدخلها و مش عارف حاجه خالص و عمال ألف و بعدين لقيت طالب أكبر مني سألته علي مكان شئون الطلبة و انا فهمت غلط و روحت مكان تاني خالص ههه فهو جري ورايا و قالي اني كده ماشي غلط و من هذا الموقع اقدم شكري لهذا الطالب و بعدين و صلت لشئون الطلبة و دخلت لقيت علي شمالي كشوفات و قرأتها كلها و كانت المفاجئة أني ملقيتش اسمي أوبااا فقلت ابص تاني و الحمد لله أخيرا لقيت اسمي الحمد لله و التحويل اتقبل بعد تعب اعصاب و مشقة و عناء و دخلت غرفة شئون الطلبة لاني لقيت ناس داخلة تاخد ورق التقديم فأولتلها عاوز قالتلي روح أقف في الشباك حاجه تفقع الصراحة ما كله بيدخل و بياخذ يعني جت عليا فقولت خلاص أصلا الشباك مش زحمة فطلعت علشان أخذ لقيت الورق خلص و فضلت مستني و عرفت اننا المفروض نأخذ من الشباك ده ظرف و ورقة طلب ألتحاق و ورقة الكشف الطبي و بعدين اخير الورق وصل علي بالة ما وصلت كان الظروف خلصت و قولتلها طيب ادينا الورق دلوقتي نملاه و كانت مش راضية نهائي حاجة مستفزة و بعدين مشيت مش عارف راحت فين و جه راجل تاني محترم أدالنا الورق نملاه لغاية لما الظروف توصل و كان بيرد علي تساؤلتنا بكل أدب ربنا يكرمه و بعدين مليت طلب الألتحاق و اديتله ورقة الكشف الطبي يدبس فيها صورتي و يعمل الختم و قالي روح أعمل الكشف الطبي فروحت المجمع الطبي اللي هناك و جبت دمغة من هناك ب 20 جنيه و الراجل حطها و بعدين قولتله اعمل الكشف فين قالي روح الكلية تاني فسألت حد تاني بره الغرفة دي قالي روح الأوضة اللي في الجنب دي فروحت و قعد يسألني الطبيب شوية أسئلة و بعدين كتب حاجات كده و خلص وبعدين جاي أخذ الورقة قالي لأ هتسيبها هنا و احنا هنبعتها فقولت ماشي و رجعت تاني الشباك لقيت الظروف لسه مجتش فقولت خلاص اروح مش مشكلة و اسيب الناس اللي جايين من مناطق بعيدة الصراحة هم اولي و الحمد لله أن تحويلي اتقبل و خلاص و بعدين افتكرت أني ممليتش البيانات في ورقة الكشف الطبي يا نهار أبيض فرجعت تاني و بعد ما تقريبا وصلت افتكرت اني مش معايا قلم يوووووه فرجعت تاني أجيب قلم بس لقيت واحد صحبي الحمد لله كان رايح و معها قلم وروحت المجمع تاني و مليت الورقة و انتهت رحلة اليوم الحمد لله و هروح بكرة أقدم و أدفع الفلوس و ألف شكر ليك يا رب أن التحويل أتقبل و علي فكرة الراجل اللي هناك قالنا ان التقديم هناك مفتوح حتي بعد بداية الدراسة بإذن الله و برضه مكنش في كلام عن التبرعات نهائي .

و هقولكم خطوات التقديم للناس اللي عامله تحويل علشان الناس اللي هتروح بكرة أو بعدين تكون عارفة :

1 - أول ماتدخل روح شئون الطلبة و شوف اسمك في الكشف و لا لأ و إن شاء الله هيكون التحويل أتقبل و أعرف رقمك

2 - بعدين تروح علي الشباك و تاخذ ظرف و طلب ألتحاق و ورقة علشان الكشف الطبي

3- تملوا البيانات في الورقتين و بعدين تضع الورقتين و ورق التقديم في الظرف و رجعهم الشباك تاني و هما هيدبسوا صورة في ورقة الكشف الطبي و يدولك أيصال علشان تروح تدفع و هيأخذوا بقية الورق بعد ما يعلموا علي اسمك في الكشف

4 - تروح المجمع الطبي هتلاقي غرفة فيها راجل تديله عشرين جنيه و هو هيلزقلك الدمغة علي الورقة و بعدين تروح غرف الكشف و الطبيب هيسألك شوية أسألة و بعدين خلاص

5 - الخطوة الأخير أنك هتروح تدف الفلوس و يديلك ورقة حمراء باين ترجع توديها للي في الشباك تاني

بس الصراحة الخطوة الأخيرة دي أنا مش متأكد منها لأني لسه موصلتلهاش بس اللي أنا كتبته ده من اللي شوفته

و ربنا معاكم و ما تنسوش تصلوا ركعتين شكر لله