هتسيبيني؟ طب اجلديني

[أحمـدنجـم]

اقلعي جلدك .. اجلديني
متخافيش لو قلبي يصرخ
مترحميش لو تبكي عيني
اجلدي ايوه هنا جامد هنا
قطعي كل الهنا فرحة سنيني
لو صعبت عليكي هِمّي
غمي عينك واجلديني
*****
اجلديني يا قلب طيب
ع الكبر عرف القساوة
وامسكي كرباج يشيب
أعمى يجهل خوف هداوة
ضهري انكشفلك صبي يلا
مش هقولك كلمة والله
مش هقولك خافي الله
لوني فيا العذاب
ارسمي بومة وغراب
وارفعي كلمة خراب
واجلديني
*****
هتسيبيني؟
خلاص .. بقولك .. هتسيبيني؟
هتغيبي وغروبك بدا
مليون ضحية ف المدى
والدم فار والانتحار .. تو .. ابتدا
هتسيبيني؟
هتنسي حتى ضمتي؟
هتنسي صوتي لمستي؟
هتنسي كلمة يا حبيبتي؟
كانت حياتك دنيتي
هتسبيني؟
طب اجلديني
خلى آخر حاجة بنا علامة فيا
منسهاش مهما هعيش
الطير ما ينسى عش ضمه
بين حطانه طلعله ريش
اجلديني عشان تعيشي
حتى لو هبقى .. مفيش
اجلديني
هتسيبيني؟
قبل ما تمشي اسرقي من عيني نومها
لملمي كل الحاجات واطمسي عني مكانها
حتى ألواني امسحيها
سيبي الاسود في هدومي
في منامي
حتى في لون الحيطان
سيبي الاسود
حتى في نور النجف
سيبي الاسود
حتى في النورس كمان
سيبي الاسود
حتى في عيوني وبياضها
سيبي الاسود
حتى في سمايا وقمرها
سيبي الاسود
حتى في الشمس ونهارها
سيبي الاسود
حتى في القلب اللي حبك
سيبي الاسود
حتى في زماني ووقتي ودنيتي كل اللي ليا
سيبي الاسود
واجلديني
سيبي جلدك اعمله بعدك غطا
اعمله بعدك فنار يهديني دايماً في الخطا
انسجه في برد الشتا بالطو وشال
ارسمه في الصيف مصايف فيها شطك والخيال
ولما اموت يبقى الكفن
فيه اندفن
يحميني م الدود م العفن
يبقى جنة يوم قيامتي
يبقى هامتي اللي ما تعرف تنكسر
يبقى حبي اللي لا يمكن يندثر
سيبي جلدك
هعمله صفحة وقلم
واكتب قصايد بحري فيها منتظم
على نبض قلبي والألم
هوصف حياتي بعد الحياة
هوصف عدم
هوصف حبيبة سابت أثر
مينتهيش فاق الهرم
سيبي جلدك
واجلديني
هتسيبيني؟
هنام لوحدي؟
هيكون سريري ولا لحدي؟
اتخنقت
خلاص مفيش
عندي كلام
هيقولوا شعري مش تمام
لاني مش لاقي النهاية
والنهاية
هتسيبيني
دي النهاية
اجدليني
دي النهاية
*********